Mark 12 - Pupu Oharo Āre 1963 Genese 1970 Rute 1972

Vine oru ve parabole

¹ Are aeka erero parable kileavahaeape. Haela ae vine oru apoporaupe, kara hahape, vine apu ve koru ihape, kai huita uvi kupe, kai haela uku kiva leikive haitapape. Ipi havahu haela ita apehai hahi aupe.

² Vine hae hovare hoa are horova haela haroapo la kiva haela kai paraeape, ehovea ereve la oru ve iele aeakive.

³ Ere arero mai pae haru koa mai ka paraeape.

⁴ Are kai haela ae paraeape — Ere arero have haru huhari haro koekape, kai arero lei heaha iele lei avaki paraeape.

⁵ Are kai haela ae paraeape, ere arero haru hape — aeva haela oaria kara — ere lari uku haeape, kai uku huru havahu haeape.

⁶ Are havahu ve akore koare haroapo hiki aeape. Are aireaki la akore paraeape, kai mariape, Ere arave akore ae va morapaeakilai la.

⁷ Aka la kiva haela elare mari hukavape, Maia akore koare: Ekeila, elaviila arero harilai, aireaki ela hiki haruku le avakilai.

⁸ Ere arero kaivi huru le hape, kai oru mahokaea ve aukapape.

⁹ La vine oru ve amua leari leikilai ha? Are aireaki kihoauki la hoa, are la kiva haela hai ka leikilai, kai vine oru haela ae avarakilai.

¹⁰ E va overa buka oharo va murea va ka ha? Uvi kukueape haela haure leipe la have, Are va uvi ve aihari hovea leipe.

¹¹ Ma va Amua ve horova, Kai elave ikikekela are va elaro ovopavea hovea heauapape.

¹² Ere va ikivere arero kai paeakive — aka ere haela oaria oaoka, ehovea ere ore leipe are va la parable ere v'ila hukavape. Ere arero harepai elare ita auvahaeape.

Caesar tax avarakive ha?

¹³ Ere Pharisee haela, Herodian haela uku ila areve leia paparaehape ehovea arero oharo harapaila hukavakive, arero au amuraeakive.

¹⁴ Ere iki arero mari maeape, Haelapo, ela va ore ave mai iele, kai a va haela ve oharo oaoka lei va ka, ehovea a haela ve oharo kekela va ka, aka Aualari ve okiharo iele iele kileavila. Ave iki leari ha? Tax moni Caesar ra avarakive, heroe ha, aka heaharia ha?

¹⁵ Ela avarakilai ha, aka arekaea. Are ereve hehepo ore leipe, kai erero mari maeaeape, Ipileve e araro amuraeairo ha? Denarius haroapo avikela, ara ovohae eavakive.

¹⁶ Ere denarius haroapo avikepe. Are erero maeaeape, Ma ove i hohoa ila va leita ve ha? Ere va arero maeape, Caesar ve.

¹⁷ Iesu erero kavale maeaeape, Caesar ve eharu Caesar aiaraki, Aualari ve eharu Aualari aiarakive. Ere va ikihorahora eapapo leivahaeape.

Api kai urouki oharo

¹⁸ Aireaki Sadducee haela areve leia auvahaeape. Ma haela ve ikikekela apihaealula haela aireaki urahuka va ka. Ere arero velavela leipe maria,

¹⁹ Haelapo, Moses ela ve mari hape Haela ae akoreapo ra apakilava, kai areve uva maitava ra harepakilava, akoremari va ka, areve akoreheari la uva maitava laeakilai, akoremari ra erakilava, akoreapo ve akoremari lae.

²⁰ Ere va apoheari seven ila. Akore koare uva lai le apape, akoremari va ka.

²¹ Aireaki haela kai le apape, are kara akoremari va ka. Aireaki haela kara laria.

²² Apoheari 7 arero laeape, akoremari karia. Aireaki uamari kara le apape.

²³ Aireaki ovokake urahukaki la hoa arero leita laeakilai, kai are va leita ve uva ha?

