Mark 14 - Pupu Oharo Āre 1963 Genese 1970 Rute 1972

Iesu ve iri haela arero harive oki haropape

¹ Hare orahoka kari leipe. Passover i muramura aue la pai ila ve hurai hare horerape. Oharo haela i hohoa haealula haela ila arero muruhari pae harive okiharo haropape.

² Aka ereve oharo maria, Hurai hare va arekaea, haela oaria heraho eapapo leivahaeaki ave.

Bethany uamari Iesu ve maea la‐apu ve hariripe

³ Are Bethany leia Simon leper haela ve uvi ureve eapai lape la hoa uamari ae, la‐apu muo veveke kavapu avikepe, kavale eapapo iele. Are kavapu koakai muo veveke i la la‐apu areve haro ve kakaita hariripe.

⁴ Uku haela hihiri leivahaeai elare iki ureve kelavape maria, Ipileve ma muramura naoae naoae halakaitapaila?

⁵ Ehovea ma eharu ilaea la leilulava areve kavale 300 denarius hovea avakilai, kai la moni merava haela aiarakilai. Ere va arero o vere avahaeape.

⁶ Aka Iesu maeaeape, Arero o vere va kaelue. Ipileve e va arero hararuarulava ha? Are va araro mai veveke laleila.

⁷ Ehovea merava haela e i hareho mea oaria apealula, kai e va ikivere ra leivahaeakilava, e va erero hare oaria veveke leivahaeakilai. Aka ara mea oaria e i hareho aea va ka.

⁸ Are laleila horova areve ikiore hovea, are va arave maea la haririla ehovea arave aireaki karu ihaki hoa ve.

⁹ O iele ara ero maeaeaive — Oharo Veveke kopurapaki la ita oaria hareho ma uamari ve hari oharo kara kopurapakilai, ehovea areve rare haela oaria iki kelavakilai.

Judas, hihila epaki haela

¹⁰ Judas Iscariot areve 12 i haela ae la — oharo haela ve leia aupe, ehovea arero hihila epakilai.

¹¹ Ere areve oharo iapai ikiveveke eapapo leivahaeape, kai arero moni aiarakive okoare ape. Are arero hihila epakive okiharo haropape.

Iesu ve hita eapai lape hoa

¹² Hurai ve oropa hare, ere va passover mamoe akore hape la hare, areve kilea haela arero maeape, A va ikivere elaviilave passover ita lahoa la karikikive.

¹³ Are va kilea haela orahokaila paparaehape kai erero mari maeaeape, E va karikara hoahukaila — leia evalila ma hahu orai la veakila haela ra eavakilai — arero airekai auvahaeaki.

¹⁴ Are la pekaki la uvi evalila la uvi haela mari maeaki, Haelapo ve oharo maria — Hahi haela ve lalava lahoa — are i kilea haela ila passover eapai larilai la lalava?

¹⁵ Are overa veveke karikipe akea ve lalava eapapo ealilaro kileakilai: Evalila elaviilave la ita overa karikikive.

¹⁶ Areve kilea haela hoahukai karikara ureve arahavape — kai are erealilara maeaeape lahovea eavape. Erealila passover eapai karikipe.

¹⁷ Hailaea hoa are i haela 12 ila hareho pekahavape.

¹⁸ Ere eapai lalavahaeape la hoa Iesu maeaeape, O iele ara ero maeaeaive: Ela i hareho eapai lalavila haela ae araro hihila epakilai.

¹⁹ Ere oaria ikihuru leivahaeai iki arero apeape maeape, Ara la ha? Kai haela ae kara, Ka, ara ha?

²⁰ Are erero kavale maeaeape, Are va 12 haela aeva ara i eapai larikila herehere lariki la haela.

²¹ Iele havahu, haela ve Akore hoaukilai, overa hape la oharo hovea, aka Oia, ehovea arero hihila epaki la haela. Veveke la haela va au epaila.

²² Ere eapai lape la hoa Iesu pai kaivi ra morapaea la haivavaelape kai erero maeaeape, Ai, laila, arave maea va ma.

