Luke 7 - Pupu Oharo Āre 1963 Genese 1970 Rute 1972

Centurion ve horova haela

¹ Are haela oaria ve oropa ve hukavape la oharo karia lei Capernaum karikara pekape.

² Centurion ae ve ikivere eapapo leipe horova haela maea heaha koarai apaki maea iele.

³ Are kai Iesu ve hari iapai Jew haela hoaha uku Iesu ve leia paparaehape ehovea arero velavela leikive areve leia iki la horova haela lei makurikive.

⁴ Ere Iesu ve leia auvahaeai arero apevelavela maria leipe, Are ve ma horova leikive hovea.

⁵ Ehovea ma centurion elaviila ve haela ikivere leivahaevila, kai are havahu elave synagogue kupe.

⁶ Iesu erero koarai aupe la uvi pekakive maea hiki hohipe: la centurion areve apavara paparaehai mari maeape, Amua e, a heraho kalailue; ara hovea ka a arave uvi pekakive.

⁷ Laelave, arave ikikekela ara kara ave leia ve aukive hovea ka: A oharo hiki maeaki, arave horova haela lei makurikilai.

⁸ Ehovea ara kara oharo iapaivila haela — ara ma haela maeakilai, Aula, are aukilai, aeva ma haela, Ekela, are ekekilai: Ara kai arave horova haela — Maia leila, are leikilai.

⁹ Iesu ma oharo iapai ikihorahora lei helari are i hareho auvahaeape la haela oaria mari maeaeape, Ara ero maeaive — Ara va maria ikikekela Israel ita oaria au koaraila.

¹⁰ Au paparaehape la haela helari auvahaeai uvi pekahavi horova haela veveke leila eavape.

Nain uva maitava ve akore lei ovokake leipe

¹¹ Hare aea, are karikara rare Nain pekape. Areve kilea haela i haela oaria iele are i hareho pekahavape.

¹² Are karikara okiape maeamaea epavape. Iapaila, ere au apape haela oraiavi ekepe: areve lou ve akore haroapo la. La lou kara uamari maitava. Karikara haela oaria arero koarai ekevahaeape.

¹³ Amua la uamari eavi ikihuru eapapo lei mariape, Hi va kailue.

¹⁴ Are maeamaea epavi haha mai paeape. Haha oraiavape la haela au epavaheape. Are kai mari maeape, Harokou e, ara aro maeaive — Urou.

¹⁵ Apape la haela urai au haiavi oharo le hukavape. Are arero areve lou la avarape.

¹⁶ Ere oaria oaoka eapapo leivahaeai Aualari ve rare mari morapaeape, Elaviilave aru ve peroveta haela aheke le uroupe — Aualari areve haela eavakive kihoaupe.

¹⁷ Ma hari Judea ita oaria le kopurapape kai maeamaea ita oaria kara.

John Baptist

¹⁸ John ve kilea haela arero ma eharu kileape.

¹⁹ John areve kilea haela orahokaila itavavahaeai Amua ve leia paparaehape ehovea maria oharo maeakive, Ekeki rare arura haela va a ha, aka ela haela ae la karikilai ha?

²⁰ Erealila iki areve leia maria maeape, John Bapatiso elaro a v'ila velavela leikive lakipaparaehaila — A va ekeki rare arura haela ha, aka ela va haela ae la karikilai?

²¹ La hoa are maea heahaha oaria lei makukuripe, kai ovehahu oaria haruapape: Are ovohae kariri haela oaria ovohae kohehelaukape.

²² Are kai erero kavale mari maeaeape, Eali la aukilava ealila laeavila kai le iapaila ma eharu oaria John la kileaki: Ovohae kariri haela ovohae le kohehelauka — loa hahaeae haela loa ehohoe laleivahaeaila, leper haela maea mekaka laleivahaeaila, avako ipi hahuru haela oharo le iapaila, au apihaearoape haela le urahukai, merava haela oharo veveke ve iroro le iapaila.

²³ Ara v'ila hilauki aue la haela ikiveveke leila.

²⁴ John paparaehape la haela oropa auvahaeape, aire Iesu haela oaria John v'ila mari maeaeape, E va huakara arahavape ehovea le eharu eavakive ha? Mea vavaraivila hirivo ha?

²⁵ Aka eva le eharu eavakive arahavape ha? Pura mekaka oreaupe haela ha? Iapaila — Pura mekaka haela i eapai oaria haela va Amua ve uvi apealula.

