Matthew 11 - Pupu Oharo Āre 1963 Genese 1970 Rute 1972

¹ Iesu areve kilea haela 12 kileaki oharo kari leipe la hoa, are leia harepape, karikara oaria iroro avi aupe.

John Baptist

² John uvi muru hoa Keriso ve horova veveke ve hari iapape, are kilea haela uku arero kai paparaehape.

³ Are velavela mari leipe, Ava ekeki rare aroape la haela ha, aka ela va haela aea haropakilai, ha?

⁴ Iesu kavale mari maeape, Auila, e la iapaila kai laeavila la eharu oaria John ra kileaki.

⁵ Ovohae kariri haela ovohae kohehe?-?laukalula, loa hahaeae haela loa ehohoe leilula, leper haela lei mekaka leivahaelula, avako ipi hahuru haela oharo iapailula, apihaea haela lei ovokake leivahaelula, merava haela iroro oharo iapailula.

⁶ Ara ve hilauki aue la haela ikiveveke ila.

⁷ Ere auvahaeape la hoa Iesu John ve oharo mari hukavape, E va ita merava arahavape ehovea le eharu ovohae eavakive ha? Mea vavaraki hirivo ha?

⁸ Aka learia eharu eavaki ve arahavape ha? Pura mahuka oraki la haela ha? Iapai: pura mahuka oreauki la haela oaria amua haela ve uvi hiki apealula.

⁹ Aka le eharu eavaki arahavape ha? Peroveta haela ha? Kaire, ara ero maeaeaive — are peroveta haela oaria akea ve.

¹⁰ Ma va ere overa oharo hape la haela — maria, Iapaki — arave ape haela ara oropa mave paraeaive, are ave oki karikikilai.

¹¹ O iele, ara ero maeaeaive, Uavila erape haela oaria ere John Bapatiso aire ve. Kahara, ara ero maeaeaive, Kaia ve basileia ve ipi havahu haela areve akea ve.

¹² John Bapatiso hoa aiai ma hoa kaia ve basileia huveravaki mai avavila: haela aheke arero huverava hiki.

¹³ Ehovea peroveta haela oaria pupu oaria ila peroveta oharo ape aiai John ve hoa.

¹⁴ E va ma oharo iki ra kelavakilai, ma haela, rare Elia, ekeki rare avi ape la haela.

¹⁵ Avako ipi haela, iapakive heroe.

¹⁶ Ara va ma vilakao va learia maeaeakilai ha? Are va akoremari titaeka hovea: la akoremari va karikara hihi avai, kake haela itavava?-?haearo maria:

¹⁷ Ela va meovo lahohoaila, e va mahea va au harapukue: ela va ikihuru laleivahaeaila, e va hivavara au avahaeaila.

¹⁸ Ehovea John ekepe hoa are eapai ma ila au laila — kai ereve oharo maria, Are va ovehahu ila.

¹⁹ Haela ve Akore ekepe hoa, are va eapai ma ila lape, kai ereve oharo maria, Ovohae eavaila — e lahua haela, uaina oaria ikivere haela ma, tax korukaia haela i mai haeae haela ila ve kake ma. Kahara, ikiore mai veveke leivila ehovea areve akoremari ve.

Ikikelavaki aue karikara

²⁰ Are horova eapapo leivahaeape la karikara oaria ve are hihiri oharo ape, ehovea ere va iki iele au kelavaila.

²¹ Oea, Chorazin e, oea, Bethsaida e, eve leia leivahaeape la horova ehoaha oaria Tyre i Sidon ila ve la leivahaeakilava, erealila pute a hurae ila iki overa ra kekelape.

²² Ara ealilara maeaeaive — aireaki heheavaki la hare ve, Tyre i Sidon ila perehekai veveke leikilai, ealila va heaha hiki koarakilai.

²³ A kara, Capernaum, a va ma hoa kaia ve le pekakive, a va aire Gehena ve hoa lei hoaukilai. Ehovea ave leia leivahaeape la horova ehoaha Sidon ve ra leivahaeakilava, are aiai ma hoa havahu veveke hiki.

²⁴ Aka ara ero maeaeaive — aireaki heheavaki hoa ve, Sodom perehekai veveke koarakilai, e va heaha hiki koarakilai.

Akore hekai hovea la ikikekela

²⁵ La hoa Iesu mari ape, Oa e, kaia meahaiapo ila ve Amua, ara aro thankyou oharo ave ehovea ma eharu oaria ikiore maea hahe?-?hahe haela oaria a va au kileaila: a va ma eharu akoremari titaeka hiki la amoeavahaeape.

²⁶ Lae vi va, Oa e, ehovea ave ikikekela, laria veveke.

Iesu havahu ve horova okoare

²⁷ Arave Oa eharu oaria araro aikiarape. Haela ae Akore va haveva, Oa hiki ore. Ae va haela Oa kara haveva, Akore hiki ore, ae ka Akore amoeaki ikivere la haela.

²⁸ Horova oaria haela, eharu mehau orai auki haela oaria, araro kai ekeila, e v'iki arave oki paparaehakilai.

²⁹ Arave e mehau oreai aukive, arave oki ore leikive: ehovea ara va maraha, iki here ila. E va ove ve ikipaparaehakilai.

³⁰ Ehovea arave oraiavaki kora heraho ka: arave eharu kara koraoka hiki.