Matthew 2 - Pupu Oharo Āre 1963 Genese 1970 Rute 1972

Ikiore haela ve hari

¹ Iesu Bethleham Judea ve epape la hoa, Herod amua hoa ve, ikiore haela kauri ukai ve Jerusalem ekevahaeape: ere mari avahaeape,

² Jew haela ve amua lahoa la epaila? Ela areve kou kauri ukaki eavape: ela iki areve oropa ve ekaopakive.

³ Herod amua la oharo iapai ikihorahora le leipe, Jerusalem haela oaria kara.

⁴ Are oharo haela, i hohoa haealula haela ila korukaiavahaeai erero apevelavela leipe Keriso la epaila ita lahoa.

⁵ Ere arero kavale oharo maeaeape, Bethlehem Judea hoa ve: ehovea peroveta haela ve oharo mari hape:

⁶ A Bethlehem, Judea hoa ve, A Judah amua oaria ve hekai lei va ka, Ehovea ave ita ve amua eapapo aire kihorerakilai, Are va arave Israel haela oaria ve Amua leikilai.

⁷ Herod ikiore haela muruhari itavavahaeai erero auhohi velavela leipe — kou leahovea hihika leipe.

⁸ Are erero Bethlehem paparaehai erero mari maeaeape, Auila, akore hekai auhohi haoropakive — e arero la eavakilava, iki araro kimaeaki, ara kara ai areve oropa ve ekaopakive.

⁹ Ere amua ve oharo iapai auvahaeape. Iapaki, ere kauri ukaki eavape la kou ereve oropa ve aepai aupe, aiai are akore hekai epape la ita akea vea titavape.

¹⁰ Ere kou eavi ikiveveke eapapo leivahaeape.

¹¹ Ere uvi pekahavi akore hekai areve lou Mary ila eavape, ere areve oropa ve ekaopape: ereve eharu le hapai arero meru leipe, auro, libano, muro ila.

¹² Aualari erero ivahi maeaeape — ere Herod ve ukaki kauvahaealue: ehoveala ere elare ita oki lahua ki auvahaeape.

Egypt vivilape hoa

¹³ Ere auvahaeape la hoa Amua ve aneru Joseph ivahi maeape, Urou, akore hekai lou ila kari ai Egypt auvahaeai leia apeapea e oharo aea iapaki: ehovea Herod akore hekai harive haropavila.

¹⁴ Are urai akore hekai lou ila la kari oropa Egypt le aupe.

¹⁵ Leia aeae Herod apape, ehovea Amua ve peroveta haela ape la oharo iele leikive, Arave akore ara Egypt hoa ve itavape.

Herod Bethlehem akoremari haeape

¹⁶ Herod iapape ikiore haela arero au amuraeape — are hihiri eapapo leipe: are haela paparaehape ehovea Bethlehem hoa akoremari titaeka oaria haeakive, akoremari hitoloa orahoka ve la vilakao, aireaki la vilakao kara, ikiore haela arero kileape la vilakao hovea.

¹⁷ Lahovea Jeremiah peroveta haela ve oharo iele leipe, maria:

¹⁸ Rama karikara ara la iapape, Hivavara oaria, ikihuru eapapo, Rachel areve akoremari v'ila hi ape, Hakakaeaki oharo iapa ka, Ehovea ere oaria karia.

Egypt kihorerape hoa

¹⁹ Herod apape la hoa Amua ve aneru haroapo Joseph Egypt ve ivahi maeaeape, maria,

²⁰ Urou, akore hekai lou ila kari ai Israel auila, ehovea akore hekai harive ikivere leipe la haela le api.

²¹ Are urai akore hekai lou ila Israel kari aupe.

²² Are iapape Archelaus areve oa Herod Judea ita la avape, are leia auki oaoka leipe. Ehoveala are Aualari ve oharo ivahi iapai helari Galilee ukaki hiki aupe.

²³ Are karikara haroapo rare Nazareth pekai le aeape. Ehovea peroveta haela ve overa maeaeape oharo iele leikive, Ere arero Nazarene rare arilai.