²⁶ Aka e va le eharu eavakive arahavape ha? Peroveta haela ha? Kaire, ara ero maeaeaive — peroveta ve oropa haela la.

²⁷ Ma va overa hape oharo haela ma: Iapaila, ara va arave paraeaki haela ave oropa paraeaive, Are ave oki oropa i karikikilai.

²⁸ Ara ero maeaeaive: Uavila erarura haela oaria ipi ve, John va akea ve — aka Aualari ve basileia ureve hekai iele la haela are va John akea ve.

²⁹ La oharo iapape haela oaria, tax korukaia haela kara, Aualari ehoe rare ape, ehovea ere va John ve bapatiso leivahaeape haela.

³⁰ Aka Pharisee haela i pupu ore haela ila Aualari ve kilea oharo hahaure leivahaeape ehovea John erero bapatiso au leila.

³¹ Laelave Amua mari ape, Ara va ma vilakao haela oaria learia maea maeakilai — ae va ere va leari maea ha?

³² Ere va karikara hihi avai elarelare itavavahailula akoremari hovea: ereve oharo maria, Ela va hivi lahelaila, e ka mahea au harapuki. Ela va hivavara avahaeape, e ka ikihuru au leila.

³³ Ehovea John Bapatiso eapai i ma ila haure lei ekepe — e kai maria avahaeape, Are va ovehahu ila.

³⁴ Haela ve Akore eapai i ma ila la ekepe — e kai mari avahaeape, Eavaila, e lahua i ma oaria lalavila haela, tax korukaia haela i mai heahaha haela ila ve haelakaru.

³⁵ Ikiore ve akoremari ikiore ve rare morapulula.

Iesu ve loa hariripe. Apekorea haela orahokaila

³⁶ Pharisee haela ae va ikivere are are i hareho leia eapai larive. Are la Pharisee haela ve uvi pekai eapai larive haiavape.

³⁷ Iapai, La karikara mai haeae uamari ae va Iesu Pharisee haela ve uvi eapai lape la oharo iapape. Are va muo veveke eharu kavapu avikepe.

³⁸ Are areve airekai hi avila epavi areve loa o ma ila huhelape: Are kai areve haro kolo areve loa haroavape, kai areve loa hauko ape popoa la‐apu hariripe.

³⁹ Pharisee haela lari eavi elare iki mari kekelape, Ma haela peroveta haela ra leikilava are va ore leikilai ma arero mai lapaeaila uamari leari uamari la, ehovea are va mai haeae uamari.

⁴⁰ Iesu arero kavale mari maeape, Simon e, ara va ikivere aro oharo maeakive. Are kai maeape, Haelapo, hoa kimaea.

⁴¹ Moni avaraki haela ae haela orahokaila moni aiarape. Erealila ve apekarava aeva 500 denarius, aeva 50 denarius

⁴² Ehovea erealila ve kavale leiki moni karia, are erealila ve apekarava hapururukape. Leita haela arero ikivere eapapo leikilai ha?

⁴³ Simon kavale maeape, Apekarava eapapo ve hapururukape la haela. Are kai arero maeape, Ava ehoe laheheavaila.

⁴⁴ Are la uamari ve ukaki helari Simon mari maeape, Ava ma uamari va eavave ha? Ara va ave uvi lakivikaila — a va araro loa huhelaki ma au avikiaraki — aka are arave loa areve o ma lahuhela, erero areve haro kolo ila haroavape.

⁴⁵ A va araro ape au popoakue, aka ara lakivikaila hoa ikiki mahau are arave loa ape la popoaila.

⁴⁶ A va arave haro la‐apu au haririkue, aka are arave loa la‐apu ila halaroroaila.

⁴⁷ Laelave ara aro maeaive — Areve mai hahaeae, ere va iele oaria, le hapururuka, ehovea are ikiheroe eapapo laleila, aka haeae perehekai hapururukape la haela, are kara ikiheroe perehekai leivila.

⁴⁸ Are la uamari maeape, Ave haeae le hapururukai.

⁴⁹ Are i hareho eapai lalavahaeape la haela elarelare oharo maria hukavape, Ma mai hahaeae hapururukaki haela va leita ha?

⁵⁰ Are kai uamari maeape, Ave ikikekela aro ovokake laleila; havila i aula.