Matthew 20 - Pupu Oharo Āre 1963 Genese 1970 Rute 1972

Vine oru horova haela ve parabole

¹ Kaia ve basileia maria. Uvi haela havahu leia — are vevelare mea hoai areve oru ve horova haela haropakive.

² Are horova haela hare haroapo ve kavale penny haroapoharoapo okoare maeai erero oru ureve paparaehape.

³ Hare nine o'clock hovea are karikara hihi ve uku naoaenaoae epavava haela aea eavavahaeape.

⁴ Are erero maeaeape, E kara oru arahavaila, eve kavale hovea ara ero aiarakilai. Ere kara arahavape.

⁵ Kai hare hihi kai hailaea 3 o'clock hovea are mea hoai lari leipe.

⁶ Hailaea 5 o'clock hovea kara are hoai naoae naoae epavava haela uku eavavahaeape, are erero maeaeape, Ehovealeve e hare haiapo naoae hiki apearurava ha?

⁷ Ere arero kavale maeape, Ehovea haela elaro au itavavahaeaila. Are erero maeaeape, E kara oru arahavaila, eve kavale hovea e va aeakilai.

⁸ Laelave, hailaea hoa, la oru haela areve horova kiva haela maeape, Horova haela itavaila, ereve kavale aiarakive — aireaki larahavila la haela aiai oropa larahavila la haela.

⁹ Hailaea 5 o'clock arahavape la haela pekahavi kavale denarius haroapo haroapo aeavahaeape.

¹⁰ Vevelare hoa arahavape la haela ereve ikikekela kavale eapapo aeakive. Ere kara kavale denarius haroapo haroapo aeavahaeape.

¹¹ Ere kavale aeape hoa ere la uvi haela ve lavuku lavuku ape.

¹² Ereve oharo maria, Ma aireaki haela ve horova perehekai iele, a erero aka elaro kavale hovea laleila — ela va hare haiapo horova ahea eapapo la leivahaeaila.

¹³ Aka are haela ae kavale mari maeape, Haelakaru, ara aro haeae lei va ka — a va arave okoare au iapakue ha — kavale denarius haroapo haroapo avakive?

¹⁴ Ave kavale avi elare ita aula. Ara ma aireaki haela ave la kavale hovea hovea aiarakilai.

¹⁵ Ara havahu ve eharu arave ikivere leiki veveke va ka ha? Ave ovohae heaha la, ehovea arave mai veveke leivila?

¹⁶ Laria, aireaki haela oropaki leikilai, oropaki haela aireaki leikilai. Ehovea oaria itavavahaeape, oaria ikivere au leila.

Hao aea Iesu areve aireaki apaki oharo kileape

¹⁷ Iesu Jerusalem pekape. Are okiharo ve kilea haela 12 muruhari mari maeaeape,

¹⁸ Iapaila, elaviila Jerusalem pekahavaro. Leia ere haela ve Akore oharo haela i hohoa haealula haela hihila epai avarakilai, ere arero heheavi harilai.

¹⁹ Ere arero ita lahua haela avarakilai — la haela arero ihape leikilai, haru harilai, satauro akea ve hahai harilai, are va hare ilehoila le uroukilai.

Kilea haela Basileia meahaiapo hovea kelavape

²⁰ Zebedee ve akoremari ve lou i mekehaku ila Iesu kai iki arero morapai eharu ae v'ila velavela leipe.

²¹ Are arero maeape, A va ikivere le ha? Are kavale maeape, A oharo maeaki arave akoremari orahokaila ave basileia ureve — ae va ave ore ukai ae va ave keva ukai avakive.

²² Iesu kavale maeape, Eve apevelavela la eharu e haveva. E va ara larikilai la hekako e leia la larilai ha? Ere arero maeape, Ela va heroe, hovea.

²³ Are erealilara maeaeape, O iele, ealila arave la hekako larilai, aka arave ore ukai kai keva ukai avaki — la va ara avaraki eharu va ka; arave Oa iki overa kekelape la haela are avarakilai.

²⁴ Kilea haela aea ma oharo iapai ere la akoremari orahokaila hihiri eapapo leivahaeape.

Akea mai iele

²⁵ Iesu erero itavavahaeai mari maeaeape, E va ore ita lahua ve haela ere amua elare momorapurura, kai ereve oropa haela elare pelaea leivahaelula.

²⁶ Aka e va laria kalaivahaelue. Eve oropa leikive ikivere la haela, are eve kiva haela hovea leikive.

²⁷ Eve amua hovea leikive ikivere la haela are va eve horova haela hovea leikive.

²⁸ Lahovea, haela ve Akore ekepe ehovea haela arero kiva lei va ka, aka ehovea are haela oaria kiva leikive: kai areve ovokake aiarakive, ehovea haela oaria lei makukurikive.

Ovohae kariri haela orahokaila ve ovohae kohehelaukape

²⁹ Ere va Jericho harepape: haela oaria arero airekai auvahaeape.

³⁰ Iapaila — haela orahokaila oki poe ve avape — erealila areve eke hari iapai ara hai itavape maria, Amua e, David ve Akore, elalilaro ikiheheroe leivahaeaila.

³¹ Haela oaria erealilaro aihukamaeape — erealila oharo va arekaea: aka erealila ara oaria hape maria, Amua e, David ve Akore, elalilaro ikiheheroe ra leivahaeaila.

³² Iesu epavi erealilara itavape kai mari ape, Ara va ealilara learia leikilai ha?

³³ Erealila arero maeape, Amua e, elalilave ovohae lai kohehelaukakive.

³⁴ Laelave Iesu erealilara ikiheheroe leivahaeape. Are erealilave ovohae mai koharape: erealila ve ovohae le kohehelaukape, erealila arero airekai le auvahaeape.