Matthew 24 - Pupu Oharo Āre 1963 Genese 1970 Rute 1972

Hehe Uvi ve kopararapaki oharo kai meahaiapo karia leiki oharo

¹ Iesu Hehe Uvi harepape kai areve kilea haela areve oki ekevahaeape Hehe Uvi ve haharika arero amoeakive.

² Iesu erero maeaeape, E va ma eharu oaria eavavahaeaila: O iele ara ero maeaeaive, Maia have aeva have akea ve aireaki aea va ka, uvi oaria hareho hukilala paraeakilai.

³ Are Olivet kela leia avape kai areve kilea haela areve oki muruhari ekevahaeai mari maeape, Elaro kimaeaki, ma eharu leahau kihoreavakilai, aeva ave ekeki hoa, meahaiapo kari la leiki la hoa ve ihova learia ha?

⁴ Iesu erero kavale maeaeape, E kiva auhohi leiki, haela ero aburaeaki ave.

⁵ Ehovea haela oaria arave rare ve ekevahaeai mari arilai, Ara va Keriso; aeva haela oaria aburaeakilai.

⁶ E va mare i mihea mahea ila ve hari iapakilai. E va iki va kaihaharue, ehovea ma eharu oaria overa iki hoarapakilai, aka leia kari leiki hoa va ka.

⁷ Ehovea vila ipi aea va vila ipi ae i urahuka miho‐mahe arilai, basileia aeva basileia ae i hahari arilai, ita oaria hohera leikilai, mea heaha leikilai, kai mea puipui ekekilai.

⁸ Ma eharu oaria ikihuru ve avare koai ipopeavaki hoa.

⁹ Ere va la hoa ero hihila epavahaeakilai kai ero haeakilai. Vila ipipi oaria ero ikiheaha leikilai ehovea arave harihari.

¹⁰ La hoa haela oaria ikihairhairi leikilai kai elarelare hihila epavahaeakilai kai elarelare hahaure hahaure leivahaeakilai.

¹¹ Opore peroveta haela oaria urahuka haela oaria aburaeakilai.

¹² Aeva ehovea la hoa mai heahaha oaria leikilai, uku haela ve ikiheroe huhurakilai.

¹³ Aheke aiai kari leiki hoa la haela are va okokake leikilai.

¹⁴ Ma basileia ve iroro ita lahua lahua oaria hareho kopurapakilai, ehovea vila ipipi oaria ore leikive, aireaki va kari leiki hoa ekekilai.

¹⁵ E va hararua eharu heaha iele i oaoka lei hukauki eharu, peroveta Daniel maeape la eharu, hehe ita epavaki ra eavakilava (ma oharo mureaki haela auhohi iapaki);

¹⁶ Judea apealula la haela kela oaoka lei hukai pekahavakilai.

¹⁷ Uvi ailoki akea ve epavaki la haela uvi ve eharu avakive kihoau va arekaea.

¹⁸ Aeva oru araeape la haela uvi pura aeaki ve kihorera va arekaea.

¹⁹ Oea, akoremari ila la haela kai mahumu uamari kara.

²⁰ Ivaiva auhohi leiki, eve vivilaki hoa mea vevehere leiki ave, sabati hare kara leiki ave.

²¹ Ehovea la hoa heraho eapapo iele, lari au leila, overa avare koai ipopeavape la hoa aiai ma hoa. Aeva aireaki hoa kara.

²² La hoa haerapaki aue la leikilava, aivau eharu lei makukuri va ka. Aka, ehovea haela mekakure ve, la hoa ka hekai leikilai.

²³ Laelave, haela aro mari ra maeakilava, Eavaki, Keriso ma, aka Keriso la — la oharo ka iaparue.

²⁴ Ehovea opore Keriso urahukakilai, kai opore peroveta haela. Ere va ikihorahora leiki ihova ra amoeavahaeakilai: laelave maeamaea ere va haela mekakure kara aburaeaki, maea iele.

²⁵ Iapaila, ara ero overa maeaeape.

