Mark 8 - Pupu Oharo Āre 1963 Genese 1970 Rute 1972

Iesu 4,000 haela eapai aiarape

¹ La hoa au korukaiavahaeape haela oaria iele, kai ereve eapai karia, laelave Iesu areve kilea haela itavavahaeai mari maeaeape:

² Ara haela lakea ikihuru eapapo, ehovea ere ara i hareho apealula hare irehoila, kai eapai au laila.

³ Ara erero elare ita ra paparaehakilava, ere va oki poe ve aitara areaukilai, ehovea uku haela ve ita apehai iele.

⁴ Areve kilea haela arero kavale maeape, Haela ma ita merava ve pai lahoa ki avakilai, ma haela oaria ve eharau huha?-?ravahaeakive ha?

⁵ Are erero velavela leipe, Eve leia pai leavaila apearo. Ere mariape 7.

⁶ Are haela oaria maeaeape mea va au avakive. Are pai 7 kaili, thank you oharo ape kai pai haivavaela kilea haela aiarape, ehovea ereve oropa aipevahaeakive.

⁷ Ere va leia ekaka titaeka haroapo haroapo kara — are ivaiva lei erero ahilavahaeape ekaka kara haela aiarakive.

⁸ Ere oaria lalavahaeai eharau huharape. Ere kailape eapai hohoe hara 7.

⁹ Eapai lalavahaeape haela oaria 4,000. Are erero elare ita paparaehape.

¹⁰ Are i kilea haela ila vevaea horeai Dalmanutha ve ukai elahukape.

Are kilea haela aihukamaeape ehovea iapaki aue mai

¹¹ Pharisee haela kihoreavi arero au amurai arero kaia ve ihova ve velavela leipe:

¹² Are ove ve iki hoara mari maeaeape, Ehovea leve ma vilakao ihova ra haroparo ha? O iele ara ero maeaive — ma vilakao ihova ava va ka.

¹³ Are erero haitapai vevaea horeai ukai elaupe.

¹⁴ Kilea haela pai au availa, iki hoapai: vevaea ureve kara pai haroapo hiki.

¹⁵ Are erero ahilape maria, Kiva auhohi leila, Pharisee haela i Herod ila ve pai aeaki ave.

¹⁶ Ere elarelare iki heheavape maria, Ma oharo ehovea ela va pai au aeakiue.

¹⁷ Iesu ereve ikikekela ore lei mariape, Ehovea leve e va elarelare iki heheavaro, ehovea e va pai au aeakue ha? Aiai ma hoa e iapa va ka ha? Aiai ma hoa e va iki aheke ila apealula ha?

¹⁸ E va ovohae ila, kai eava va ka ha? E va avako ila, kai iapai va ka ha? E iki kekela va ka ha?

¹⁹ Ara pai hue ila haivavaelai, 5,000 haela aiarape la hoa, e va eapai hohoi hara leavaila heheloekoavi kailape ha? Ere arero kavale maeape: 12.

²⁰ Aeva pai 7 haivavaelai haela 4,000 ra aiarape hoa e va eapai hohoi hara leavaila kailape ha? Ere kavale maeape: 7.

²¹ Are erero maeaeape, Lehae lei, e va iki hoapape.

Bethsaida ovohae kariri haela haroapo

²² Are Bethsaida pekape. Ere ovohae kariri haela areve oki lai ekepe kai arero apevelavela leipe arero mai koharakive.

²³ Are ovohae kariri haela mai pae karikara mahokaea ve lai aupe. Are areve ovohae apea koa arero mai kohari arero velavela leipe are va eharu eavape la?

²⁴ Are ovohae iupe kavale mari maeape, Ara haela kora kukupa maea aula kelalula eavave.

²⁵ Are va aeka areve ovohae mai koharape — kai ovohae iupekive maeape. Areve ovohae veveke le leipe, kai are haela oaria hihika eavavahaeape.

²⁶ Are arero elare uvi parae i mari maeape, A va karikara kaulue, kai karikara haela kamaeaelue.

Peter Iesu va Keriso hihika maeape

²⁷ Iesu i kilea haela ila mea hoahuka Caesarea Philippi la karikara oaria pekahavape. Ere oki auvahaeape hoa are kilea haela vela vela leipe maria, Haela va arave rare va leaora la ara leita ha?

²⁸ Ere kavale maeape, John Baptist, kai uku Elias, rare arura, kai uku peroveta haela are va rare aro.

²⁹ Are erero maeaeape, E va arave rare va leaora aro ara leita ha? Peter kavale maeape, A va Keriso iele.

Iesu areve aireaki api kai urouki maea kileape

³⁰ Are erero ahilape ere va haela ae va la oharo kamaeaelue.

³¹ Are erero kilea ipopeavape maria, Haela va Akore kakare oaria, koarakilai, kai haela hoaha i oharo haela i hohoa haealula haela arero haure lei harilai, are va hare irehoila kai uroukilai.

³² Are va la oharo hihika maeaeape. Peter arero oki lai aupe kai arero ovora kopape maria, Laria va arekaea.

³³ Are helari kilea haela ovohae eavape kai Peter erereape maria, Satan e, arave aireaki aula, ehovea ave ikikekela Aualari ve ikikekela hovea ka, aka haela ve ikikekela hovea hiki.

Elare maea kekela v'arekaea

³⁴ Are haela oaria i kilea haela ila hareho itavavahaeai mari maeaeape, Haela ae araro airekai ra ekekilava, veveke are elare kekela va arekaea, aka are havahu ve satauro oraiavi araro airekai ekekilai.

³⁵ Haela ae elare ovokake aheke leikive ikivere ra leikilava, are va ovokake le paua harilai. Haela ae elare ovokake arave harihari ve kai oharo veveke ve harihari ve ra havoavakilava, are ovokake iele koarakilai.

³⁶ Haela va meahaiapo eharu hareho ra aeakilava, kai areve ove ra havoavakilava, areve kavale iele lahoa?

³⁷ Aka haela areve Ove ve le eharu kakavai leikilai.

³⁸ Ma mai haeae i airi pavora ila vilakao hoa, arave harihari ve aka arave oharo ve makiri leiki la haela, aireaki Haela ve Akore, Areve Oa i aneru ila ve haharika ila kihoreraki hoa, la haela ve rare ve makiri leikilai.