Matthew 21 - Pupu Oharo Āre 1963 Genese 1970 Rute 1972

Iesu Jerusalem Amua hovea pekape

¹ Ere Jerusalem maeamaea ekevahaeai Bethphage pekahavi Oliveta kela ra pekahavape. Iesu kilea haela orahokaila paparaehape.

² Are erealilaro mari maeaeape, Oropaki la karikara hekai hoahuka leia ealila au hahape ass akore ila eavakilai — erealilaro hehelauka ara v'ila kari ekeila.

³ Haela ero ra maeaeakilava, e va mari ari, Elalilave Amua erero ikivere leive. Are erero elavelave hehelauka aiarakilai.

⁴ Mari leipe, ehovea peroveta haela ve oharo iele leikive, maria:

⁵ Zion mari maeakive Eavaila — ave amua Maraha ila aro kai ekeve, Ass i areve mere ila akea ve.

⁶ Kilea haela Iesu erealilaro maeaeape hovea lari leipe.

⁷ Erealila ass i mere ila kari ekepe kai elare pura ass ve kaikava akea ve aipepe, Iesu akea ve horeape.

⁸ Haela oaria iele elare pura oki hihi ve koavahaeape. Haela uku kora ve mamaeako oaria koelaea oki hihi ve koavahaeape.

⁹ Aire i oropa i auvahaeape la haela oaria ara hai hape maria, Hosanna, David ve Akore e. Amua ve rare ve ekeki la haela morapaeaki — Hosanna kaia akea ve.

¹⁰ Are Jerusalem pekape kai karikara haela oaria iki horahora leivahaeai mari maeape, Ma leita ha?

¹¹ Haela oaria mari ape, Maia Iesu, Nazareth Galilee ve la peroveta haela.

Are Hehe Uvi huhelape

¹² Iesu Aualari ve Hehe Uvi pekape, leia ilaea aroape haela oaria haruapape — moni kakavae aroape la haela ve haha haivarukapape, huva akokore ilaea aroape la haela ve haha kara.

¹³ Are mari ape, Overa oharo mari hape, Arave uvi ivaiva uvi rare arilai — aka e va arero korea haela ve loro hovea leipe.

¹⁴ Ovohae kariri haela, loa hahaeae haela oaria Hehe Uvi ureve areve oropa ve ekevahaeape — are erero lei makukuripe.

¹⁵ Oharo haela, hohoa haealula haela oaria ila areve horova mekakure eavape kai akoremari ve Hehe Uvi ureve hivavara ra iapape maria, Hosanna, David ve Akore e. Ere ikiheaha leivahaeape.

¹⁶ Ere arero maeape, Ava ereve oharo iapa va ka ha? Iesu erero maeaeape, Kaire — e va au mureaila ha, A ve akoremari titaeka avae akoremari ila ve ape ve morapaeaki oharo iele kihorerape.

¹⁷ Are erero harepai karikara mahokaea ve, Bethany kai hoaupe — are leia avuku uavape.

Kolo hiki la suke kora

¹⁸ Vevelare hoa, are eroa i karikara pekape.

¹⁹ Are oki poe ve suke kora eavape. Are leia hoai eavape areve iele karia, kolo hiki. Are arero maeape, A va aireaki hae horera va ka, lari hiki aeakilai. Haiapo ka, areve kolo le haroropape.

²⁰ Kilea haela leia ra eavi iki horahora kai maeape, La suke kora haiapo ka haroropi hiki laleila.

²¹ Iesu erero kavale maeaeape, O iele ara ero maeaeaive, Eva ikikekela ila kai iki horahora leikiaue ra leivahaeakilava, e va ma suke kora leipe horova hiki lei va ka, aka e va ma kela ra maeakilava, Ita lahua aula, ahea ma ve hareavi aula, are lari leikilai.

²² E va ivaiva hoa velavela leiki la eharu oaria e va iki iele la kelavakilava, e va aeakilai.

Oharo Haela Iesu ve horova ve iele apevelavela leivahaeape

²³ Are Hehe Uvi pekape. Oharo haela i haela hoaha ila areve kilea hoa arero kai iki mari maeape, Ehovealeve a va ma horova leivila ha? Aro ma aheke leita ra avarape ha?