²³ Are hekako kaivi, thank you oharo ape, kai erero avarape — Ere oaria hareho lalavahaeape.

²⁴ Are erero maeaeape, Maia arave apu okoare are ve, arave ma apu haela oaria ve hakaitapakilai.

²⁵ O iele ara ero maeaive ara va vine apu aireaki le va ka, aiai ara va Aualari ve basileia ureve are larilai.

²⁶ Ere hivi helape, aire mea hoahuka Olivet kela ra pekahavape.

Kilea haela aireaki titavakilai

²⁷ Iesu erero mari maeaeape, E oaria ikihorahora eapapo leivahaeakilai, ehovea overa oharo maria hape, Ara mamoe kiva haela harilai, kai mamoe oaria titava harau le arilai.

²⁸ Kahara, ara va oropa api kai uroukilai, kai eve oropa Galilee aukilai.

²⁹ Peter arero maeape, La maea haela oaria ikihorahora ra leivahaeakilava, ara laria lei va ka.

³⁰ Iesu arero maeape, Ara aro iele ra maeaive, ma hare, ma oroa havahu, a hoa irehoila hoa araro oropa hehepo leikilai, kokora mea hi aire arilai.

³¹ Aka are oharo aheke iele maeape, Ara ka a i hareho ra apakilava, ara aro haure lei va ka. Ere oaria kara laria maeape.

Iesu Gethsemane leia

³² Ere va ita rare Gethsemane pekahavape — Are areve kilea haela maeaeape, E va maia availa — ara va ivaiva arive hoauve.

³³ Are Peter i James i John ila kari ai are i hareho hoahukape. Are iki ihai ikihorahora leipe.

³⁴ Are erero maeaeape, Ara va ikihuru eapapo iele, apaki maeamaea — E maia avai kiva leikive.

³⁵ Are perehekai ai mea ve ekaopape kai ivaiva leipe — ehovea oki hovea la leikilava, areve kakare hoa hareavakive.

³⁶ Are mariape, Aba, Oa e, eharu oaria a va aupovearai. Ma hekako arave oropa ve hareavaki, aka arave iki va ka, a lahua ve iki.

³⁷ Are iki erero avuku eapealula eavape. Are kai Peter maeape, Simon, a avuku ha? A hoa perehekai kiva lei va haveva ha?

³⁸ Kiva lei, ivaiva leiki — ero amuraeharae lei hihilauki ave — Ove iele ikivere, aka aivau ka luluauka.

³⁹ Are va hoai la oharo haroapo kai ivaiva leipe.

⁴⁰ Are ekepe erero avuku eapealula kai eavavahaeape, ehovea ereve ovohae maho iele. Ere va arero kavale oharo maeakive iki horahora.

⁴¹ Are kai hoa irehoila ereve leia ekepe, kai erero maeaeape, E va ma hoa avuku kai iki paparaehaki — kahara, hoveahovea iele, hoa iele ma, iapaila, haela ve Akore ere va haela heahaha ve mai ve hihila le epai.

⁴² Urahukai, elaviila aukilai — eavaila, araro hihila lepaila la haela le ekeve.

Ere Iesu mai paeape

⁴³ Are oharo ape la hoa havahu Judas, 12 haela ila ve haela ae, ekepe. Are i hareho ekevahaeape haela oaria, poke i haru ila. Ere va oharo haela i hohoa haealula haela i haela hoaha ila ve leia ve ekevahaeape.

⁴⁴ Arero hihila epape la haela erero ihova maeaeape maria, Ara ape la popoaki la haela are va la. Arero mai pae, auhohi lai aukive.

⁴⁵ Are iki areve leia ehoe pekai mari maeape, Rabbi e, kai arero ape popoape.

⁴⁶ Ere arero mai pai lai aupe.

⁴⁷ Arero maeamaea epavape haela ae poke hareavi akea oharo haela ve horova haela ve avako kohareavape.

⁴⁸ Iesu erero kavale maeaeape, E va araro korea haela hovea arive leikila ha, poke i haru ila va ai leikila mai paeakive ha?

