Mark 9 - Pupu Oharo Āre 1963 Genese 1970 Rute 1972

¹ Are erero maeaeape, O iele, ara ero maeaive, maia lai pavakila uku haela apihaea va ore va ka aiai ere Aualari ve basileia aheke ila kihoreaki eavakilai.

Iesu ve maea koelaripe

² Hare aukava ila kari le lai, Iesu Peter i James i John ila kela heaikiapo lahua kari pekape, ereve oropa ve maea koelaripe.

³ Are pura hauhuka leipe, ovava hovea, meahaiapo haela pura huhelavaelula laria ka.

⁴ Ereve oropa ve hihika leipe Elias i Moses ila. Ere kai Iesu i hareho oharo hukavape.

⁵ Peter Iesu kavale maeape, Haelapo e, veveke ela maia lakivikahavila va! Ela va kovo uvi irehoila ra kukueakilai, aeva Ave, aeva Moses ve, aeva Elias ve.

⁶ Ehovea are oharo iele maea va haveva, ehovea ere oaria oaoka iele.

⁷ Meuru eapapo erero aeravahaeape — ara meuru ureve hape maria, Maia va ara iki akore havahu — areve oharo va iapai.

⁸ Haiapo ka, ere va helari ovohae eavape kai haela au eavaila, ere i Iesu hiki apeape.

⁹ Ere va kela ve ra kihoahuka Iesu erero ahilape ere ovohae eavape la haela ere haela kamaeaelue, aiai haela ve Akore karu ve aea kai uroukilai.

¹⁰ La oharo ere va iki ureve kiva leivahaeape kai elarelare velavela leipe — karu ve aea kai urouki la oharo iele le ha?

¹¹ Ere arero velavela leipe maria, Ehovealeve hohoa haealula haela mari arurava, Elias oropa ekekilai ha?

¹² Are erero kavale maeaeape, Iele havahu Elias oropa ekekilai, kai eharu oaria auhohi karikikilai — kai haela ve Akore v'ila maria overa hape, are va kakare oaria koarakilai, kai haela arero haure leikilai.

¹³ Aka ara ero maeaive — Elias overa iki la, kai haela ve ikivere mai ere arero lari leipe, overa hape la oharo hovea.

Ovehahu ila akore lei makuripe

¹⁴ Are kilea haela ve leia kihoai haela oaria ere i elari apealula eavape — kai hohoa haealula haela erero velavela leipe.

¹⁵ Haela oaria arero eavi elavelave iki horahora leipe, kai arero morapaeape.

¹⁶ Are hohoa haealula haela velavela leipe, E va erero leari oharo velavela leipe ha?

¹⁷ Haela haroapo arero kavale maeape, Haelapo, ara ave maia arave akore lai leikila, are va ikihaveva i ovehahu ila.

¹⁸ Areve aura kerari hoa ovehahu arero laria hararuaveape. Areve ape ohare horeraveape, kai kao heheaveape, kai maea karoroka iele leipe. Ara ave kilea haela maeaeape ovehahu avakakive, aka ere va avaka va ore va ka.

¹⁹ Are kavale maeape, Ikikekelakiaue vilakao e — ara e i hareho aeavila hare leavaila ha? Ara ero heraho leivila hare leavaila ha? Arero maia lai ekerurava.

²⁰ Ere arero lai ekepe — are arero eavi ovehahu elavelave areve maea hararuape. Are hilai mea ve arura ape, ohare horerape.

²¹ Are la oa velavela leipe, Are ma maea leahovea koarape. Are mariape, Areve akore hekai hoa ve.

²² Mea aea are a ve hareauvila kai ma ve hareauvila, ehovea apakive, aka a va horova hovea ra leikilava, elaro ikiheroe leivahaeai elaro koarakive.

²³ Iesu arero maeape, A va iki ra kekelakilava, ikikekelavila la haela eharu oaria aupovearai la.

²⁴ Akore ve oa elavelave o ma ila maeape, Ara iki kekelave — arave ikikekelaki aue mai hapururuka.

²⁵ Iesu haela oaria ra korukai eavape, laelave are ovehahu erereape maria, A iki haveva avako ipi hahuru ila ovehahu, ara aro ahilave, arero harepa, kai areve ureve va kai karaealue.

