Matthew 13 - Pupu Oharo Āre 1963 Genese 1970 Rute 1972

Wheat hae puravai velaripe haela ve parabole

¹ La hare havahu Iesu uvi harepai miri horelai haiavape.

² Haela oaria areve oropa ve korukaiape: ehoveala are vevaea horeai haiavape. Haela oaria ma kao le epavahaeape.

³ Are erero eharu oaria parabole maeaeape maria, Iapaila: wheat hae puravai velariki haela are wheat hae puravaivelaripe.

⁴ Are puravai velaripe la hoa hae uku oki poe ve hohoape, ori kihoahukai le lalavahaeape.

⁵ Uku have ita hohoape, la ita kekere heheroro, ere elavelave kororo horeavape, ehovea kekere heheroro.

⁶ Hare ahea pekape hoa ereve kororo le haroropape: ehovea ereve elele karia, ere va elavelave oae kari leivahaeape.

⁷ Hae uku kora mamareke aru ve hohoape, la kora mamareke aheai erero le havuopape.

⁸ Kahara, hae uku kekere veveke ve hohoape, iele huhoreavape, uku 100, hovea, uku 60, uku 30.

⁹ Avako ipi haela are auhohi iapakilai.

Parabole kileaki okiharo

¹⁰ Kilea haela arero kai iki mari maeape, Ehovealeve a erero parabole oharo hiki maeaevila ha?

¹¹ Are erero kavale maeaeape, Ehovea kaia ve basileia ve muruhari eharu e va ore leiki oki le avape, kahara, ere oaria aea va ka.

¹² Eharu ila la haela, eharu arero aeka aiarakilai, are maeakoko aeakilai, eharu karia la haela are va overa aeape la eharu aire le titavakilai.

¹³ Ara erero parabole oharo hiki maeaevila, iele la, ehovea ereve eavalula hoa, ere auhohi eava va ka, aka iapailula hoa ere auhohi iapa va ka.

¹⁴ Peroveta haela Isaiah ve oharo ere v'ila rareape, maria: E va iapailula hoa e va auhohi iapa va ka, Kai cavalula hoa e va auhohi eava va ka.

¹⁵ Ehovea ma vilakao ve iki aheke iele, Ereve avako ipi hahuru iele, Ereve ovohae le apukilavape, Ere hare aea eavavahaeaki ave, Oharo iele iapaki ave, Iki helarivahaeaki ave, Ara erero le makukuriki ave.

¹⁶ Kahara, e va ovohae ve ikiveveke leiro, ehovea ovohae auhohi eavalula, avako kara, ehovea oharo mekari iapailula.

¹⁷ O iele, ara ero maeaeaive — peroveta haela, mai ehoe haela ila oaria iele, e va eavavahaeaki la eharu eavaki ikivere leivahaeape, e va iapavahaeaki la eharu ere iapaki ikivere leivahaeape, aka au iapaila.

Wheat hae puravai velaripe parabole ve iele

¹⁸ Ehoveala, e va puravai velariki haela ve hari oharo iapaila:

¹⁹ Haela ae basileia ve oharo ra iapakilava, aka mekari iapa va ka: Haelaharihu la hoa iki areve iki ure ve puravai velaripe la oharo korea aeakive — ma haela oki poe ve hae kailape hovea.

²⁰ Have ita hae kailape la haela are va mahovea — haela oharo la iapakilava kai ikiveveke ila iapakilava.

²¹ Aka, are havahu elele iele karia, hare haroapoharoapo hiki aheke aeavila, aireaki heraho leiki la hoa, aka hararuaki la hoa, ehovea oharo, are haiapo ka le hilaukilai.

²² Kora mamareke aru ve hae kailape la haela, are kara lahovea: Oharo la iapakilava, kai ma meahaiapo ve heraho, erohoho ve hehepo oaria, la oharo veveke le havuapakilai, are va aireaki iele karia.

²³ Kekere veveke hae kailape la haela, are va oharo auhohi iapaki haela hovea. Are va iele huhoreavaki hoa, iele oaria, aeva 100, aeva 60, aeva 30.

Hae merava ve parabole

²⁴ Are parabole ae erero mari maeaeape, Kaia ve basileia maria haela ae hae mekaka areve wheat oru ve apoporaupe.

²⁵ Haela ve avuku hoa, areve iri haela kihoai hae merava areve wheat ve apoporai le vivilape.

²⁶ Kororo le horeavi aheai hae le kape la hoa eharu merava kara hihika leivahaeape.

²⁷ La uvi haela ve horova haela arero kai iki mari maeape, A hae veveke hiki ave oru ve au apoporaila ha? Ma eharu merava learia le horeavape ha?

²⁸ Are erero maeaeape, Ma va iri haela ve horova. Horova haela arero velavela leipe, A va ikivere ela eharu merava mave ikaeakive ha?

²⁹ Aka are erero maeaeape, Arekaea — e va merava eharu ikaeaki hoa wheat hae la hoa haroapo ikaeaki ave.

³⁰ Ere va oaria hareho aheaukilai aiai ikaeaki hoa: ikaeaki hoa ara va ikaeaki haela maeaeakilai, Oropa eharu merava ikaea hahauka hahai a aroukive — wheat hae arave uvi ve korukaiakive.

