Mark 15 - Pupu Oharo Āre 1963 Genese 1970 Rute 1972

Iesu, Pilate, Rome Gavana haela, oropa ve

¹ La vevelare oharo haela i haela hoaha i hohoa haelula haela i council haela oaria ila oharo hukavape. Ere Iesu hahai Pilate oropa ve lai aupe.

² Pilate arero velavela leipe, A va Jew haela ve Amua ha? Iesu kai kavale maeape, Kaire, a lailave.

³ Oharo haela areve rare naoae naoae opore oharo oaria ape.

⁴ Pilate arero velavela leipe maria, A va kavale oharo e va ka ha? A iapai — ere va aro hahaki oharo oaria laila.

⁵ Aka Iesu kavale oharo au maeaila, laelave Pilate va ikihorahora leipe.

⁶ Iapai — La hurai hoa areve mai maria — uvi muru aeaki haela aea helaukakive, ereve ikivere haela va haroapo.

⁷ Leia haela haroapo rare Barabbas, are i hareho hahari avahaeape haela oaria ila hareho uvi muru apearoape: hahari hoa haeape haela kara.

⁸ Kai haela oaria Pilate ve leia pekahavi arero hilahila leikive, areve la hurai mai kai leikive.

⁹ Aka Pilate erero kavale mari maeaeape, Eve iki lehae ha? Ara va Jew haela ve Amua ma e ve helauka avarakive, heroe ha?

¹⁰ Ehovea areva ore oharo haela arero hihiri leivahaeape.

¹¹ Aka oharo haela haela oaria hakileavahaeape Pilate Barabbas helaukakive velavela leikive.

¹² Pilate kai erero kavale maeaeape, E va ikivere ara Jew haela ve Amua rare ape la haela leari leikive ha?

¹³ Ere kai hivavara ape maria, Arero satauro ve harive.

¹⁴ Pilate erero velavela leivahaeape, Lehae? Areve haeae le ha? Ere kai hivavara eapapo ape maria, Arero satauro ve harive.

¹⁵ Laelave Pilate, ehovea haela oaria iki lei veveke leikive, Barabbas helauka erero avarape, kai Iesu haru ha satauro ve harive paraeape.

Hevehe haela Iesus heheo ila morapaeape

¹⁶ Maora hevehe haela arero lalava eapapo rare Praetorium kai lai aupe. Ere maora hevehe haela oaria leia korukaiavahaeape.

¹⁷ Ere va areve maea pura ovoka hahape, kai kora mamareke korona hai areve haro koepape.

¹⁸ Ere arero heheo morapaeape maria, Eavaila — Jew haela ve Amua.

¹⁹ Ere va areve haro hirivo koape kai areve maea apea koai ekaopi arero morapaeape.

²⁰ Ereve heheo kari lei areve pura ovoka ere oavi are havahu ve pura kai orape kai arero satauro ve harive la lai aupe.

Iesu satauro akea ve hape hari

²¹ Ere va kihoahuka Cyrene haela ra eavape rare Simon, Alexander i Rufus ila ve oa: ere la haela satauro oraiavakive ahilape.

²² Ere va ita rare Golgotha arero lai aupe (La rare ve iele, Haelaharo ita).

²³ Ere arero wine i myrrh ila larive avarape, aka are haure leipe.

²⁴ Ere va arero satauro ve hape kai aireaki ere va koae koa areve pura hamuri elarelare aeape.

²⁵ Hare vevelare hoa 9 o'clock ere arero satauro le hape.

²⁶ Kai areve haro akea arero lai hape ve la iele mari haeape, Jew haela ve Amua ma.

²⁷ Ere va are i hareho haeape korea haela orahokaila — haroapo areve mai ore ukai ve, haroapo areve mai keva ukai ve.

²⁸ Overa hape oharo iele le horerape maria, Ere haeae haela are i hareho kaoape.

²⁹ Leia auvahaeape haela oaria haro koukou avahaeai arero heaha maeape maria, A va Hehe Uvi ra haipararapai hare irehoila hoa kukive ape haela.

³⁰ A havahu elare lei makuri — satauro ikupa ve hoa kihoau.

³¹ Laria kara oharo haela i hohoa haealula haela elare heheo mariape, Are haela oaria lai makukuripe la, are elare lei ovokake lei va ka.

³² Keriso Israel ve Amua — Satauro ikupa ve kihoauki ela ovohae eavi iele le iapakilai. Are i hareho satauro haeape haela kara arero o heaha maeape.

Iesu ve apape hoa

³³ Hare hihi hoa, mea muru le leipe, aiai hailaea hoa 3 o'clock.

³⁴ Kai 3 o'clock Iesu ara hai itavape mari, Eloi, Eloi, lama sabachthani? La oharo ve iele, Arave Aualari, arave Aualari, ipileve A va araro harepai ha?

³⁵ Leia apeapea haela uku la oharo iapai mari maeaeape, Iapai — Are Elias ra itavave.

³⁶ Haela ae vivila latite vinegar hivi hirivo kao ve avikape kai arero au larive avarape, kai mariape, Kahara, ela va eavakilai, Elias arero helaukakive kihoaukilai la?

³⁷ Iesu ara eapapo hai, ove le avarape.

³⁸ Hehe Uvi ve harihu‐urape au kovaelai hoai ipi ve le paraeape.

³⁹ Arero maeamaea epavape la centurion areve ara iapape kai arero Ove lari parae ra eavi mariape, O iele havahu, maia va Aualari ve Akore havahu.

⁴⁰ Uavila uku kara arai ve ovohae kiva leivahaeape. Ere va uku haela mae: Mary Magdalene, kai Mary James Hekai i Joses ila ve lou, kai Salome.

⁴¹ Ere va areve Galilee hoa arero airekai auvahaeape uavila mae — kai are i hareho Jerusalem pekahavape uavila oaria kara.

Iesu ve karu ihape hoa

⁴² Aka hailaea hoa, ehovea sabati ve ipopeavaki hoa, opoa va sabati hare:

⁴³ Arimathaea haela rare Joseph, mai ehoe counsellor haela, Aualari ve basileia ekekive karipe haela iki hihika havahu Pilate ve leia Iesu ve maea hilahila leipe.

⁴⁴ Pilate va ikihorahora Iesu overa api la, kai centurion itavi velavela leipe are va overa api huru havahu la.

⁴⁵ Are centurion ve oharo ra iapai Iesu ve maea Joseph le avarape.

⁴⁶ Areva pura hauhuka veveke kaivi areve maea kaivi kohahape, kai have ve ihape karu ita are le aipepe — kai have kapu ita ve okiape hovea avarura kokaukape.

⁴⁷ Mary Magdalene i Mary Joses ve lou ila arero aipepe la ita ovohae eavape.