Matthew 22 - Pupu Oharo Āre 1963 Genese 1970 Rute 1972

Uva laeaki hurae ve parabole

¹ Iesu erero aeka kavale parabole mari maeaeape:

² Kaia ve basileia maria — amua ae areve akore ve uva maepaki hurai leipe.

³ Are horova haela paparaehape ehovea apavara haela la hurai eapai larive itavavahaeakive. Ere ikivere au leila.

⁴ Are kai haela uku paparaehae erero mari maeaeape, Au itavape la haela maeaeakive, Iapai — ara va eapai overa kariki karia leilai — arave boromakau ehoaha titaeka ila overa hai — eharu oaria overa kariki hovea hukavi — eapai larive ekeila.

⁵ Ere va la oharo auhohi au iapaila kai elarelare oki le auvahaeape: haroapo areve kovo ita, haroapo areve store.

⁶ La kepea haela areve horova akoremari kaili hararuavahaeape, uku ere haeape.

⁷ Amua la oharo iapai hihiri leipe — areve maora hevehe haela oaria paparaehae la haela heahaha haekive, kai ereve karikara a aroukive.

⁸ Are areve horova haela maeaeape, Eapai overa kariki karai, aka au itavavahaeape la haela oaria, ere va hovea au leila.

⁹ E va okiharo auila, e va leia koaraki haela oaria kari ekeila, eapai larive.

¹⁰ Laelave la horova haela okiharo auvahaeape — ere koarape haela oaria maea mekaka i maea heahaha haela ila korukaiavahaeape. Hurai ve eapai haela oaria lalavahaeape

¹¹ Amua kihoaupe eapai laralula haela ovohae eavakive. Are hurai pura karia haela haroapo eavape.

¹² Are arero maeape, Haelakaru e, a va hurai pura karia learia la maia lakivikaila ha? Are oharo karia.

¹³ Amua horova haela maeaeape, Arero mai loa ila hahai lai hoauki muru ita aukapaila. Leia hivavara oaria, kao kara heheavakilai.

¹⁴ Ehovea itavavahaeape haela oaria, ikivere leivahaeape haela va perehekai.

Tax moni ve oharo

¹⁵ Pharisee haela hoahuka elarelare oharo hukavape ehovea areve oharo haeae leikive.

¹⁶ Ere Herodian haela, ereve kilea haela ila arero kai paparaehape, ere mari maeape, Haelapo, ela v'ore ave oharo iele, a va Aualari ve okiharo iele havahu kileavila kai haela ve oharo oaoka lei kekela va ka, ehovea a haela hiki kekela va ka.

¹⁷ A va elaro ehoe kimaeaki — ave iki lehae — tax moni Caesar la avarakive, pupu ila, aka ela v'ila pupu ka ha?

¹⁸ Aka Iesu ereve heaha iki kekela mari maeaeape, E opore haela e, e va araro amuraeaki ehovealeve ha?

¹⁹ Tax moni araro amoeki. Ere denarius haroapo arero avarape.

²⁰ Are erero maeaeape, Ove i hohoa ila leita ve ha?

²¹ Ere maeaeape, Caesar ve. Are erero maeaeape, Caesar ve eharu Caesar avaraki — Aualari ve eharu Aualari avaraki.

²² Ere ma oharo iapai ikihorahora leivahaeai arero harepai elare oki auvahaeape.

Api kai urouki oharo

²³ La hare kara Sadducee haela iki areve leia (ma haela mari arura — Apihaeaki haela aireaki urahuka va ka).

²⁴ Ere arero velavela leivahaeape maria, Haelapo, Moses mari ape, Uva ila haela la apakilava, akoremari karia va laila, areve akoreheari uva maitava laeai akoreapo v'ila akoremari erakive.

²⁵ Apoheari 7 ila apearoape. Akoreapo uva lae le apape, akoremari karia — akoreheari la uva maitava le laeape.

²⁶ Aireaki la akoreheari lahovea — aireaki apoheari oaria, ere apihaeai aiai haela 7 hareho karia leilai, akoremari karia.

²⁷ Aireaki uamari kara apape.

²⁸ Api kai urouki la hoa areva leita haela ve uva — ehovea apoheari 7 ila arero laeape?

²⁹ Iesu erero kavale maeaeape, E va haeae eapapo, ehovea e buka hape la oharo i Aualari ve aheke ila haveva iele.

³⁰ Ehovea api kai urouki la hoa ere uavila maepai kara va ka — ere va kaia ve apealula Aualari ve aneru hovea hovea.

³¹ Aka api kai uroukive la oharo v'ila e va Aualari kileape la oharo au mureaila ha — oharo maria,

³² Ara va Abraham ve Aualari i Isaac ve Aualari i Jacob ila ve Aualari? Aualari va apihaeape haela ve Aualari va ka — are va ovokake haela ve Aualari.

³³ Haela oaria ma oharo iapai iki horahora eapapo leivahaeape — ehovea areve kilea oharo veveke iele.

Pupu oaria ve oropa pupu

³⁴ Aka Pharisee haela iapape are va Sadducee haela laria hahape — ere hareho korukaiape.

³⁵ Ereve pupu haeavila haela ae arero au amuraeape maria,

³⁶ Haelapo — le la pupu oharo va pupu oaria oropa ve ha?

³⁷ Iesu maeape, Ava Amua ave Aualari ave iki hareho, ave ove hareho, ave ikikekela hareho ikivere iele leikive.

³⁸ Ma pupu eapapo oropa pupu iele.

³⁹ Areve aire pupu are hovea hovea, A va a i hareho aeavila la haela ikiheroe leiki.

⁴⁰ Ma pupu orahokaila va aireaki pupu i peroveta oharo oaria ve ipi iele.

Messiah ve apevelavela oharo

⁴¹ Pharisee haela hareho korukaiavahaeape la hoa Iesu erero velavela leivahaeape maria,

⁴² E va Keriso learia kelavaro ha? Are va leita ve akore? Ere arero kavale maeape, Are David ve Akore.

⁴³ Are erero mari maeaeape, Laelave David learia arero iki ureve Amua rare avila maria:

⁴⁴ Amua arave Amua maeape — Arave mai ore ukai ve haiavaki, Aiai ara ave iri haela ave loa pavaki haha hovea leikive.

⁴⁵ David arero Amua rare la arilava, are learia areve akore ha?

⁴⁶ Haela oaria arero kavale oharo maeaki hovea ka — aireaki hare oaria haela arero eharu ae va velavela au leila.