Mustard hae ve parabole. Bread ve muramura oharo kara

³¹ Are erero parabole aeka mari maeaeape, Kaia ve basileia mustard hae hovea — haela la hae kaivi oru ve aporakilai:

³² La hae hekai iele — kahara, are ra ahakilava, oru ve hae oaria titaeka hiki, are lahua eapapo iele — kora hovea, laelave ori oaria areve mamaeako ve loro aeakilai.

³³ Areve parabole aeka ma, Kaia ve basileia yeast ve muramura hovea. Uamari flour haita ilehoila la muramura ra lamukikilava, yeast le vovohoakilai.

³⁴ Ma oharo oaria Iesu haela oaria parabole oharo hiki maeaeape, are va naoae oharo au maeaila.

³⁵ Ehovea peroveta haela ve oharo iele leikilai maria: Ara parabole oharo ape la hakilai, Meahaiapo karikipe hoa aiai ma hoa muruhari apeapea la eharu oaria ara hihika hukavakilai.

Hae merava ve iele

³⁶ La hoa Iesu la haela oaria le paparaehape, kai uvi le pekape. Areve kilea haela iki arero velavela mari leivahaeape, Ma oru ve hae merava ve iele elaro hihika kileakive.

³⁷ Are erero kavale maeaeape, Hae veveke puravai velariki haela are haela ve Akore lae:

³⁸ oru va meahaiapo lae: hae veveke va basileia ve akoremari lae; eharu merava — haelaharihu ve akoremari lae:

³⁹ Erero puravai velaripe iri haela va diabolo la; ikaeaki hoa va meahaiapo karia leiki la hoa. Ikaeaki haela va aneru la:

⁴⁰ Hoveahovea ere hae merava korukaia a aroukilai — meahaiapo kari leiki hoa kara lahovea.

⁴¹ Haela ve Akore areve aneru kipaparaehakilai, ere va areve basileia ve eharu heaha kai heaha leilula la eharu kara ra korukaiakilai.

⁴² Ere erero a kemo ureve a le aroukilai — ere va hivavara eapapo, kao heheavahaeakilai kara.

⁴³ Mai ehoe haela la hoa ereve Oa ve basileia ureve hare ve ovava hovea leivahaeakilai. Avako ipi haela, auhohi iapaila.

Erohoho eharu, aitave hae, i keve ila ve parabole

⁴⁴ Aeka, kaia ve basileia oru ve kaivape erohoho hovea. Haela la erohoho ra koarakilava, are aeka avarapakilai, ikiveveke ila hoai areve eharu oaria ilaea le leikilai, la kavale are oru ilaea leikilai.

⁴⁵ Aeka kaia ve basileia aitave hae haropavila haela hovea:

⁴⁶ Are aitave hae mekakure la eavakilava, areve eharu oaria ilaea lei la kavale aitave hae ilaea le leikilai.

⁴⁷ Aeka, kaia ve basileia ahea ma ve paraeape ekaka lahualahua oaria mapape keve hovea.

⁴⁸ Are ra heloekoakilava, ere poe ve hakeavi avipekakilai, kai eharu veveke keve ikipi korukaiakilai, eharu heaha ere va aikilapakilai.

⁴⁹ Meahaiapo kari leiki hoa lahovea leikilai. Aneru oaria kihoahukakilai, haela heahaha haela mekaka ila au habureakilai.

⁵⁰ Erero kemo ureve a aroukilai, ere va hivavara eapapo kai kao heheavahaeakilai.

⁵¹ Iesu erero velavela leipe maria, E va ma oharo auhohi ka kelavaro ha? Ere kavale maeape, E, Amua e.

⁵² Are erero la hoa maeaeape, Ehoveala — kaia ve basileia oharo oaria ore leilula la hohoa haealula haela oaria ere va uvi haela haroapo hovea: la uvi haela areve eharu are kai overa eharu kara areve aroate ve oaeakilai.

Nazareth haela Iesu haure leipe

⁵³ Iapaila: Iesu ma parabole oharo kari leipe hoa are la ita harepape.

⁵⁴ Are ve elare ita kihoai ereve synagogue ureve oharo kileape, laelave ere va ikihorahora eapapo leivahaeape, kai mari maeape, Ma haela ve ikiore, horova aheke oaria ila leari la aeape?

⁵⁵ Maia evera haela ve akore ra ka ha? Areve lou ve rare Mary la ka ha? Areve malaita, James i Joses, i Simon i Judas ila ka ha? Laelave ma haela ve ikiore oaria learia le aeape ha?

⁵⁶ Areve maritaloa kara ere va hareho maia apea va ka ha? Laelave ma haela ve ikiore oaria learia le aeape ha?

⁵⁷ Ere va arero hihiri leivahaeape. Kahara, Iesu erero mari maeaeape, Peroveta haela ve morapaeaki oharo are havahu ve ita are havahu ve uvi ve hiki karia.

⁵⁸ Leia are horova veveke oaria au leila, ehovea ereve ikikekelaki aue mai.