Matthew 12 - Pupu Oharo Āre 1963 Genese 1970 Rute 1972

Sabati kiva leiki mai

¹ Sabati hare aeva Iesu wheat oru ure araeape: areve kilea haela eroa hai la wheat hae ikaeai lalavahaeape.

² Pharisee haela erero eavape la hoa ere arero mari maeape, Iapaki, ave kilea haela sabati hare ve pupu hararuaro.

³ Are erero kavale maeaeape, E va David leipe la mai au mureaila ha? are eroahape la hoa, are kake haela ila?

⁴ Are Aualari ve uvi pekape, leia Aualari avarape la pai lape, la pai ehovea are areve kake haela ila pupu ila, oharo haela hiki laralula la pai.

⁵ E va pupu buka ma oharo au mureaila ha? Sabati hare oharo haela Hehe Uvi hararualula, haeae va ka;

⁶ Ara ero maeaeaive — Ma ita Hehe Uvi akea ve haela me aeave.

⁷ E va ma oharo ve iele ore overa la leikilava: Ara va ikiheroe mai ikivere, ara va maea morava mai ikivere va ka: e va haeae karia la haela o heaha au eila.

⁸ Haela ve Akore kara, sabati hare ve Amua.

Horo au hareavape haela

⁹ Are leia harepai synagogue pekape.

¹⁰ Iapaila, leia horo au hareavape haela haroapo epavape — Ere Iesu apevelavela leipe maria: Lehae ha? Sabati hare maea heaha veveke leiki, pupu karia ha? Ehovea ere ikivere arero oropai maeakive.

¹¹ Are erero kavale maeaeape, Eve haela haroapo aeva leita ha, areve mamoe haroapo sabati hare koru ve ra oaukilava, are arero paeai hareava va ka ha?

¹² Haela mamoe hovea va ka ha? Laelave, sabati hare, mai veveke leikive, heroe, pupu karia.

¹³ Are la haela maeape, Ave mai horapa — are mai horapape, la mai veveke le leipe, mai ukai hoveahovea.

Pharisee haela Iesu harive oki haropape

¹⁴ La hoa Pharisee haela hoahukai arero harive oharo hukavape.

¹⁵ Iesu la oharo ore lei la ita le harepape — haela oaria arero airekai auvahaeape, are erero oaria lei makukuripe.

¹⁶ Are oharo mari maeaeape — areve rare hihi kailue.

¹⁷ Ehovea peroveta haela Isaiah maeaeape la oharo iele leikive, maria:

¹⁸ Iapaila, ara va ikivere leipe horova haela, Arave ikivere iele leivila haela ma, Arave ove ara arero avarakilai, Are heheavaki mai veveke ita lahua haela amoeakilai.

¹⁹ Are hahari lei va ka, hi kara e va ka, Areve āra kara haela karikara hihi ve iapa va ka.

²⁰ Are hirivo haihaharoa haika va ka; A hari are huhurapa va ka, Aiai are heheavaki oharo paraeai areve iri haela le heaorapakive.

²¹ Ita lahua haela areve rare ikikekelakilai.

Iesu Satani arero koarape la opore oharo ve kavale

²² Ere ovehahu ila, ovohae kariri, ikihaveva ila haela ae areve leia lai ekepe. Are arero lei makuripe, lai vi va ovohae kariri ikihaveva ila la haela ovohae kohelaukai oharo auhohi le ape.

²³ Haela oaria ikihorahora eapapo leivahaeape kai mari avahaeape, Maia David ve meavore ka ha?

²⁴ Pharisee haela la oharo iapai mari maeaeape, Ma hilavila ovehahu haruapavila, ehovea Beelzebub ovehahu ve amua ve aheke.

²⁵ Iesu ereve iki kelava ore lei erero mari maeaeape, Elarelare hahari leivila la basileia are va heaha leikilai — kai elarelare leivila la karikara aka uvi, are lahua epava va ka.

²⁶ Satan kai Satan havahu ra avakakilava, are elare hahari hiki leivila, ehoveala, areve basileia leari le epavakilai ha?

²⁷ Ara va Beelzebub ve aheke ve ovehahu ra haruapakilava, eve akoremari ehovea leita ve aheke ve ovehahu haruapalula ha? Laelave ere ero heheavakilai.

