Mark 10 - Pupu Oharo Āre 1963 Genese 1970 Rute 1972

Uva i vila ila haure leiki oharo

¹ Are leia harepai urai Jordan la ukai Judea ita ve elaupe. Haela areve leia kai korukaiavahaeape — are aeka erero kileavahaeape, areve hare oaria va la mai hovea.

² Pharisee haela iki areve leia arero velavela leipe maria, Haela ae va areve uva haure leikive pupu karia ha? Ere arero au amuraeape.

³ Are erero kavale oharo maeaeape, Moses ero leari kileavahaeape ha?

⁴ Ere arero maeape, Moses uamari haure leiki pepa harive kai uva haure leikive maeape.

⁵ Iesu erero kavale maeape, Are lari kileape ehovea eve iki aheke iele.

⁶ Aka avare koai meahaiapo ipopeavape la hoa Aualari mea i avu ila karikivahaeape.

⁷ Ehovea ma, haela areve oa i lou ila haitapai uamari hiki kiva leikive.

⁸ Erevalila aivau haroapo hovea leikilai, laelave erealila aireaki orahoka va ka, aka aivau haroapo hiki.

⁹ Aualari erealilara hahaeape la ela haela ka hehelaukalue.

¹⁰ Uvi ureve areve kilea haela arero kai ma oharo apevelavela leipe.

¹¹ Are erero maeaeape, Haela ae areve uva haure ra leikilava, kai uamari lahua ra laeakilava, are va la va airi pavora maea ra leive.

¹² Uamari ae vila haure ra leikilava, kai haela ae arero ra laeakilava, la uamari kara airi pavora mai ra leive.

Iesu akoremari titaeka le momorapupe

¹³ Ere akoremari titaeka areve leia kari ekevahaeape, ehovea are erero mai koharakive. Areve kilea haela erero kari ekevahaeape haela oropai maeaeape.

¹⁴ Iesu laria eavi ikihairihairi eapapo leipe kai mari maeaeape, Akoremari titaeka arave oki kari ekeila, erero aikahukamaealue, ereve oropa va kahereavalue, kai hakaruarue, ehovea Aualari ve basileia ereve.

¹⁵ O iele ara ero maeaeaive — Haela Aualari ve basileia akore hekai maea ve iki hovea avaki aue ra leikilava, are va leia araea va ka.

¹⁶ Are erero mai papaehai arahu hahavi momorapupe.

Erohoho harokou haela ovokake haiapo haropape

¹⁷ Are oki ve aupe la hoa haela ae harava vivila areve oropa ekaopi mari maeape, Haelapo mekakure e, ara va le la mai leikilai, ovokake haiapo va aeakive?

¹⁸ Iesu arero maeape, Ipi leve a araro mekakure rare va ave? Haela oaria mekaka va ka, Aualari hiki.

¹⁹ A va pupu oaria va ore — Airi pavora mai va kalailue: Haela kahaealue, korea va kalailue, opore keheheavalue, hehepo kalailue, oa i lou kai momorapuki.

²⁰ Are arero kavale maeape, Haelapo, ma pupu oaria ara va hekai hoa aiai ma hoa kiva leivahaevila.

²¹ Iesu arero eavi ikivere eapapo leipe, kai arero mari maeape, Ava eharu haroapo hiki karia — aula, ave eharu oaria hareho ilaea lei va, ereve kavale merava haela aiaraki — a va kaia ve erohoho oaria aeakilai. A kai ekela, ave satauro oraiavi araro airekai ekela.

²² Are la oharo iapai ikihuru lei elare ita le aupe. Ehovea are va erohoho oaria haela.

Erohoho va hereveaki eharu

²³ Iesu helari kai kilea haela oaria maeaeape, Erohoho oaria la haela Aualari ve basileia arahavakive heraho iele.

²⁴ Kilea haela areve la oharo iapai ikihorahora eapapo leivahaeape. Aka Iesu erero aeka kavale oharo maeaeape, Akoremari e, erohoho la kekelalula haela Aualari ve basileia arahavakive va heraho eapapo iele.

²⁵ Kamela karahe ve ura ve ukaki ai horerakilai heraho va perehekai, aka erohoho oaria haela Aualari ve basileia araeakive va heraho eapapo iele.

²⁶ Ere va ikihorahora eapapo havahu leivahaeape kai mari maeape, Ovokake leita leikilai ha?

²⁷ Iesu erero ovohae eavi mari maeaeape, Haela ae va ore va ka, aka Aualari eharu oaria aupovearai la.

²⁸ Aire Peter arero maeape, Iapaki, ela eharu oaria haitapai aro airekai ekevahaeape.