⁴⁹ Ara hare oaria Hehe Uvi leia oharo kileavahaeape — e va leia araro au paeaila. Aka ma horova iele laleila ehovea overa hape buka oharo iele leikilai.

⁵⁰ Ere oaria arero harepai oaoka lei hukaupe.

⁵¹ Haela ae are areve maea avuku pura naoae hahai arero airekai aupe.

⁵² Ere va la haela mai paeape, aka are la pura aukapai maheare vivilape.

Iesu Akea Oharo Haela oropa ve

⁵³ Ere Iesu akea oharo haela ve oropa lai aupe. Oharo haela oaria i hoaha haela, i hohoa haealula haela ila hareho leia korukaiavahaeape.

⁵⁴ Peter arai ve erero airekai aupe — Akea oharo haela ve ara ureve kara: Are leia kiva haela ila hareho avape, areve maea a koape.

⁵⁵ Oharo haela, Counsellor haela oaria ila Iesu ve rare ve hahaki hukavaki haela haropape, aka ere va au koaraila.

⁵⁶ Aka opopoe hukavi arero hahakive leipe haela oaria hareho ekevahaeape, aka ereve oharo oaria elarelare hiki, hoveahovea au leila.

⁵⁷ Uku haela urahukai areve rare ve opopoe hukavape maria, Ela iapape are mariape,

⁵⁸ Mai kupe ma Hehe Uvi ara va kopararapakilai, kai hare irehoila are kai urapakilai, mai horova lei va ka.

⁵⁹ Leia kara ere va iki heaha leipe hiki, kai ereve oharo hovea hovea au leila.

⁶⁰ Akea oharo haela aru hihi ve urai Iesu mari velavela leipe, Ave kavale oharo karia ha? Ere va aro hahaki la oharo iele lehae ha?

⁶¹ Are kai muruha hiki epavape, kai kavale oharo au maeaila. Akea oharo haela arero kai velavela leipe maria, A va Keriso ha, Hehe haela ve Akore ha?

⁶² Iesu maeape, Ara va lae. E va Haela ve Akore Aheke ve mai ore ukai ve mavaila kai kaia ve meuru ureve meikila eavakilai.

⁶³ Akea oharo haela elare pura haipararapai maria, Ela va kepea oharo hukavaki haela haropava ka. E va areve oharo heaha overa iapai.

⁶⁴ Eve iki leari kelavaro ha? Ere oaria arero hahai avikakive kelavape, are apakive i.

⁶⁵ Uku areve maea apea koape, uku areve oropape ra kokauka arero naoae naoae koape kai mari maeape, Peroveta oharo arive. — Horova haela kara arero mai koavape.

Peter ve hehepo

⁶⁶ Peter ara ureve ipi ve avape la hoa akea oharo haela ve horova mari ae ekepe:

⁶⁷ Are Peter maea ra a koavila eavape kai arero auhohi eavi mari maeape, A kara Iesu la Nazareth haela koarai aeape.

⁶⁸ Aka are areve oropa hehepo lei mari maeape, Ara ave la oharo horahora leive — kai ave la oharo ara iapa va ka. Are kai okiape mahokaea ve hoaupe — kai kokora mea hi le ape.

⁶⁹ Horova mari ae arero kai eavape kai maeamaea epavape haela oaria maeaeape, Areve haela aeka ma.

⁷⁰ Are kai hehepo leipe. Haiapo ka, maeamaea epavavahaeape haela uku Peter maeape, Iele havahu a kara areve haela ae, ehovea a va Galilee haela, kai ave ape Galilee haela ve ape hovea.

⁷¹ Aka are ikiheaha lei erero oropai maeaeape, E arura ma haela ara ka haveva.

⁷² La hoa havahu kokora mea hoa orahokaila hi ape. Peter Iesu arero maeape la oharo iki le kekelape, ehovea Iesu arero mari maeaeape, A va araro hoa ilehoila overa hehepo leikilai, kokora mea hoa orahokaila hi aire arilai. Are va la oharo kekela ikihuru eapapo lei hi eapapo ape.