Matthew 14 - Pupu Oharo Āre 1963 Genese 1970 Rute 1972

John Baptist apape hari

¹ La hoa Herod amua haela Iesu ve hari veveke iapape:

² Are areve uvi haela mari maeaeape, Ma va John Baptist la, are api kai uroupe haela la, laelave horova aheke oaria are ve hihika leilula.

³ Ehovea Herod John mai pae hahai uvi muru le aipepe, ehovea areve apoheari Philip ve uva Herodias v'ila.

⁴ Ehovea John arero maeape, A arero laeakive pupu ila.

⁵ Are va ikivere leipe arero harive la hoa are haela oaria oaoka leipe, ehovea ere arero peroveta hovea kelavape.

⁶ Ere Herod ve epape hare hurai leipe la hoa Herodias ve mari Herod oropa ve mahea harape, kai Herod ikiveveke leipe.

⁷ Ehoveala are okoare o heaha ila maeape, are velavela leiki la eharu avara hiki.

⁸ Are lou ve oharo overa iapape, laelave are maria maeape, John Baptist ve haro haita aivaopi avikiaraki.

⁹ Amua ikihuru leipe, aka haroapo ehovea areve okoare overa, ae va are ila hareho eapai avai lalavahaeape la haela, are la eharu arero avarakive maeape.

¹⁰ Are haela paraea uvi muru ureve John ve haro haerapape.

¹¹ Ere areve haro haita ve aivaopi aviki la mari le avarape. Are areve lou la avarape.

¹² Areve kilea haela ekevahaeape, kai areve maea kaivi koru le ihape. Ere hoahuka ma oharo Iesu la maeape.

5,000 haela eapai aiarape

¹³ Iesu la oharo iapai vevaea horeai la ita le harepape, kai ita merava le pekape. Haela oaria laria iapape ere karikara harepai areve loa huru kai auvahaeape.

¹⁴ Iesu mea hoai haela lakea eavape. Are erero ikiheheroe eapapo leivahaeape. Are ereve maea heahaha haela oaria lei makukuripe.

¹⁵ Hailaea, mea murumuru leipe hoa, areve kilea haela arero kai iki maria maeape, Maia ita hauaka, hare karia leilai, ma haela paparaehai ere k'aula karikara lahua lahua elare eapai ilaea leikive.

¹⁶ Iesu erero mari maeaeape, Ere auvahaea va ka — e havahu ve oki erero eapai here aiaraki.

¹⁷ Ere arero kavale maeape, Ela va maia pai hue ila, ekaka orahokaila hiki.

¹⁸ Are maeaeape, Hoa aikeila.

¹⁹ Are haela oaria hohe akea ve avavahaeakive maeaeape: Are pai hue ila ekaka orahokaila ila kaili, ovohae kaia ve iupe, ivaiva lei pai haivavaela kilea haela ra aiarape. Kilea haela la haela oaria la aiarape.

²⁰ Ere oaria lalavahaeape, eharau le mohoavape. Ere eapai hohoe hara 12 ila heheloekoavi kaili auvahaeape.

²¹ Eapai lalavahaeape haela 5,000, uavila i akoremari ila kepea kara.

Iesu ahea ma akea ve loa veavelaripe

²² La hoa Iesu kilea haela vevaea horeaki ve maeaeape, ukai oropa elahukakive, are ve aire: are lahua haela oaria elare ita paparaehape.

²³ Are haela oaria oropa paparaehai aire are lahua ivaiva arive kela pekape. Hailaea, mea murumuru i are lahua aeape.

²⁴ Vevaea la hoa ma hihi ve murai veape, marukaumarukau avelaripe, ehovea mea heaha.

²⁵ Oroa hoa, mea opa ka, Iesu erero kai horerape, ma akea ve.

²⁶ Kilea haela arero ma akea ve veavila eavape iki ihahai maria maeape: Maia haelaharihu la. Ere oaoka lei āra hape.

²⁷ Iesu erero elavelave maeaeape, Ikiveveke leila, ara mae: Oaoka kalaivahaelue.

²⁸ Peter arero kavale mari maeape, Amua e, a iele la leikilava, araro kimaeaki, ara kara ma akea aro kai aukive.

²⁹ Are va arero maeape, Kihoau! Peter vevaea ve hoai ma akea ve Iesu kai aupe.

³⁰ Are mea eapapo ra kekelape la hoa are oaoka lei ma ihauki maia iele: Are āra hape maria, Amua, iki araro hukapaki.

³¹ Iesu elavelave mai horavai paeape kai mari maeape, Ave ikikekela hekai iele: A va ikihorahora ehovealeve?

³² Ere vevaea horeape la hoa mea le haerapape.

³³ Vevaea ureve haela iki areve rare morapaeape maria, O iele havahu, A Aualari ve Akore havahu.

³⁴ Ere ukai elahuka Genesaret ita pekahavape.

³⁵ La ita haela areve ekeki hari iapape la hoa ere karikara lahua lahua oaria oharo paraeai maea heahaha haela oaria arero kai kari ekekive.

³⁶ Ere arero here leipe, ere areve pura kao hiki paeakive. Paeape la haela oaria maea mekaka leivahaeape.