²⁴ Iesu erero kavale maeaeape, E va haeae eapapo, ehovea e va buka ve oharo haveva, kai Aualari ve aheke kara.

²⁵ Ehovea aireaki apihaea urahukaki hoa — ere va uavila kara va ka, ere va kaia apealula la aneru oaria hovea hovea.

²⁶ Apihaea haela urahukakive la oharo maria: E va Moses ve buka ureve au mureaila ha? Huakara leia Aualari arero maria maeape, Ara va Abraham ve Aualari, Isaac ve Aualari, kai Jacob ve Aualari.

²⁷ Are va apihaeroape haela ve Aualari va ka, aka ovokake haela ve Aualari, laelave eve haeae eapapo.

Oropa pupu iele

²⁸ Hohoa haeavila haela haroapo ereve hukavaki oharo iapape, kai Iesu ve kavale ehoe iapape, are arero velavela leipe maria, Oropa ve le la pupu ha?

²⁹ Iesu arero kavale maeape, Oropa havahu pupu ma — Israel haela e, Amua elaviila ve Aualari, are va Amua haroapo.

³⁰ A va ave Amua Aualari, ave iki oaria, ave ove oaria, ave ikikekela oaria, ave aheke oaria ila a va ikivere iele leikive. Ma va oropa pupu koare.

³¹ Areve aire pupu laria, A elare maea la ikivere leivila hovea a i hareho apealula la haela kara ikivere leikive.

³² La hohoa haeaveape haela arero maeape, Veveke, Haelapo, a va oharo iele laila — Ehovea Aualari va haroapo hiki, ae va karia, are hiki.

³³ Kai iki oaria, ikikekela oaria, ove oaria, aheke oaria ila arero ikivere leikive, kai elare maea ra ikivere leivila hovea ela i apealula haela ikivere leikive, leia pupu veveke eapapo, maea morava mai ve hovea lei va ka.

³⁴ Iesu areve kavale oharo ehoe ra iapai are arero maeape, A va Aualari ve basileia ve arai va ka, maia iele la. Aireaki haela oaria arero velavela leikive horahora hiki.

Keriso, David ve meavore

³⁵ Are va Hehe Uvi ureve kileape la hoa Iesu mari maeape, Ipileve hohoa haealula haela Keriso David ve akore rare arurava ha?

³⁶ Ehovea David havahu Ove Veveke v'ila mari maeape, Amua arave Amua maeape Arave mai ore ukai availa Aiai ave iri haela oaria ara ave loa pavaki eharu hovea leikive.

³⁷ Laelave David havahu arero Amua rare itavape — Are va learia lei areve akore leikilai ha? Karikara haela oaria areve oharo iapai ikiveveke leivahaeape.

Hohoa haela ve mai kiva leiki

³⁸ Areve kileaki oharo uku maria, Hohoa haealula haela kiva leila — Ere va pura heahapiki ikivere leilula, kai karikara hihi maea pelaea oharo haropalula.

³⁹ Kai synagogue ureve oropa avakive ikivere, kai hurai hoa ve akea ita kara.

⁴⁰ Ere uavila maitava ve eharu korea leilula, kai opore ivaiva heahapiki ila arura. Ere va aireaki hoa heaha eapapo koarakilai.

Uva maitava ve meru

⁴¹ Iesu Hehe Uvi meru paparaehaki la aroate maeamaea avape kai haela ve meru paparaehaki mai ovohae eavape. Erohoho haela moni oaria paparachape.

⁴² Uamari dedehi merava pekai have koru titaeka orahokaila (Peni haroapo hovea) paraeape.

⁴³ Are va areve kilea haela itavavahaeai mari maeaeape, O iele ara ero maeaeaive — ma uamari dedehi merava, are va oaria paparaehape, erohoho haela oaria areve hovea au leila.

⁴⁴ Ehovea ere va oaria moni eapapo haela, laelave perehekai hovea paraeape — aka are ve moni perehekai, kai la perehekai are oaria hareho paraeape.