²⁴ Iesu erero kavale maeaeape, Ara ero eharu haroapo apevelavela leikilai. E va araro kavale ra kimaeakilava, ara kara ma aheke avape okiharo ero maeaeakilai.

²⁵ John ve bapatiso lahoa ve? Kaia ve, aka haela ve? Ere iki elarelare kelavape maria, Ela va mari la maeakilava — Kaia ve, are elaro mari kimaeakilai, Ehovealeve e va au iapaila ha?

²⁶ Ela va mari mamavaila — Haela ve — Ela haela oaria oaoka, ehovea ere oaria John peroveta haela rare aro.

²⁷ Ere Iesu kavale maeape, Ela haveva. Are erero maeaeape, Ara kara ara ma aheke avape okiharo ero kilea va ka.

Akoremari orahokaila la parabole

²⁸ Eve iki leari kelavaro ha? Haela ae akoremari orahokaila erape. Are akore koare maeape, Akore e, iki mahau hare arave oru horova leiki.

²⁹ Are kavale maeape, Ara au va ka, aireaki are ikihuru lai le aupe.

³⁰ Are akoreheari lari kai maeape — Are kavale maeape, Ara aukilai, kai au auila.

³¹ Le la akore areve oa ve oharo iapai leipe ha? Ere arero kavale maeape, Akore koare. Iesu erero maeaeape, O iele, ara ero maeaeaive — tax korukaia haela harari uavila ila Aualari ve basileia oropa arahavakilai, e oaria erero aire ve.

³² John e ve maia ekepe — mai ehoe ila la okiharo ve, aka e va areve oharo au iapaila. Aka tax korukaia haela harari uavila ila areve oharo iapape. E va lari eavi areve oharo ra iapaki, mai heahaha ve ikihuru au leivahaeaila.

Vine Oru la parabole

³³ Parabole ae va iapai, Uvi haela aeva oru vine hae apoporai kara hahape. Are vine hae haiharoavaki ita karikipe — kai uvi akea ve urapape: are horova haela ra aiari ita apehai le aupe.

³⁴ Hae hovare maea iele la hoa are mekehaku la horova haela kai paparaehape, ehovea oru ve hae iele aeakive.

³⁵ Horova haela areve mekehaku papaehai haroapo haru koape, haroapo huru la hape, haroapo have koavape.

³⁶ Are ae va mekehaku kepea, oropa hoa perehekai, ma hoa oaria, ra paparaehape. Ere erero laria leivahaeape.

³⁷ Aireaki are havahu ve akore koare are parae mari maeape, Ere va akore ai morapaeakilai la.

³⁸ Kahara, horova haela akore koare ra eavi elare oharo hukavape maria, Maia akore koare; ekeila, elaviila arero huru harilai, aire ela ka areve haruku elarelare le aeakilai.

³⁹ Ere arero mai pae kara mahokaea paraeai huru le hape.

⁴⁰ La oru haelapo ve hoauki hoa are la horova haela leari leikilai ha?

⁴¹ Ere arero maeape, Are la haela heahaha hareho haeka leikilai. Areve oru are horova haela are ra aiarakilai, ere va hae hovare hoa hae oaria arero aiarakilai.

⁴² Iesu erero maeaeape, E va pupu buka ureve au mureaila ha? Uvi kupe haela haure leipe la have Mahau are uvi ve ihau leive. Ma va Aualari ve horova, Elave ikihorahora leiki eharu.

⁴³ Laelave, ara ero maeaeaive, Aualari ve basileia e v'ila hareavakilai, hae iele ikaeaki haela lahua ra avarakilai.

⁴⁴ Haela ma have akea ve ra oaukilava, la haela areve maea koekakilai. Have haela akea ve ra oaukilava, la haela ve maea eroe havahu leikilai.

⁴⁵ oharo haela i Pharisee haela ila areve ma parabole oaria iapai ore leivahaeape — are ere v'ila kekela maeaeape.

⁴⁶ Ere va ikivere arero mai paeakive, aka ere haela oaria oaoka, ehovea haela oaria Iesu va peroveta rare ape.