²⁸ Ara Aualari ve Ove ve ovehahu ra haruapakilava, Aualari ve basileia eve ita ve kihorerave.

²⁹ Haela aheke ve uvi pekaki areve eharu korea kaivaki ikivere la haela, are oropa la haela aheke mai hahakilai, aire areve uvi eharu korea aeakilai.

³⁰ Araro koaraki aue la haela are va ara i iri haela: Ara ila hareho aeaki aue la haela, are va noaenoae havoavi veakilai.

³¹ Ehoveala ara ero maeaeaive, mai haeae oaria, oharo heaha oaria ila haela ve le hapururukakilai. Ove Veveke ve avahaeaeaki la oharo heaha aireaki hapururuka va ka.

³² Haela ve Akore ve o heaha maeaeaki la haela ereve la haeae lei hapururukakilai, aka Ove Veveke ve o heaha avahaeaki la haela ereve la haeae ma meahaiapo hoa ve leia hapururuka va ka.

³³ Kora veveke ra leikilava, areve hae kara veveke leikilai, aka e va kora ra hararuakilava, areve hae kara heaha leikilai, ehovea haela kora areve hae ve oki ore leikilai.

³⁴ Ekaroa ve akoremari e — ehovea e va haela heaha, e va oharo veveke leari arila ha? Ehovea eve iki heloekoape la oharo eve ape ve kihorerakilai.

³⁵ Haela veveke areve iki ve erohoho eharu veveke aikihorerakilai: Haela heaha areve ikiheaha erohoho ve eharu heaha aikihorerakilai.

³⁶ Kahara: ara ero maeaeaive, Haela ve noaenoae oharo oaria aireaki heheavaki hoa ere kavale le leikilai.

³⁷ Ehovea eve oharo ero lei makukurikilai, aka eve oharo ero lei heaha leikilai.

Are ihova avara va ka

³⁸ La hoa uku pupu haealula haela Pharisee haela ila kavale mari maeape, Haelapo, ela va ikivere a ihova haroapo elave oropa ve leikive.

³⁹ Are erero maeaeape, Ma vilakao heaha airi pavora leilula vilakao, ihova au haroparo, ere va ihova aea va ka, peroveta haela Jonas la ihova hiki.

⁴⁰ Hoveahovea Jonas hare 3 oroa 3 hevehe ve eharau ureve aeape, lahovea haela ve Akore kara hare 3 oroa 3 mea ureve aeakilai.

⁴¹ Ninevah haela, heheavaki hoa urahukakilai, ma vilakao heheavi heaha kavale leivahaeakilai, ehovea ere Jonas ve iroro ve iki le helarivahaeape — kahara ma hoa Jonas ve akea haela me aeave.

⁴² Diho hoa ve amua uamari heheavaki hare uroukilai, ma vilakao heheavi heaha kavale leikilai, ehovea are apehai ve ekepe Solomon ve ikiore oharo iapakive — kahara, ma hoa Solomon ve akea haela me aeave.

Ikikekela mahuka ve heraho

⁴³ Ovehahu haela ve ureve ra harepakilava, are ita kakarara oaria loa veavelari ikiparaeaki ita haropakive, are koara va ka.

⁴⁴ La hoa areve oharo maria, Ara harepape la uvi ara helari aeka pekakilai. Are horerakilai, kai uvi haua ka, overa hoapai, veveke iele eavakilai.

⁴⁵ Are aukilai ovehahu 7 ila heaha iele karakilai. Ere va hareho la uvi pekahavi apeakilai. La haela ve aireaki hoa heaha havahu iele, oropa hoa hovea ka.

Apavara mai iele

⁴⁶ Are haela oharo kileape la hoa areve lou i malaita ila mahokaea ve epavape, ehovea ere va ikivere arero oharo maeakive.

⁴⁷ Haela ae arero maeape, Iapai, ave lou i apavara ila mahokaea le apearo. Ere va ikivere aro oharo maeakive.

⁴⁸ Are arero oharo maeape la haela kavale maeape, Arave lou leita ha? Arave apavara leita ha?

⁴⁹ Are mai horapai kilea haela oaria mai ove aioeape, kai mari maeape, Iapai — arave lou i apavara ila mae.

⁵⁰ Arave kaia ve Oa ve ikivere horova leilula la haela ere va arave apoheari, arave mariloa, arave lou kara.