²⁶ Laelave, ere ero mari ra maeakilava, Iapai are ita merava aeave, e va kauvahaealue — Iapai are uvi lalava ureve aeave; ka iaparue.

²⁷ Ehovea, hoveahovea kevao kauri ukai mavakilai, aiai hurava ukai kara, laria haela ve Akore kara ekekilai.

²⁸ Ehovea apihaea haela ve maea iilu aeaki la ita, leia harapa la korukaiakilai.

²⁹ La heraho hoa kari lei, hare elavelave muru leikilai, papare ovava heauapa va ka — kou oaria kaia ve hohoakilai: kaia ve aheke oaria lulalula arilai.

³⁰ Haela ve Akore ve ihova kaia ve hihika horerakilai. Meahaiapo ve vila‐ipipi oaria ikihuru leivahaeakilai. Ere va haela ve Akore kaia ve meuru ureve aheke i ovava ila kihoreraki eavakilai.

³¹ Are areve aneru eakea i hoi kakarai ila kipaparaehakilai, ere areve ikikekela haela meahaiapo ita oaria ve korukaiakilai, kaia ve ukai ukai.

O iele kiva auhohi leivahaeaki oharo

³² E mahau suke kora ve parabole ore leikive. Areve mamaeako are, rorore are ra horeavakilava, e va ore leiki hitolo hoa maea maea.

³³ E ka laria ma eharu oaria ra eavakilava, e va ore leikilai are maeamaea, okiape maia iele vea.

³⁴ O iele, ara ero maeaeaive — ma vilakao kari lei va ka ma eharu oaria hihi lei horera ka leikilai.

³⁵ Kaea meahaiapo ila karia leikilai, aka arave oharo karia lei va ka.

³⁶ Aka la hare, la hoa ila haela aea haveva: Kaire, Kaia ve aneru kara ore va ka, ore arave Oa hiki.

³⁷ Aka Noah ve hare leipe hovea, haela ve Akore ra ekekilava, laria.

³⁸ Hoveahovea, haa hape, la hoa, haela oaria eapai i ma ila lalavahaeroape, uavila karairoape aiai Noah vevaea apo ureve araeape la hare.

³⁹ Kai oaria ore va au leila aiai ita haa hape, erero oaria le aititivape. Haela ve Akore ra ekekilai ka laria.

⁴⁰ Haela orahokaila oru ure ra apeakilava, haroapo le havoavakilai, ae va haroapo le aeakilai.

⁴¹ Uavila orahokaila pai ra haeakilava, haroapo le havoavakilai, aeva haroapo le aeakilai.

⁴² Laelave kiva auhohi leila. Ehovea e va Amua ve ekeki hare ore va ka.

Horova haela veveke i horova haela heaha ila

⁴³ Aka mari ore leiki. Uvi haela korea haela ve pekaki hoa ore ra leikilava, are kiva overa leikilai, kai areve uvi heaha lei va ka.

⁴⁴ Laelave e kara overa kariki kariki ari, ehovea e va ikikekelaki aue la hoa haela ve Akore le ekekilai.

⁴⁵ Mai ehoe, ikiore horova haela leita? Areve amua areve uvi haela kiva leiki paraeape — ereve eapai mehae mehae aiarakive.

⁴⁶ Areve haelapo ve horova auhohi kiva leiki la haela are iki lari ra eavakilava, la haela ikiveveke leikilai.

⁴⁷ O iele ara ero maeaeaive, Are areve eharu oaria ve kiva leiki ve maeakilai.

⁴⁸ Aka la horova haela heaha iki ureve mari la kekelakilava, Arave amua ekeki hoa haiapo.

⁴⁹ Kai are i hareho horova leilula la haela huhari ra haeakilava, kai eapai e karave lahua ra leikilava kai ma heaha laralula la haela ve ihape mai ra leikilava:

⁵⁰ La horova haela areve amua ve ekeki hare are kekela va ka, haveva hiki.

⁵¹ Are arero oaria huhari harilai, kai arero opore haela ve ita ra paraeakilai. Ere va, hivavara eapapo, kao ere hahaeakilai.