Mark 6 - Pupu Oharo Āre 1963 Genese 1970 Rute 1972

Nazareth haela Iesu haure leipe

¹ Are leia harepai elare ita hoaupe. Areve kilea haela arero airekai auvahaeape.

² Sabati hare are synagogue oharo kileape. Areve oharo iapape haela oaria ikihorahora leivahaeape kai mari ape, Ma haela ma eharu lahoa ve aeape? Ma arero avarape ikiore learia, ehovea are horova ehoaha leivahaevila?

³ Maia evera haela hiki, Joseph ve akore, James i Joses i Juda i Simon ila ve apoheari ka ha? Areve maritaloa ela i hareho apea va ka ha? Ere va arero ikihairihairi leipe.

⁴ Aka Iesu erero maeaeape — Peroveta haela ve morapaea?-?kiaue leikive ita elare ita hiki, elare karikara hiki, elare apavara hiki, elare uvi haela hiki.

⁵ Are va leia horova ehoaha oaria hovea ka: maea kakare haela haroapo‐haroapo hiki are va mai koharai lei makukuripe.

Aposetolo haela 12 paparaehape

⁶ Are va ikihorahora leipe ehovea ereve ikikekela karia. Are helari karikara oaria iroro ape.

⁷ Are haela 12 itavavahaeape kai erero orahoka orahoka paparaehape. Are erero aheke avarape ehovea ovohahu haruapakive.

⁸ Are erero ahilape — ere va hahi eharu kaealue, mai kaika hiki, aroa va ka, pai va ka, moni pausi haroka.

⁹ Aka loa iilu oraki, kai pura kepea va arekaea.

¹⁰ Are erero maeaeape, E va lela ita aeva uvi ra pekahavakilava, la uvi hiki apeapea e va la ita harepakive.

¹¹ Ero auhohi leiki aue ra leikilai la haela kai eve oharo iapaki aue ra leivahaeaki la haela, e va la ita harepaki hoa eve loa hara ve kekele mahuvu leia ve hareavaki, ihova erero kileakive. O iele ara ero maeaeaive, aireaki heheavaki hare ve Sodom i Gomorrah ila perehekai veveke leikilai, aka la karikara veveke lei va ka.

¹² Ere hoahukape kai mai haeae ve ikihuru leikive iroro ape.

¹³ Ere ovehahu oaria haruapape kai maea heahaha haela oaria la‐apu huhariri la, ere veveke le leivahaeape.

John Baptist apape hari

¹⁴ Ereve hari Herod amua iapape, ehovea areve rare ita oaria haela iapape. Kai Herod mariape, Leia John Baptist karu ve roulaila, laelave areve horova ehoaha oaria hihika leivahaeavila.

¹⁵ Uku haela mariape, Are va Elias la. Uku haela maeape, Peroveta haela la, aka peroveta haela ae va la.

¹⁶ Aka Herod iapai mari maeape, Are va John Baptist, ara haro haerapape la haela la, are karu ve la roulaila.

¹⁷ Ehovea Herod havahu haela paparaehape John paeakive kai arero uvi muru hahape, ehovea Herodias areve apoheari Philip ve uva ve harihari — ehovea are arero laeape.

¹⁸ Ehovea John Herod mari maeape, Ave apoheari ve uva laeakive pupu ila.

¹⁹ Laelave Herodias arero ikiheaha leipe. Are ikivere arero harive, aka areve oki karia.

²⁰ Ehovea Herod ore overa leipe John va mai ehoe hehe haela ae, laelave are arero oaoka leipe, kai areve kilea oharo iapape. Are areve oharo iapai ikiveveke lei horova veveke le leipe.

²¹ Hare veveke kihorerai, Herod areve epape hare hurai leipe, kai amua haela oaria i Galilee captain haela oaria ila la hurai ve itavavahaeape.

²² Herodias ve mari hekai mahea harape, kai Herod i hareho avape la haela oaria ikiveveke leivahaeape. Amua la mari mari maeape, Ave ikivere ra leikila la eharu velavela leiki, ara aro avarakilai.

²³ Are okoare arero maeape, Lela eharu hovea a velavela leikilai, aiai arave basileia ve ukai, ara avarakilai.

²⁴ Are hoai areve lou mari maeape, Ara le eharu velavela leikilai? Are kavale maeape, John Baptist ve haro ve rare la maeaki.

²⁵ Are kai elavelave pekai amua velavela leipe maria, Ara ikivere a va John Baptist ve haro haita ve aivaupi araro avikiaraki.

²⁶ Amua ikihuru eapapo leipe — aka ehovea are okoare overa maea, aeva ehovea are i hareho apeape la haela kara, are areve oharo au haerapaila.

