Matthew 15 - Pupu Oharo Āre 1963 Genese 1970 Rute 1972

Iesu vilali ve pupu haure leipe ve oharo iele

¹ Jerusalem hohoa haealula haela Pharisee haela ila Iesu ve leia ekevehaeai mari maeape:

² Ipileve ave kilea haela uvari vilari ve pupu hahaure leilula ha? Ehovea eapai larive hoa ere oropa mai ma huhelavahaea va ka.

³ Are erero kavale mari maeaeape, Ipileve e kara Aualari ve pupu eve overa oharo kekelaki mai ve hararualula ha?

⁴ Ehovea Aualari ve pupu maria ape, Oalou momorapuki — oalou o heaha maeaki la haela, veveke, arero huru havahu hari.

⁵ Kahara, e va mari maealula. Haela ae oa i lou ila maria la maeakilava — Ara meru, ma arave oki ve veveke leiki eharu ma:

⁶ La haela, ehoveala, oalou ila momorapaeaki aue la leikilava, are haeae lei va ka. Laelave e va Aualari ve pupu eve overa oharo kekelaki mai ve naoae naoae leipe.

⁷ Opore haela e, Isaiah peroveta haela oharo e v'ila iele havahu maeaeape

⁸ maria: Ma vilakao ve ape araro morapaealula, ereve ape iilu kara, Aka ereve iki oaria ita lahua vea.

⁹ Ere araro morapaealula, iele karia, Ere va haela ve mai hiki kilealula.

¹⁰ Are haela oaria itavavahaeape, erero mari maeaeape, Iapaila, kai auhohi iapai.

¹¹ Ape larilai la eharu haela hararua va ka, aka ape ve kihoreraki la eharu iele hararuakilai.

¹² Areve kilea haela la hoa arero kai iki mari maeape, Pharisee haela aro hihiri ehovea a lamaeaila la oharo.

¹³ Kahara, are kavale maeaeape, Arave kaia ve Oa apoporaukue la kora mere oaria are hareakilai.

¹⁴ Ere va apea. Ere ovohae kariri haela kari auvahaeaki ovohae kariri haela. Ovohae kariri haela ovohae kariri kake ra lai aukilava, erealila hareho karu ve le hohoakilai.

¹⁵ Peter arero kavale maeape, Ma parabole elaro hihika kileavahae.

¹⁶ Iesu maeaeape, E kara aiai ma hoa auhohi iapa va ka ha?

¹⁷ E va iki kekela va ka ha? Ape lari la eharu eharau ureve ra hoaukilai, kai e le heavakilai.

¹⁸ Kahara, ape ve kihoreavaki la eharu oaria ere va iki ure ve kihoreavalula, leia va haela hararualula.

¹⁹ Ehovea iki ureve kihoreavalula — leia va — ikikekela haeae, haela haea mai, airi pavora mai, mai heahaha oaria, korea mai, opore heheavalula mai, Aualari ve rare o heaha arura mai.

²⁰ La oaria hareho haela hararualula, aka mai hirihiri ila eapai laralula mai, leia va haela hararua va ka.

Ita lahua mari lei makuripe

²¹ La hoa Iesu leia harepai, Tyre, Sidon ila ve ukaki elaupe.

²² Iapaki: Canaan ve uamari la ukai ve kihorerape kai arero ara hai mari itavape, Amua e, David ve akore, araro ikiheroe leila: arave mari ovehahu arape.

²³ Kahara are arero kavale au maeaila. Areve kilea haela arero here leipe maria, Mavaila are k'aula, ehovea are elaro leve itavaro.

²⁴ Are kavale mari maeaeape, Araro kiparaeape iele ehovea Israel haela ve titavape mamoe hiki.

²⁵ Are areve oropa ve ekaopi mari maeape, Amua e, araro hukapa.

²⁶ Are arero kavale maeape, Veveke va ka akoremari ve eapai kaivi avita la aiarakive.

²⁷ Are maeape, Iele havahu, Amua, aka avita ereve oalou la ve eapai pipiki laralula.

²⁸ La hoa are arero kavale maeape, Uamari e, ave ikikekela va eapapo. A ve ikivere hovea, lahovea leikilai. La hoa havahu areve mari veveke le leipe.

Haela oaria lei makukuripe

²⁹ Iesu leia harepai Galilee ma haru maeamaea ve aupe: are kela pekai leia le avape.

³⁰ Haela oaria arero kai ekevahaeape — loa heahaha haela, ovohae kariri haela, o haveva haela, maea hohara haela lahua lahua oaria kara ere areve oropa ve kari ekevahaeape: Are erero lei makukuripe.

³¹ O haveva haela oharo le ape, maea hoharai haela maea veveke leivahaeape, loa heahaha la haela loa ehohoe leivahaeape, ovohae kariri haela ovohae le eavape. Laelave haela oaria ikihorahora leivahaeai, Israel ve Aualari morapaeape.

4,000 haela eapai aiarape

³² Iesu areve kilea haela itavavahaeape kai erero mari maeape, Ara ma haela oaria ikihuru havahu ehovea ere ara i lapeairava hare irehoila, eapai ve ka, ara erero va ereka va paparaeha va ka, ere okiharo aitara areauki ave.

³³ Kilea haela arero maeape, Ela va ma ita merava eapai lahoaki avi ma haela eharau huharakive ha?

³⁴ Iesu erero maeaeape, Eve leia pai leavaila ha? Ere mari avahaeape, 7, ae va ekaka titaeka perehekai.

³⁵ Are haela oaria maeaeape ere au avakive.

³⁶ Are pai 7 ekaka ila kailai, thank you oharo ape kai haivavaelai kilea haela aiarape; ere haela oaria aiarape.

³⁷ Ere oaria lalavahaeai eharau huharavahaeape. Ere va eapai hohoi kaili hara 7 heheloekoavape.

³⁸ La eapai lalavahaeape haela va 4,000, uavila i akoremari ila kepea kara.

³⁹ Are haela oaria elare ita paparaehape kai vevaea horeai Magdala ukai elaupe.