²⁶ Ovehahu hi ape, kai arero ra hararuape, heaha iele, aire arero le harepape. Are apape haela hovea leipe, laelave uku haela mariape, Are le api.

²⁷ Aka Iesu arero mai pae urapape, are kai uroupe.

²⁸ Ere uvi pekai kilea haela arero velavela muruhari leipe maria, Ehovealeve ela arero avaka va hovea au leila ha?

²⁹ Are erero maeaeape, Mari ovehahu eharu aeva avaka va hovea ka, ivaiva i ere aheke ila hiki.

Api kai urouki oharo aea

³⁰ Ere leia harepai Galilee aru hihi aupe. Are ikivere ka haela ore leikive.

³¹ Ehovea are kilea haela kileavahaeape kai mariape, Ere haela ve Akore haela ve mai ve avarakilai, ere arero harilai: ere arero ha aireaki hare ilehoila are kai uroukilai.

³² Aka ere va la oharo auhohi au iapaila, kai arero velavela leikive oaoka leivahaeape.

Maeoka mai veveke ikivere leiki

³³ Ere Capernaum hoahukape. Ere va uvi pekai are erero velavela leipe, E va oki leia le oharo ve o hahari laila ha?

³⁴ Ere oharo ka, ehovea okiharo leia ere elare oharo ve o hahari ape — ereve oropa haela leita.

³⁵ Are haiavape kai haela 12 itavavahaeai erero mari maeaeape, Oropa leikive ikivere la haela, are va aireaki haela laikilai, kai haela oaria ve horova leikilai.

³⁶ Are akore hekai la ereve aru hihi aepape — are arero mai hahavi erero mari maeaeape:

³⁷ Maria akore hekai la arave rare ve auhohi leiki la haela, are araro kara auhohi leikilai, kai araro auhohi leiki la haela are araro kiparaeape la haela auhohi leikilai.

Horova haela ae haure lei v'arekaea

³⁸ John arero maeape, Haelapo, ela haela ae va ovehahu ave rare ve haruapai la eavape. Are ela i koarai vea ve ka, laelave ela arero erereape, ehovea are ela i hareho au koarai veaila.

³⁹ Aka Iesu erero maeaeape, Arero kaererearue, ehovea arave rare ve horova eapapo leivila la haela, are araro naoae heaha lei va ka.

⁴⁰ Ela i iri leiki aue la haela, are va elave haela hovea.

⁴¹ Haela ero ma hekako haroapo arave rare ve ra leikilava, ehovea e va Keriso ve haela, o iele ara ero maeaeaive, are va kavale veveke havoava va ka.

Haela ae ka hereavalue

⁴² Haela ae arave rare kekelavila mari akore hekai haroapo la hararuakilava, veveke, wheat hae haipepekaki have areve karave heropi arero avavu ve paraeakive, ma ihaukive.

⁴³ Ave mai ukai aro la hararuakilava, koerapa — veveke perehekai maria, mai ukai hiki karia, ovokake ve basileia araeakive, aka mai ukai ukai ila ere Hell ve laria hiki hahavila la a aro ure ve paraeaki ave.

⁴⁴ Leia ereve hehee apihaea va ka, a kara huhura va ka.

⁴⁵ Ave loa ukai aro la hararuakilava, koerapa — veveke perehekai, mari loa ukai hiki karia, ovokake ve basileia araeakive, a va loa ukai ukai ila ere Hell ve laria hiki hahavila la a aro ure ve paraeaki ave.

⁴⁶ Leia ereve hehee apihaea va ka, a kara huhura va ka.

⁴⁷ Ave ovohae ukai aro la hararuakilava, haoavi, aukapa — a ve veveke perehekai maria ovohae ukai hiki, Aualari ve basileia araeakive, a va ovohae ukai ukai ila Gehenna ve laria hiki hahavila la a ere aro ureve paraeaki ave.

⁴⁸ Leia ereve hehee apihaea va ka, la a kara huhura va ka.

⁴⁹ Ehovea haela oaria kaikara a ila ve bapatiso leikilai: arura horova oaria kara kaikara lei veveke leikilai.

⁵⁰ Kaikara va veveke — aka kaikara heaha ra leikilava, e va arero learia lei veveke leikilai? E va elarelare ureve kaikara kiva leikive, aireaki e va hareho havila ila apeakilai.