Matthew 25 - Pupu Oharo Āre 1963 Genese 1970 Rute 1972

Marita hoaha 10 ila ve parabole

¹ Kaea ve basileia maria: Marita mai ukai ukai lamepa ila hoahukape uva are laeape haela eavakive.

² Marita hue ila iki va ore, kai hue ila iki va haveva.

³ Ikihaveva la marita lamepa kerosene oaria au huaila.

⁴ Aka ikiore la marita ereve lamepa kerosene oaria huavape.

⁵ Ere va uva are laeaki haela haiapo la kari ovohae hohoila le urupape.

⁶ Oroa a hihi arahai itavape maria, Iapaila, uva are laeaki haela mave ekeve: e va hoahuka ai arero eavi okiharo koarakive.

⁷ Marita oaria urahuka ereve lamepa wick karikivahaeape.

⁸ Ikihaveva marita ikiore marita maria maeaeape, Eve kerosene perehekai hela elaro aikiara, ehovea elave lamepa hela va le huhurai.

⁹ Ikiore marita kavale maeaeape, Laria va ka. Elave kerosene elave lamepa eve lamepa ila hoveahovea ka. E va ilaea leivahaelula haela ve oki auila, e havahu leia elare ilaea leila.

¹⁰ Ere va ilaea leikive auvahaeape la hoa uva are laeape haela ekepe. Eharu overa kariki hoveahovea la haela arero koarai uvi pekahavape, kai okiape kokaukape, aheke iele leipe.

¹¹ Aireaki la marita uku ekevahaeai mari maeaeape, Amua e, Amua e, okiape hela ra hapa.

¹² Aka are kavale maeaeape, O iele, ara ero maeaeaive, ara ero ore va ka.

¹³ Laelave — kiva auhohi leila, ehovea e va haela ve Akore ve ekeki hare i hoa ila va ore va ka.

Talent ve parabole

¹⁴ Ehovea kaia ve basileia ita apehai hahi auvila haela hovea. Are havahu ve horova haela itavavahaeai areve eharu erero kiva leikive aiarape.

¹⁵ Are va haela ae taleni 5 aiarape, haela ae va taleni 2, haela ae va taleni 1. Are haela oaria ereve ikiore hovea aiarape, kai areve hahi ehoe urai le aupe.

¹⁶ Taleni 5 aeape la haela are va la moni kakavae lei taleni 5 kepea koarape.

¹⁷ Taleni 2 aeape la haela lari lei taleni 2 kepea koarape.

¹⁸ Taleni 1 aeape la haela are va koru iha kekele le roroapape.

¹⁹ Hare oaria kari lei — la amua areve horova haela korukaeai ereve horova heheavape.

²⁰ Taleni 5 aeape la haela taleni 5 kepea aikepe — kai mari maeape Amua e, a araro taleni 5 aikiarape — eavaki — ara va taleni 5 kepea koarape.

²¹ La amua arero maeape, Ave ma mai veveke havahu — a va iapa havahu horova haela. A va eharu perehekai kiva auhohi leipe, laelave ara aro eharu oaria kiva haela leikilai. E va haelapo i ari ikiveveke eapapo leila.

²² Taleni 2 aeape la haela kara iki areve amua mari maeape, Amua e, a araro taleni 2 aikiarape, iapa, ara va taleni 2 kepea koarape.

²³ Areve amua arero maeape, Ave ma mai veveke havahu, a va iapa havahu horova haela. A va eharu perehekai kiva auhohi leipe, ehoveala ara aro eharu oaria kiva lei haela leikilai.

²⁴ Taleni 1 aeape la haela iki areve amua mari maeape, Amua e, ara aro ore overa leipe — a va haela aheke iele — a va puravai velariki aue la ita a va haerapaivila, a va apoporaki aue la ita ava leia hae ikaeavila.

²⁵ Ara oaoka lei ave la taleni 1 koru le ihape. Eava. ave la eharu ma.

²⁶ Areve amua arero kavale maeape, A va iapaki aue mai haeae horova haela. A va ore ara va puravai velariki aue la ita ara haerapaivila, ara kai apoporaki aue la ita ara hae ikaeavila.

²⁷ Laelave — mari leikive veveke — arave moni kakavae leilula haela ra avarakilava, arave ekeki hoa ara havahu ve moni kepea ila ara aeakilai.

²⁸ Ehoveala, areve la taleni 1 hareava — taleni 10 ila la haela la avaraki.

²⁹ Ehovea eharu ila la haela oaria erero kara aeva aiarakilai. Eharu karia la haela — ere oropa aeape la eharu ere va titavakilai.

³⁰ La horova haela heaha mahokaea ve la muru hoa avakakive — Leia hivavara oaria, kao kara erehahaeakilai.

Aireaki meahaiapo heheavaki hare

³¹ Haela ve Akore ovava ila ra ekekilava, hehe aneru oaria kara, are va morapaea terona akea ve avakilai.

³² Vila ipipi lahua lahua haela oaria areve oropa ve korukaiavahaeakilai, are erero havuri ukai ukai ila, hoveahovea kiva haela areve mamoe goats ila hiru lahua lahua ra havureakilai.

³³ Mamoe areve mai ore ukaki vea, goats areve mai keva ukai vea.

³⁴ Areve mai ore ukai vea la haela Amua mari maeaeakilai — Ekeila, arave Oa momorapaevila haela — meahaiapo ipopeavape hoa e v'ila karikipe la basileia e mave avakive leiro.

³⁵ Ehovea ara eroa hape kai e araro eapai avikiarape. Ara ma karave koa leipe, e ma araro avikiarape — ara merava leipe, e araro auhohi leipe.

³⁶ Ara maheare — e araro pura avikiarape — ara maea hape — e araro koarai avape — ara uvi muru aeape — e araro ikiheroe leipe.

³⁷ Mai ehohoe haela arero kavale mari maeaeakilai, Amua e, ela va aro leahau eavape — a eroa hai ela eapai avarape, kai a ma karave koa lei la ela aro ma avarape ha?

³⁸ Ela va aro leahau eavape — a merava lei ela aro auhohi leipe ha? Aka maheare eavi aro pura ra avarape ha?

³⁹ Ela aro leahau eavape — a va maea ka, aka uvi muru aea, ela ave oki auvahaeape ha?

⁴⁰ Amua erero kavale mari maeaeakilai, O iele, ara ero maeaeaive, Lae vi va, e va arave mari akore hekai iele la ikiheroe ma va laila, e va araro kara lari leipe.

⁴¹ Are areve mai keva ukai la haela mari maeaeakilai, E va haela heahaha ita lahua auila, lari hiki hahavila a ve, diabolo aneru ila ve overa karikipe la a.

⁴² Ara eroa hape, e araro eapai au avikiaraila. Ara ma karave koa leipe, e araro ma au avikiaraila.

⁴³ Ara merava leipe, e araro auhohi au leila — maheare leipe, e araro pura au avikiaraila — maea hape kai muru uvi aeape, e arave oki au ekeila.

⁴⁴ Aire ere arero kavale maeakilai, Amua e, ela aro leahau eavape, a eroa hape kai ma karave koa leipe, aka merava leipe, aka maheare leipe aka maea hape, aka uvi muru aeape, kai ela aro auhohi au leila ha?

⁴⁵ Are erero kavale mari maeaeakilai, O iele ara ero maeaeaive, Lae vi va — e va mari akore hekai ikiheroe mai leikiaue ra leikilava, e araro kara ikiheroe au leila.

⁴⁶ Ma haela ere va au hiki apihaeakilai — mai ehohoe haela ere va ovokake hiki apeakilai.