Matthew 10 - Pupu Oharo Āre 1963 Genese 1970 Rute 1972

Kilea haela 12 paparaehape hoa: ereve horova kara

¹ Are areve kilea haela 12 itavavahaeai, erero aheke aiaravahaeape, ehovea ovehahu haruapaki kai maea heahaha lahua lahua oaria lei makukurikive.

² La aposetolo haela 12 ve rare ma: Simon, Peter rare itavape, Andrew areve apoheari, James, Zebedee ve akore, John areve apoheari.

³ Philip kai Bartholomew: Thomas kai Matthew, tax korukaia haela la, James Alphaeus ve akore, Lebbaeus rare ae Thaddeus:

⁴ Simon, Canaan haela, Judas Iscariot, hihila epape haela la.

⁵ Ma haela 12 Iesu paparaehape. Are erero mari maeaeape, Ita lahua haela ve oki va kauvahaelue, kai Samaria haela ve karikara kara kauvahaelue.

⁶ Veveke, e va Israel haela ve au titavape mamoe hiki kai auvahaeaki.

⁷ E va auvahaeaki la hoa — iroro mari ari, Kaia ve basileia maia iele.

⁸ Maea heahaha haela lei makukuriki, leper haela veveke leiki, apihaea haela lei ovokake leiki, ovehahu kara haruapaki. E va veveke kai overa aeape, la veveke kara aiaraki.

⁹ Eve aroa, auro, ario, berasi aikahahaitarue:

¹⁰ Hahi aroa, maea pura orahokaila, loa iilu, kaika kara kaealue: ehovea horova haela ve eapai areve la horova hoveahovea leikive.

¹¹ E va karikara hekai ka eapapo ra pekahavakilava, la karikara ureve haela mekakure haropaki — la haela ve uvi apeapea e va leia harepakive.

¹² E va uvi pekahavaki hoa la uvi momorapuki.

¹³ La uvi haela veveke ra leivahaeakilava eve havila erero aiaraki. Aka la uvi haela ero veveke leikiaue la leikilava, eve havila va kai avaki.

¹⁴ Haela ae ero auhohi leikiaue ra leikilava, eve oharo kara iapakiaue la leikilava, e va la uvi aka la karikara harepaki hoa, kekele ve mahuvu eve loa ve lalaeapaki.

¹⁵ O iele ara ero maeaeaive, Aireaki heheavaki hoa Sodom Gomorrha ila perehekai veveke koarakilai, aka la karikara veveke koara va ka.

¹⁶ Iapai — ara ero mamoe hovea viva ve aru ve mave paparaehaive, ehoveala, e va ekaroa ve ikiore hovea avaki, kai huva akore ve maraha hovea avakive.

¹⁷ E va haela oaria kiva auhohi leila: ehovea ere va ero Sanhedrin oropa ve kari auvahaeakilai, ere ero synagogue ureve huhari haeakilai.

¹⁸ Ere ero gavana haela amua haela ila oropa ve kari auvahaeakilai, ehovea arave harihari, e ereve oropa oharo ve iele hihika arive.

¹⁹ Ere ero kari auvahaeaki la hoa, e va ikihorahora kalaelue, learia oharo hukavakive: ehovea la hoa havahu e va hukavakila la oharo e ore leivahaeakilai.

²⁰ Ehovea la oharo e lahua ve hukavaki oharo ka: aka, eve ure ve aeavila Oa ve Ove ve oharo la.

²¹ Apoheari apoheari hihila epaki ehovea apakive: oa kara areve akore laria leikilai, akoremari kara ereve oalou hihila epakilai, ehovea apihaeakive.

²² Haela oaria arave rare ve ero ikiheaha leikilai. Kahara, aheke apeaki la haela aiai meahaiapo kari leikilai, ere ovokake leivahaeakilai.

²³ Ere ero karikara aeve ra hararuakilava, urahuka karikara aeva auki. O iele, ara ero maeaeaive, e va Israel ve karikara hareho pekahava va ka aiai haela ve Akore aeka kihoaukilai.

²⁴ Kilea haela are areve amua ve akea va ka, kai horova haela are areve haelapo ve akea va ka.

²⁵ Veveke maria — kilea haela areve amua hovea leikive, kai horova haela areve haelapo hovea leikive. Ere va uvi ve haelapo rare Beelzebub rare ra itavakilava, ere va iele havahu areve uvi haela kara lari itavakilai.

²⁶ Laelave, e va erero oaoka kalailue: ehovea au kokaukape la eharu aireaki hapakilai, au avarapape la eharu aireaki haela ore leikilai.

²⁷ Ara ero muru hoa maeaeaki la oharo e va hare hoa hukavaki: avako haopape la oharo e va uvi akea ve iroro arive.

²⁸ Eve maea iilu haealula la haela oaoka kalailue, ere va ove he va haveva. O iele, maea iilu ove ila Gehena hoa haeaki ore la haela, e va arero oaoka eapapo leivahaeaki, heroe.

²⁹ Ori titaeka orahokaila ve kavale halfpenny haroapo ha? La ori haroapo ve oauki hoa eve Oa ore hiki.

³⁰ Eve haro koro are overa mureape.

³¹ E va oaoka kalailue — ori titaeka oaria ve kavale hekai, eve kavale eapapo.

³² Ehoveala, arave hari haela ve oropa vavavaki la haela, ara arero kaia ve Oa ve oropa ve ore leikilai.

³³ Arave rare haela ve oropa hehepo leiki la haela, ara arero arave kaia ve Oa ve oropa haure le leikilai.

³⁴ E va iki kakelavarue ara ekepe ehovea meahaiapo havila avarakive: Ara va ekepe ehovea havila va ka, aka ehovea lelau mare avikekive.

³⁵ Ara ekepe ehovea akore areve oa hahari leikive, kai mari areve lou hahari leikive, kai evera areve vila ve lou hahari leikive.

³⁶ Haela havahu ve uvi haela areve iri haela hovea leikive.

³⁷ Oalou ikivere eapapo, araro ikivere perehekai la haela, are arave rare ve hovea va ka.

³⁸ Areve satauro oraiavi arave aire ekeki aue la haela, are arave haela hovea ka.

³⁹ Ovokake koaraki la haela ovokake le havoavakilai. Ovokake havoavaki la haela, ehovea arave rare ve, are ovokake le koarakilai.

⁴⁰ Ero auhohi leiki la haela araro kara auhohi leikilai: Araro auhohi leiki la haela are araro kiparaeape Oa kara auhohi leikilai.

⁴¹ Peroveta haela peroveta hovea auhohi leiki la haela are peroveta haela ve kavale le avakilai. Mai ehoe haela mai ehoe hovea auhohi leiki la haela, mai ehoe haela ve kavale le avakilai.

⁴² Arave ma akore hekai haroapo au lari ma koa hekako haroapo avaraki la haela, kilea haela ve rare ve, o iele, ara ero maeaeaive, are kavale veveke aireaki havoava va ka.