Mark 7 - Pupu Oharo Āre 1963 Genese 1970 Rute 1972

Pharisee haela horahora ehovea Iesu pupu uku hahaure leipe

¹ Pharisee haela i Jerusalem ve ekevahaeape hohoa haealula haela uku ila areve leia korukaiavahaeape.

² Ere areve kilea haela uku mai hirihiri ila (ehovea ereve mai ere au huhelavalaila) eapai laralula eavavahaeape, ere o vere ape.

³ Ehovea Pharisee haela i Jew haela oaria ila mai auhohi huhelavahaeaki aue la leikilava ere va eapai lalavahaea va ka, ehovea ere uvari vilari ve la pupu kiva auhohi leivahaelula.

⁴ Ere va ilaea leivahaea ita ve kihoahukaki hoa ere va mai ma huhelavahaeaki aue ra leikilava, ere va eapai lalavahaea va ka. Ae va pupu oaria leia vea ere iapai kiva leivahaelula: hekako huhelavahaeaki, kai elaa, berasi haita ila kara, kai eapai haha kara.

⁵ Aire Pharisee haela arero velavela leipe, Ehovealeve ave kilea haela uvari vilari pupu kiva auhohi leivahaea va ka, aka mai hirihiri ila eapai laralula.

⁶ Are erero kavale maeaeape, E opore haela e, Isaiah iele e v'ila peroveta oharo ape maria: Ma vilakao araro ape iilu hiki morapaealula, Aka ereve iki ureve ita apehai vea.

⁷ Laelave ereve morapaea mai iele karia, Ehovea ereve kilea oharo haela ve pupu oharo hiki.

⁸ Ehovea e va Aualari ve pupu hahaure leivahaelula Aka haela ve ikikekela pupu, hekako, elaa ila huhelavahaeakive la mai hovea, e leivahaelula.

⁹ Are kai erero maeaeape, Iele havahu e Aualari ve pupu hahaure leivahaelula, ehovea e va elare pupu hiki kiva leivahaelula.

¹⁰ Ehovea Moses mariape, Ave oa i lou ila momorapuki — kai areve oa i lou ila o heaha maeaki la haela arero huru harive.

¹¹ Aka eve oharo maria, Haela areve oa i lou ila ra maeakilava, a va arave oki avaki ikivere la eharu are Corvan (oharo ve iele Aualari ve meru) are va la eharu avara va ka.

¹² Laelave areve oa i lou ila koaraki pupu karia le lai.

¹³ Laria e va Aualari ve oharo naoae naoae leivahaelula, ehovea e va elare pupu aheke leivahaelula.

¹⁴ Are haela oaria itavavahaeai erero mari maeaeape, E oaria arave oharo iapaila, kai auhohi iapaila.

¹⁵ Haela ve ureve arahavaki la eharu oaria ere va haela lei haeae lei va ka: aka areve ape ve kihoreavaki la eharu iele arero lei haeae leilula.

¹⁶ Avako ila la haela, are iapakilai.

¹⁷ Are va haela oaria harepai uvi pekape la hoa, areve kilea haela ma parable ve velavela leipe.

¹⁸ Are erero maeaeape, E kara auhohi iapa va ka ha? E kekela va ka ha, eharu haela ape ra larilava, la eharu arero lei haeae lei va ka.

¹⁹ Ehovea are iki ureve araea va ka aka areve eharau ve, kai e ra heavakilava, maea meheo la leikilai.

²⁰ Are maeape, Haela ve ape kihoreraki la eharu arero lei haeae leiki eharu va la.

²¹ Ehovea areve maea ureve, iki ve kihoreavaki eharu oaria maria, — Ikikekela heaha, airi pavora mai, mai heahaha, haela haeaki mai,

²² Korea mai, eharu oaria ikivere mai, haeae oaria, hehepo mai, ovohae heaha, o heaha, maea pelaea, ikihaveva oaria.

²³ Ma eharu heaha oaria ureve kihoreavalula, kai haela lei haeae leilula.

Ita lahua mari lei makuripe

²⁴ Aire are urai Tyre i Sidon ila ve ukai elaupe, — kai uvi haroapo muruhari pekape, aka areve arauki ita karia:

²⁵ Ehovea uamari ae areve mari ovehahu ila, areve hari iapai iki areve oropa ekaopape.

²⁶ Are va Greek uamari, areve ita Syrophoenicia. Are arero here leipe, areve la mari ve ovehahu avakakive.

²⁷ Aka Iesu arero maeape, Akoremari eapai oropa avaraki — ehovea veveke va ka akoremari ve eapai kaili avita ve oropa koavakive.

²⁸ Are erero kavale maeape, Kaire, Amua, aka haha ihau ve la avita, akoremari ve eapai erorova laralula.

²⁹ Are arero maeape, Ehovea ave la oharo — Aula, ovehahu ave mari overa harepai.

³⁰ Are elare uvi pekape la hoa, are mari avuku uavavila eavape; ovehahu overa vivilape.

Avako ipi hahuru o haveva haela lei veveke leipe

³¹ Are va Tyre i Sidon ila la ita harepai Galilee ma haru poe ve aupe — Decapolis aru hihi ve la okiharo.

³² Ere avako ipi hahuru i oharo haveva haela areve leia lai ekepe. Ere Arero here leipe arero mai koharakive.

³³ Are arero ita lahua lai ai areve mai lekoka avako ureve avarape, kai apea koa areve auli mai koharape.

³⁴ Are ovohae kaia ve iupepe, iki hoara ape, kai arero maeape, Ephthatha (oharo ve iele, Hapa).

³⁵ Areve avako elavelave hapape, areve auli avaro le leipe, kai are oharo hihika hukavape.

³⁶ Are erero ahilape haela ae va kamaealue. Are lari oharo oaria aheke iele maeaeape, aka ere va areve la oharo hihika kileavahaeape.

³⁷ Ere oaria ikihorahora eapapo leivahaeape, kai mariape, Eharu oaria va are lei mekaka laivila — are va avako ipi hahuru haela lei oharo le iapai, kai o muruha haela oharo le ara.