²⁹ Iesu kavale maeaeape, O iele, ara ero maeaeaive — uvi, aka apoheari aka maritaloa, aka oa, aka lou, aka uva, aka akoremari, aka elare mea, haitapape la haela oaria, ehovea arave harihari, kai ehovea oharo veveke ve harihari—

³⁰ ere hoa 100 hovea aeakilai, ma hoa havahu, uvi, kai apoheari, kai maritaloa, kai lou, kai akoremari, kai mea, aka hararuaki kakare kara, kai aireaki basileia hoa, ovokake aiai kari lei va ka.

³¹ Aka oropa haela oaria aireaki leivahaeakilai, kai aireaki haela oaria oropaki leivahaeakilai.

Iesu ve aireaki apaki oharo aea

³² Ere Jerusalem la okiharo auvahaeape. Iesu ereve oropa aupe, kai ere oaria iki horahora leivahaeape: ere areve airekai auvahaeai oaoka leivahaeape — Are areve haela 12 lahua kari ai erero areve aireaki koaraki kakare oaria kileavaha ipopeavape,

³³ Maria, Iapai — ela ma hoa Jerusalem pekahavaro — ere leia haela ve Akore oharo haela i hohoa haealula haela ila la avarakilai. Ere va arero heheavi harive paraeakilai, kai arero ita lahua haela avarakilai.

³⁴ Ere arero ihape leikilai, haru harilai, areve maea apea koakilai, kai arero huru harilai. Hare irehoila are kai karu ve ra uroukilai.

James i John ila ve apevelavela haeae

³⁵ James i John ila, Zebedee ve akoremari areve leia iki mari maeape, Haelapo e, ela ikivere a elaro elave ikivere hovea aikiarakive.

³⁶ Are erero maeaeape, Ealila ve ikivere ara ealilara leari leikive ha?

³⁷ Erealila arero maeape, Maia ve elalilaro aikiara, a va ave Basileia ra avakilava, aeva ave mai ore ukai ve aeva ave mai keva ukai ve haiavakilai.

³⁸ Aka Iesu erealilara maeaeape, Ealila velavela laleila la eharu e va haveva. Ara lari la hekako, ealila le va ore ha? kai araro bapatiso leiki la ma e va leia bapatiso leiva ore ha?

³⁹ Erealila arero kavale maeape, Elalila ore. Iesu erealilara maeape, Iele havahu ara lari la hekako ealila larilai, kai araro bapatiso leiki la ma, ealilara bapatiso leikilai.

⁴⁰ Aka arave mai ore ukai ve aka mai keva ukai ve avakive, leia arave avaraki eharu va ka, aka Aualari overa kekalape la haela leia ra avarakilai.

Akea mai iele

⁴¹ Kilea haela ae va la oharo iapai ere oaria John i James ila ikiheaha leivahaeape.

⁴² Aka Iesu erero itavavahaeai mari maeaeape, E va ore ita lahua haela ere amua elare momorapurula, kai ereve oropa haela elare pelaea leivahaelula.

⁴³ E va lari kalailue. Eve oropa ikivere leiki la haela, are va eve kiva haela hovea leikive, heroe.

⁴⁴ Eve amua hovea ikivere leikive la haela are va haela oaria ve horova haela hovea leikive, heroe.

⁴⁵ Ehovea haela ve Akore kara ekepe ehovea haela arero kiva lei va ka, aka ehovea haela oaria are havahu kiva leikive, kai areve ovokake havoavakive ehovea haela oaria lei makukurikive.

Bartimaeus ovohae kohelaukape

⁴⁶ Ere Jericho pekahavape. Are i kilea haela i haela oaria kara Jericho harepai hoahukape la hoa ovohae kariri haela rare Bartimaeus, Timaeus ve akore, oki poe ve, meru here leikive haiavape.

⁴⁷ Are Iesu Nazareth ve rare iapape la hoa are ara hai itavape maria, Iesu, David ve akore, araro ikiheroe hela leila.

⁴⁸ Haela arero maeape, Oharo kailue, aka are ara oaria hape maria, Iesu, David ve akore, araro ikiheroe hela leila.

⁴⁹ Iesu au hiki epavape kai arero itavakive maeaeape — Ere ovohae kariri haela itavi mari maeape, Ikiveveke leila, urou, are aro itavave.

⁵⁰ Are areve pura aukapai urai Iesu ve leia hoaupe.

⁵¹ Iesu arero kavale oharo maeape, A va ikivere ara aro leari leikive ha? Ovohae kariri haela maeape, Amua, arave ovohae hela kohehelaukakive.

⁵² Iesu arero maeape, Aula, ave ikikekela aro veveke laleila. La hoa havahu areve ovohae kohehelaukape.