Matthew 17 - Pupu Oharo Āre 1963 Genese 1970 Rute 1972

Iesu ve maea koelaripe

¹ Hare aukava ila karia leilai, Iesu Peter i James i areve akoreheari John ila kela heaikiapo kari pekape.

² Areve maea ereve oropa ve lahua koelaripe, kai areve oropape hare hovea heauapape, areve pura hauhuka leipe, ovava hovea.

³ Iapaila: Moses Elias ila ereve oropa ve hihi leivahaeape, erealila Iesu i hareho oharo hukavape.

⁴ Peter Iesu kavale mari maeape, Amua, veveke, ela maia lakivikavahavaila; ave ikivere ra leikilava, ela maia kovo uvi irehoila kukueakilai, aeva ave, aeva Moses ve, aeva Elias ve.

⁵ Are oharo ape leia, meuru ovava ila erero aerape. Iapaila meuru ureve ara hape maria, Maia va ara iki akore, ara arero ikivere havahu. E areve oharo ra iapai.

⁶ Areve kilea haela la oharo iapape kai oropape ekakaopape kai oaoka leivahaeape.

⁷ Iesu erero kai iki mai papaehaupe, kai mari maeaeape, Urahukaila, oaoka kalaivahaelue.

⁸ Ere ovohae iupevahaeape la hoa, ere haela aeva au eavaila, Iesu hiki.

⁹ Ere kela ve ra kihoahukape hoa Iesu erero ahilavahaeape maria, E laeavila la eharu haela kamaealue — aiai haela ve Akore api kai uroukilai.

¹⁰ Areve kilea haela arero velavela leipe maria, Ipileve hohoa haealula haela maria arula, Elias oropa kihorerakilai ha?

¹¹ Iesu erero kavale maeaeape, Iele Elias oropa kihorerakilai, eharu oaria veveke leikive.

¹² Ara ero maeaeaive — Elias overa kihorerape, aka ere arero ore au leila, ereve ikivere arero lari mai leipe. Lahovea kara haela ve Akore ere kakare avarakilai.

¹³ La hoa kilea haela ore leipe are erero John Baptist rare oharo maeape.

Haiaru hekeheke arape akore

¹⁴ Ere va haela oaria ve leia kihoahukape la hoa haela ae iki areve oropa ve ekaopi mari maeape,

¹⁵ Amua e, arave akore ikiheroe hela leila, ehovea are haiaru hekeheke arape, heraho eapapo iele, mehae mehae are a ve hiki oauvila, mehae mehae ma ve hareauvila.

¹⁶ Ara arero ave kilea haela kai leia lai ekepe, aka ere arero lei makuri va haveva.

¹⁷ Iesu erero kavale maeaeape, Iapaki aue, iki haeae vilakao e! Ara e i hareho aeavila hare va leavaila ha? Ara va ero heraho leivila hare leavaila ha? Arero maia lai ekerurava.

¹⁸ Iesu ovehahu aihukamaeape — are arero harepape. La hoa havahu akore veveke le leipe.

¹⁹ Iesu ve kilea haela muruhari Iesu kai ekevahaeai arero mari maeape, Ipi leve elave aheke ovehahu avakakive hovea au leila ha?

²⁰ Iesu erero mari maeaeape, Ehovea eve ikikekela hekai iele. Ehovea, o iele, ara ero maeaeaive, Eve ikikekela mustard hae haroapo hovea ra leikilava — e va ma kela ra maeakilai, Lale ita apehai aula, kai are aukilai. Horova oaria eve aheke hoveahovea leikilai. E va eharu ae va aupovearaila.

²¹ Lae vi va, ovehahu mahovea, ivaiva ere aheke ila hiki avakakive hovea.

Iesu areve aireaki apaki maea aeka kileape

²² Ere va Galilee apearoape la hoa Iesu erero maeaeape, Haela ve Akore haela ve mai ve aireaki hihila maepaila.

²³ Ere arero harilai kai hare irehoila are kai le uroukilai.

Hehe Uvi ve tax kavale leipe

²⁴ Ere va Capernaum pekahavape la hoa — tax aeape la haela Peter kai ekevehaeai mari maeape, Ave haelapo tax kavale leivila ha?

²⁵ Are kavale maeape, Kaire. Are uvi pekape la hoa Iesu overa maeape maria, Ave iki leari kekelave ha? Leita haela amua oaria ve tax kavale leilula ha, ereve akoremari havahu ha, aka haela lahua ve ha?

²⁶ Peter arero maeape, Haela lahua ve. Iesu arero maeape, Laelave akoremari oaria tax kavale lei va ka.

²⁷ Lae vi va — ela erero lei hihiri leivahaeaki ave — a ma haru poe ve hoauki kivai ra paraea — a oropa koheravaki la ekaka kaivi areve ape ra hapai, a ureve shilling haroapo leia koarakilai, erero ra aiaraki, elavaila ve rare ve.