Matthew 23 - Pupu Oharo Āre 1963 Genese 1970 Rute 1972

Iesu Hohoa haela i Pharisee haela ila au hahape

¹ Iesu haela oaria i kilea haela ila mari maeaeape:

² Hohoa haealula haela i Pharisee haela ila Moses ve haha avape.

³ Laelave ere ero maeaeaki la pupu oaria kiva leivahaeaila — aka ereve horova hovea kalaivahaelue — ehovea ere kileavahaelula la pupu ere kiva leivahaea va ka.

⁴ Ehovea ere pupu mehau ila haela ve horo ve hahaealula — aka ere havahu la mehau lekoka haroapo v'ila hareava va ka.

⁵ Aka ereve horova oaria ere va ikivere haela hihika eavakive — ereve phylactery huraha leivahaelula, ereve pura kao oaria kara.

⁶ Ere va ikivere eapapo hurai ve akea avaki ita — ae va synagogue ve la oropa ita oaria.

⁷ Ae va karikara hihi ve morapaea oharo oaria — ae va haela erero Rabbi rare itavakive.

⁸ Aka e Rabbi rare ikivere kalaivahaelue — ehovea haroapo hiki eve haelapo la — Keriso hiki — e oaria apoheari.

⁹ Ae va meahaiapo hoa haela oa rare ka itavalue — ehovea e va Oa haroapo hiki — kaia akea ve la Oa.

¹⁰ E va haelapo rare kavarue — ehovea eve haelapo haroapo hiki, Keriso la.

¹¹ Aka eve akea ve ikivere la haela — are eve horova haela va heroe.

¹² Elare akea ve leiki la haela ae va ipi leikilai. Maioka leiki la haela are va oropa ve leikilai.

¹³ Aka — Ikihuru e, hohoa haealula haela i Pharisee haela ila, opore haela e, ehovea e va kaia ve basileia haela v'ila kokauvahaelula: ehovea e kara leia arahava va ka — e va haela ae kara ve oki hereavalula.

¹⁴ Ikihuru e, hohoa haealula haela i Pharisee haela ila, opore haela e, ehovea e va uavila maitava ve uvi korea leivahaelula — ae va opore ivaiva leivahaelula — e va aireaki heheavaki hoa heaha ila koarakilai.

¹⁵ Ikihuru e, hohoa haealula haela i Pharisee haela ila, opore haela e, ehovea e ahea i mea ila helari hupakai ikihelariki haela haroapo paeakive — aka e arero paeaki la hoa e va arero heaha havahu leivahaelula — e havahu ve la heaha hoveahovea.

¹⁶ Ikihuru e, ovohae kariri kari auki haela — ehovea e maria arura, Haela Hehe Uvi v'ila okoare la maeakilava, iele karia, aka haela Hehe Uvi ve gold v'ila okoare la maeakilava, areve apekorea eapapo.

¹⁷ E ihape haela i ovohae kariri haela e, le la eharu eapapo — la Hehe Uvi ve gold, aka gold ve hehe leiki la Hehe Uvi ha?

¹⁸ Ae va haela morapulula haha ve rare okoare ra maeakilava, leia iele va ka, aka haela la haha akea ve la meru ve rare okoare ra maeakilava, la va haeae iele.

¹⁹ E va iki haveva ovohae kariri haela e — eapapo le la hoa ha? La meru, aka arero pupu leipe la morapulula haha ha?

²⁰ Laelave, haela morapulula haha ve rare okoare ra maeakilava, are va haha areve eharu oaria ila ve rare okoare maeavila.

²¹ Hehe Uvi ve rare okoare maeavila la haela are va Hehe Uvi, areve ureve aeavila haela ila ve rare okoare maeavila.

²² Kaia ve rare okoare maeavila la haela are va Aualari ve terona ve avavila haela ila ve rare okoare maeavila.

²³ Oea, hohoa haealula haela, Pharisee haela ila, e va opore iele, ehovea e va mint, anise, cummin ila Hehe Uvi meru leivahaelula, aka pupu ve iele maria, ehoe heheava mai, ikiheroe mai, iapa veveke mai — e va hahaure leivahaealula. Veveke e va ma eharu kara leivahaeaki, ae va oropa la eharu kara hahaure leiva ka.

²⁴ E ovohae kariri oki kileaki haela — e va ehare au eavailula, e va kamela au hiki iropalula.

²⁵ Oea, hohoa haealula haela, Pharisee haela ila, e va opore iele, ehovea e va hekako haita ila ve kaikavaki huhelavahaelula, aka ereve ureve korea mai, maea pelaea mai ila ve hiri oaria le apearo.

²⁶ E ovohae kariri Pharisee haela e, oropa hekako haita ila ve ureve ma huhelavaila, aireaki ereve kaikavape aire huhelaki veveroro la leikive.

²⁷ Oea, e hohoa haealula haela, Pharisee haela ila, e va opore iele, ehovea e va au karikipe kapu ita houkuka hovea. Iele, ereve akea ve maupa ila, aka ureve apihaeape haela ve uki haro oaria, hirihiri eapapo.

²⁸ Lahovea e kara haela ve oropa ve mai ehoe haela hovea leilula, aka eve iki ureve opore oaria mai heahaha oaria ila heheloekoavi apearo.

²⁹ Oea, hohoa haealula haela, Pharisee haela ila, e va opore iele, ehovea e va peroveta haela ve kapu ita karikivahaealula, kai mai ehohoe haela ve kapu ita maupa leivahaelula:

³⁰ E kara mari maeaelula, Ela va houva hoa apea maea va laila, ela ereve peroveta haela ve apu hakaitapaki horova lei va ka.

³¹ Laelave — e va ore iele haela, e havahu va peroveta haela haeape la haela ve akoremari.

³² E va houva haela ve haeae e havahu hovea leikive.

³³ Ekaroa e, ekaroa ve vilakao e, eve Gehena va heaha leiki hoa leari ovokake lei hukaukilai ha?

³⁴ Laelave — ara peroveta haela, ikiore haela, pupu haealula haela ero paparaehaevila. E va uku au haeakilai, uku va kai satauro ve haeakilai, uku e va synagogue ureve haru haeakilai, ae va karikara karikara ve haruapakilai.

³⁵ Ehoveala, mai ehohoe haela oaria ve hakaitapape apu ve haeae, e hiki aeakilai, mai ehohoe haela Abel ve hoa aiai Zacharius, Barachias ve akore ve hoa, Hehe Uvi morapulula haha ila aru hihi hape la haela.

³⁶ O iele ara ero maeaeaive, Ma haeae oaria ve mehau ma vilakao aeakilai.

Iesu Jerusalem ve aireaki heraho ikihuru leipe

³⁷ Jerusalem e, Jerusalem e, a va peroveta haela haeavila, aro paparaehape la haela oaria have haealula — ara va hoa leavaila ave akoremari korukaeaki ikivere leipe, kokora lou areve akoremari maho ureve vovoro leivahaeavila hovea, aka a va ikivere au leila.

³⁸ A iapai, ave uvi haua ka.

³⁹ Ehovea ara ero maeaeaive, E va araro aireaki eava va ka aiai e va mari maeakilai, Amua ve rare ve ekeki la haela morapaeaki.