²⁷ Amua la hoa havahu hevehe haela haroapo paraeape John ve haro haerapai avikekive; are uvi muru ureve areve haro haerapape.

²⁸ La haro kai haita aivaupi mari le avarape. Mari areve lou la avarape.

²⁹ Areve kilea haela iapai hoahuka areve maea ikupa kaivi koru le ihape.

Aposetolo haela hahi ve kihelaripe

³⁰ Apostle haela Iesu ve leia korukaiavahaeape, ere leivahaeape kai kileavahaeape eharu oaria arero maeape.

³¹ Are kai erero mari maeaeape, E v'ekeila, elaviila lahua arahavakilai, leia iki perehekai paparaehakive, ehovea haela oaria leia ve aula kelari arura hiki, kai ere va eapai auhohi larive oki karia.

³² Ere va muruhari vevaea hekai horeai ita merava haropakive.

³³ Aka haela uku erero horeavi eavavahaeape, ere kai arero ore leipe, laelave haela oaria karikara oaria ve kihoahuka loa auvahaeape, kai erero oropai areve la ita havahu koarape.

³⁴ Iesu vevaea ve hoai ukavi haela oaria eavavahaeape. Are erero ikihuru eapapo leipe, ehovea ere va mamoe hovea, kiva haela karia. Are erero oharo oaria kilea ipopeavape.

Iesu 5,000 haela eapai aiarape

³⁵ Hailaea mea ovoka i, areve kilea haela iki arero mari maeape, Maia va ita merava, ae va hare kari leilei.

³⁶ Erero paparaehai karikara haropakive, ehovea eapai ilaea leikive.

³⁷ Are erero kavale maeaeape, E havahu erero eapai aiaraila. Ere kavale maeape, Ela lehae? Ela va ai 200 denarius hovea ilaea leiki, erero aiaraki, ere larive ha?

³⁸ Are erero maeaeape, Eve pai leavaila apearo ha? Ai hoai eavaila. Ere ore lei arero maeape, Hue ila, kai ekaka orahokaila.

³⁹ Are erero maeaeape, Haela oaria hohe ve hiru hiru availa.

⁴⁰ Ere va hoa lahua lahua erereapai avape, hiru uku 100, uku va 50.

⁴¹ Are pai hue ila i ekaka orahokaila ila kaili ovohae kaia ve iupepe: Are ivaiva lei pai haivavaelape, kai kilea haela aiarape ehovea haela oaria aiarakive. La ekaka orahoka kara are havuri haela oaria hovea hovea leipe.

⁴² Ere oaria eapai lalavahaeai eharau huharavahaeape.

⁴³ Pai i ekaka ila ve hohoe ere kaili hara 12 heheloekoavape.

⁴⁴ La eapai lalavahaeape haela oaria 5,000 hovea.

Iesu ahea ma akea ve loa veavelaripe

⁴⁵ Aireaki are kilea haela vevaea horeakive maeaeape kai ukai oropa elahukakive, Bethsaida la karikara ve. Are lahua aeape ehovea haela oaria paparaehakive.

⁴⁶ Are erero paparaehai kela pekai ivaiva leipe.

⁴⁷ Hailaea hoa vevaea ma haru hihi ve avape, are kai lahua huru ve epavape.

⁴⁸ Are erero eavape ere para heraho leiroape, ehovea oropa mea hereavape. Oroa a hihi are ereve leia horera, ma akea ve erero oropai itaupe.

⁴⁹ Aka ere arero ma akea ve itauvila eavape, ere mariape, Ovehahu la! kai hivavara i ara hai ape.

⁵⁰ Ehovea ere oaria arero eavape kai iki ihahape. Are elavelave erero oharo maeaeape maria, Ikiveveke leila, maia va ara! Oaoka kalailue!

⁵¹ Are ereve leia vevaea ureve pekape kai mea le haerapape. Ere va ikihorahora eapapo iele, iki le ihahape.

⁵² Ehovea ere va are pai ve leipe la horova eapapo iki au kelavaila, ehovea ereve iki aheke.

Gennesaret maea haela lei makukuripe

⁵³ Ere ukai elahukai miri le pavape.

⁵⁴ Ere vevaea ve ukavi haela oaria arero ore leipe.

⁵⁵ La ita hareho ve haela oaria harava hukai kihoreavape kai ereve maea heahaha haela oaria are pekape la ita kari hoahukape.

⁵⁶ Are aupe la ita oaria karikara ehoaha titaeka ila, kaipure kara, ereve maea heahaha haela oaria oki poe ve aipevahaeape — kai arero here leipe — Ere va areve pura kao hiki mai koharakive — are mai koharape la haela oaria lei veveke leivahaeape.