Mark 4 - Pupu Oharo Āre 1963 Genese 1970 Rute 1972

Wheat hae puravai velaripe parabole

¹ Are va kai ma haru poe ve iroro ipopeavape. Areve leia haela oaria korukaiavahaeape, laelave are va vevaea hekai horeai avape — kai haela oaria ma poe ve avape.

² Are erero eharu oaria parabole ila kileavahaeape. Areve kilea oharo uku maria,

³ Iapaila — haela ae wheat hae puravai velarikive hoaupe.

⁴ Are puravai velaripe hoa — hae uku oki poe ve hohoape, ori merava kihoahukai erero la ka leipe.

⁵ Uku hae have ita hohoape — leia kekela parura va ka, ere aheaupe, ehovea kekele heheroro.

⁶ Aka hare akea pekape la hoa ere va ahea iele lei le haroropape, ehovea ere va elele karia.

⁷ Uku mamareke ureve hohoape — la kora mamareke aheai erero le havuopape, laelave ereve iele karia.

⁸ Hae uku kekele vovohoro ila ve hohoape — ere aheaupe kai iele oaria horeavape — hae uku iele 30, uku iele 60, uku iele 100.

⁹ Are maeaeape, Avako ila haela are iapakilai.

¹⁰ Are lahua aeape la hoa ere are i hareho avape haela, 12 haela kara, arero parabole ve iele apevelavela leipe.

¹¹ Are erero maeaeape, Aualari ve basileia ve muruhari eharu ore leiki okiharo e le avape, aka mahokaea haela ma eharu oaria ela parabole hiki maeaeakilai.

¹² Ehovea ere va eavakilai aka auhohi eava va ka, iapakilai, aka auhohi iapa va ka: ere va hare aea iki helarivahaeaki ave, kai ereve mai haeae hapururukaki ave.

¹³ Are erero maeaeape, E va ma parable ve iele haveva ha? Laelave e va lehae lei parable oaria ra ore leikilai ha?

¹⁴ Puravai velariki haela — are va oharo veveke puravai velarivila.

¹⁵ Okiharo poe ve hohoaki la hae hoveahovea haela oharo veveke ra iapakilava: diabolo ereve iki ureve puravai velaripe la oharo haiapo va ka le hareavakilai.

¹⁶ Laria kara have ita hohoape la hae. Haela oharo ra iapakilava, ikiveveke ila iapakilai.

¹⁷ Aka ereve elele va karia — laelave ere va hare uku hiki aheke leilula — aireaki — heraho hoa kai hararuaki hoa ra kihorerakilava, ehovea oharo veveke ve harihari, ere elavelave hihilaukilai.

¹⁸ Kora mamareke ureve hohoape la hae kara laria — Haela oharo ra iapakilava,

¹⁹ Aka meahaiapo ve heraho, erohoho ve amuraeharae, aeva eharu oaria ikivere mai ereve iki ureve arahavaki oharo veveke ere haehaharoavakilai, laelave ereve hae karia.

²⁰ Kekele vovohoro hohoape la hae maria — haela oharo veveke iapai le avakilai, kai hae veveke oaria le horeavakilai, uku iele 30, uku iele 60, uku iele 100.

Lamepa ve ihova: Hae aporaki ihova

²¹ Are erero maeaeape: Haela lamepa kohu ihau ve aka avuku haha ihau ve aepakive heroe ha; kai are havahu ve haha akea ve aepa va ka ha?

²² Ehovea aiarapape eharu oaria hihika leikilai — muruhari eharu kara haela oaria eavakilai.

²³ Haela avako ila la leikilava, are iapakilai.

²⁴ Are erero maeaeape, Eve iapaki mai kiva auhohi leila — ehovea e va haela aiarakilai hoveahovea ero aiarakilai — e iapa veveke haela ero oaria havahu aireaki aiarakilai.

²⁵ Ehovea eharu ila la haela — eharu kepea arero ae va aiarakilai — eharu karia la haela are oropa aeape la eharu ere hareavakilai.

²⁶ Are mariape, Aulari ve basileia haela ae kora mere kekele ve apoporauve hovea.

²⁷ Aireaki are avuku uavakilai, kai oroa i hare ila urouvila. La kora mere horera ahakilai, lehae lai areve iele va, are haveva.

²⁸ Ehovea kekele are havahu hae horeraki horova leivila, oropa ikupa, aireaki rorore, aireaki hae rorore ureve.

²⁹ Hae hovare ra leikilava, are la hoa hoi ila haerapakilai, ehovea eapai ikaeaki hoa hovea havahu.

³⁰ Are mariape, Ela Aualari ve basileia learia maeakilai ha? Aka le eharu hovea arilai?

³¹ Are va mustard hae hovea. Mea ve aporaki hoa are va hae oaria ve hekai iele.

³² Aka arero ra aporakilava are ahakilai aiai oru eharu oaria are heaoravaeakilai, areve mamaeako ehoaha i heahapiki leilula, laelave ori merava oaria areve kavu ureve loro aealula.

³³ Parable oaria laria are erero oharo veveke kileavahaeape, ereve iapa mai hovea hovea.

³⁴ Are va erero parable okiharo hiki kileavahaeape. Kai ere lahua apeape hoa eharu oaria are kilea haela hihika kileavahaeape.

Iesu mea heaha haerapape

³⁵ La hare, hailaea hoa, are erero maeaeape, Elava ukai elahukakilai.

³⁶ Ere haela oaria paparaehape, aireaki ere arero vevaea ureve lai horeape, vevaea titaeka oaria kara ere i hareho.

³⁷ Mea heaha eapapo hareavape kai ma loru ehoaha vevaea le havuopape, vevaea ure ma heloekoape.

³⁸ Are evoe ve aihari aipei avuku uavape. Ere arero hurapai mari maeape, Haelapo, ela va ma ihahakive leiro, a kekela va ka ha?

³⁹ Are urai mea i ma ila oropai maeaeape — maria, Kahara, here leila. Mea le haerapape, kai ma here leipe.

⁴⁰ Are erero maeaeape, Ipi leve e oaoka laleila ha? Ehovealeve e va iki mekari kelava va ka ha?

⁴¹ Ere va ikihorahora eapapo leivahaeape, kai elare oharo hukavape maria, Maia le haela ha? Mea i ma ila areve oharo iapa hiki lae.