Mark 1 - Pupu Oharo Āre 1963 Genese 1970 Rute 1972

John Baptist i areve kileaki oharo ila

¹ Iesu Keriso, Aualari ve Akore ve hari veveke avare koai ipopeavaki oharo mae:

² Peroveta buka hohoa mari hape: Iapaila — Ara arave paraeaki haela ave oropa ve paraeave, Are va ave okiharo ave oropa karikikilai.

³ Ara ae ita merava harila maria, Amua ve okiharo karikikive, Areve oki ita pakupaku oaria heheapa leikive.

⁴ John ita merava bapatiso leipe, mai haeae kara ve ikihuru bapatiso leiki oharo iroro ape, mai heahaha hapururukaki la okiharo.

⁵ Areve leia arahavape Judea ita haela oaria hareho — Jerusalem haela kara. Ere oaria areve bapatiso Jordan mai ve avahaeape, kai ereve mai haeae oaria hihi la horeavape.

⁶ John ve maea pura kamela koro, areve erekai boromakau iilu, areve eapai paitau i avare ila.

⁷ Are iroro mari ape, Ara va hekai, arave aireaki ra ekeki la haela are va eapapo, aheke iele. Areve loa iilu ela ara ekaopi helaukakive hovea va ka.

⁸ Ara ero ma ve bapatiso la leivahaeaive, aka are va ero Ove Veveke ve bapatiso leivahaeakilai.

Iesu ve bapatiso hoa

⁹ Aireaki Jesu Nazareth Galilee ve ukai ve ekepe, kai John arero Jordan mai ve bapatiso leipe.

¹⁰ Are ma ve ehoe havahu urai pekape, kai kaia hapai la eavape, kai Ove hivi akore hovea areve akea ve kihoauvi ra eavape.

¹¹ Ara kaia ve kihoaupe maria, A va ara iki akore havahu, ara a v'ila ikiveveke eapapo leivila.

Amuraharae hoa

¹² Ove arero ehoe hiki ita merava lai aupe.

¹³ Are va ita merava hare 40 ila aeape. Leia Satan arero kurupaeape. Are aeha eharu i hareho apearoape. Aneru arero kiva leipe.

Iesu horova ipopeavape

¹⁴ Ere John uvi muru oropa paraeape, aireaki Iesu Aualari ve iroro avila Galilee aupe.

¹⁵ Are mariape, Hoa havahu ma, Aualari ve basileia maia iele. Eva iki helarivahaeaila, kai oharo veveke iapai iele kelavaila.

Oropa itavavahaeape kilea haela

¹⁶ Are va Galilee ma haru poe ve veavelari Simon i akoreheari Andrew ila ekaka ve keve i loalula eavape, ehovea erealila ekaka haropa haela.

¹⁷ Iesu erealilara maeaeape, Ari ekei. Ara ero haela ekaka hovea haropa rare arilai.

¹⁸ Erealila elavelave keve harepai arero airekai auvahaeape.

¹⁹ Are v'ai perehekai arai maea — James Zebedee ve akore kai John areve akoreheari ra eavape. Erealila vevaea ureve keve ura ra hahaeavaroape.

²⁰ Are erealilara elavelave itavape, kai erealila Zebedee i horova haela vevaea ureve haitapai arero airekai auvahaeape.

Iesu Capernaum ovehahu haela lei veveke leipe

²¹ Ere va Capernaum arahavape — la sabati hare are synagogue pekai oharo kileape.

²² Ere va areve kilea oharo ra iapai ikihorahora eapapo leivahaeape, ehovea are erero kileavahaeape oharo aheke iele, hohoa haealula haela are hovea va ka.

²³ Ereve la synagogue ureve ove heaha ila haela haroapo la hare pekape. Are ara hai maria itavape:

²⁴ Elaro ka hararuarue! A va elaro learia leikive leive ha Iesu Nazareth ve? A v'iki elaro haika leikive ha? Ara aro ore — a va Aualari ve Hehe Haela.

²⁵ Iesu arero oropai maeape maria, Oharo va arekaea, arero harepai kihorera.

²⁶ La ovehahu areve maea uki hareavi ara hai eapapo itavi le harepape.

²⁷ Ere oaria ikihorahora eapapo leivahaeai elarelare velavela leivahaeape maria, Maia va le ha? Ma va le oharo are ha? Ehovea are va aheke ila ovehahu aihukamaeavila kai ere oaria areve oharo iapai leilula.

²⁸ Areve hari Galilee ve ita oaria hareho kopurapape.

Iesu Peter ve uva ve lou lei makuripe

²⁹ Ere va synagogue kihoahuka — James i John ila hareho, Simon Andrew ila ve uvi pekahavape.

³⁰ Aka Simon ve uva ve lou maea hahaita heaha lei uavape, kai ere arero maeape.

³¹ Are iki arero mai pae lai uroupe. Areve maea veveke la hoa leipe, kai are erero kiva leivahaeape.

³² Hailaea, hare hoaupe hoa, ere va areve oropa kari ekevahaeape maea heahaha lahua lahua haela oaria, kai ovehahu ila haela oaria kara.

³³ Karikara haela oaria okiape mahokaea ve korukai avape.

³⁴ Are maea heahaha haela oaria lei makukuripe, kai ovehahu oaria haruapape. Are la ovehahu oaria ve oharo haerapape, ehovea ere arero ore leipe.

Iesu ita merava muruhari ivaiva leipe: Are Capernaum harepape

³⁵ Vevelare, mea opaki hoa, are urai mea hoa ita merava araeape, kai leia ivaiva leipe.

³⁶ Simon i hareho apeape la haela arero airekai auvahaeape.

³⁷ Ere arero eavi mari maeape, Haela oaria aro haroparo.

³⁸ Are erero maeaeape, Ekeila, elaviila karikara aea auvahaeakilai — ara leia kara iroro arilai: ara va kihoaupe iele va la.

³⁹ Are Galilee ita oaria ereve synagogue iroro ape, kai ovehahu haruapape.

Leper haela lei veveke leipe

⁴⁰ Leper haela aea areve oki iki areve oropa ekaopi velavela maria leipe: A ikivere la leikilava, a va araro veveroro leikilai.

⁴¹ Iesu arero ikihuru eapapo leipe. Are areve mai avihorapai arero mai kohari mari maeape, Ara ikivere — a veverero leila.

⁴² Are la oharo avi, haiapo ka, areve leper maea kari le leipe, kai are va maea veveroro leipe.

⁴³ Are arero oharo aheke maeape, kai arero parae aupe.

⁴⁴ Are arero maeape, Kiva leiki — haela oharo va naoae kamaeaelue: aka elare ukaki aula, ave maea oharo haela amoeaki, Moses ihova ve maea veveroro leiki la kavale maeape avaraki.

⁴⁵ Aka are hoai oharo oaria hihika maeape, ita oaria la oharo kopurapape. Laelave Iesu karikara hihi hoauki oki karia. Are va karikara mahokaea hiki aeaveape — kai ita oaria haela areve leia hoahukape.