Matthew 19 - Pupu Oharo Āre 1963 Genese 1970 Rute 1972

Uva i vila ila haure leiki oharo

¹ Iesu ma oharo oaria kari lei Galilee harepape. Are Judea ve hoa Jordan ukai ve la Judea ita elaupe.

² Haela oaria areve aire auvahaeape — are erero leia lei makukuripe.

³ Pharisee haela kara iki arero amuraeape — ere mari maeape, Haela areve uva naoae haure leikive pupu karia ha?

⁴ Are erero kavale maeaeape, E va au mureaila ha? Meahaiapo avare koai karikipe la haela are mea i avu ila karikipe.

⁵ Are mari maeape, Ehovea ma — haela areve oa i lou ila haitapai areve uva hiki koarai aeakilai: ere va ari orahokaila aivau haroapo hiki.

⁶ Laelave erealila orahokaila va ka, aivau haroapo hiki. Aualari hahaeape la eharu haela ka helaukarue.

⁷ Ere va arero mari maeape, Ehovealeve Moses haure leiki pepa harive maeape, ae va arero haure leiki kara maeape ha?

⁸ Are erero maeaeape, Ehovea eve iki aheke iele, Moses ero uavila haure leiki oki avarape, aka avare koare hoa are laria ka.

⁹ Ara kai ero maeaeaive — areve uva haure leiki la haela (la uamari airi pavora au leila) are uva ae ra laeakilava, are airi pavora leive: haure leipe la uamari laeaki la haela, are kara airi maea leive.

¹⁰ Areve kilea haela arero maeape, Haela areve uva pupu mari ra leikilava, veveke are uva laea va arekaea.

¹¹ Are erero kavale maeaeape, Ma oharo haela oaria iapaki hovea ka, uku haela hiki.

¹² Uku haela lou ra ve eharau ureve eunauka hovea erape, uku haela eunauka ehovea haela erero mari leivahaeape, uku haela le apearo, eunauka hovea leivahaeape, ehovea kaia ve basileia ve rare ve. Ma oharo iapaki hovea la haela, iapaila.

Iesu akoremari titaeka lei momorapupe

¹³ Ere va akoremari titaeka areve oki kari ekevahaeape, ehovea are erero mai papaehai ivaiva leikive. Kilea haela erero oropai maeaeape.

¹⁴ Aka Iesu maeaeape, Akoremari titaeka aikahukamaeailue ere va arave oki ka eke, ehovea ere va kaia ve basileia ve eharu veveke.

¹⁵ Are erero mai kohari haitapai ita lahua aupe.

Erohoho haela ovokake iele haropape

¹⁶ Iapaila, haela ae iki arero mari maeape, Haelapo veveke e, ara le horova veveke ra leikilai, ehovea ovokake haiapo avakive?

¹⁷ Are arero maeape, Ipi leve a araro veveke rare laila ha? Haela oaria veveke ka, haroapo iele, Aualari hiki. A va ovokake haiapo ikivere ra leikilava, pupu ra kiva leila.

¹⁸ Are arero maeape, Lela pupu ha? Iesu mari ape, A haela va kahaealue, Airi pavora va kalailue, Korea kalailue, opoepoe kahukavalue,

¹⁹ oa i lou momorapuki kai a i apealula haela ikiheheroe leiki.

²⁰ La harokou arero maeape, Ma pupu oaria ara va kiva leipe, arave are hoa aiai mahau. Ara ve le eharu aea karia ha?

²¹ Iesu arero maeape, A mekakure ikivere ra leikilava, aula, ave eharu oaria ilaea leivahaeai merava haela aiaraki, a erohoho eharu va oaria, kaia akea ve aeakilai, araro airekai ekela.

²² Harokou ma oharo iapai ikihairihairi lei aupe ehovea are va erohoho oaria ila.

Erohoho ve heraho

²³ Iesu helari kilea haela maeaeape, O iele ara ero maeaeaive — Erohoho oaria ila la haela kaia ve basileia ure ve araeaki va heraho iele.

²⁴ Ae va ara ero maeaeaive, Kamela karahe ve ura ve ukaki ai horerakilai va heraho perehekai, aka erohoho oaria ila la haela Aualari ve basileia ure la araeakilava, heraho eapapo iele.

²⁵ Areve kilea haela la oharo iapai ikihorahora eapapo leivahaeape kai mari maeape, Ehoveala, ovokake leita avakilai ha?

²⁶ Iesu erero ovohae eavi mari maeaeape, Haela oaria ore va ka, Aualari eharu oaria aupoverai.

²⁷ Peter arero kavale maeape, Iapaki, ela va eharu oaria haitapai aro airekai auvahaeape — laelave ela va le kavale aeakilai ha?

²⁸ Iesu arero maeape, O iele, ara ero maeaeaive, E araro airekai ekevahaeape haela, basileia are horeraki la hoa, haela ve Akore areve morapaeaki haha akea ve haiavaki la hoa, e kara terona 12 akea ve avakilai, kai Israel ve hiru 12 heheavakilai.

²⁹ Uvi aka apoheari aka maritaloa, aka oa, aka lou, aka uva, aka akoremari, aka elare ita ipi haitapape la haela oaria, ehovea arave harihari, hoa 100 hovea erereapakilai, kai ovokake lari hiki apeakilai.

³⁰ Aka, oropaki haela oaria ere va aireaki leivahaeakilai, aireaki la haeala ere oropaki leivahaeakilai.