Luke 6 - Pupu Oharo Āre 1963 Genese 1970 Rute 1972

Sabati kiva leiki mai

¹ Sabati hare ae are wheat oru araeape — areve kilea haela wheat hae la ikaeai mai rokoavi le lakarape.

² Pharisee haela uku maeaeape, Ehovealeve e lari leilulava sabati hare pupu ila?

³ Iesu erero kavale mari maeaeape, E va ma oharo au mureaila ha, David leipe la horova? Are eroa hape la hoa are i hareho auvahaeape la haela.

⁴ Ere Aualari ve Uvi pekahavi arura la eapai ere kairi le lape: Are i hareho pekahavape la haela kara are aiarape — La eharu pupu ila, oharo haela ve eapai hiki.

⁵ Are kai erero mari maeaeape, Haela ve Akore are va Sabati hare ve Amua.

⁶ Sabati hare ae are synagogue pekai oharo kileape. Leia mai ore ukai horo au hareavape haela epavape.

⁷ Hohoa haealula haela i Pharisee haela ila arero ovokape ehovea ore leikive are sabati hare maea veveke leikilai la, ehovea ere va arero harapaila amuraeakive oharo haropape.

⁸ Ere elare iki ri ape la oharo, are ore lei, horo au hareavape la haela mari maeape, Urou, ereve aru ve urai pavi. Are kai urai ereve aru ve la pavape.

⁹ Iesu erero maeaeape, Ara ero velavela leive — sabati hare veveke leikive aka heaha leikive, pupu learia ha? Haela ve ovokake avarakive, aka hareavakive ha?

¹⁰ Are aire elari haela oaria ovohae eavi la haela maeape, Ave mai au horapa. Are lari lei areve mai veveke le leipe.

¹¹ Ere oaria arero hihiri eapapo leivahaeai elarelare oharo hukavape ere Iesu leari leikive.

¹² Hare ae are kela aeva pekai ivaiva leipe. Are oroa heaikiapo Aualari va ivaiva lei lei mea i opape.

Aposetolo haela 12

¹³ Hare hoa are kilea haela oaria itavavahaeai haela 12 hiki hamuri karape: are kai erero aposetolo rare maeaeape.

¹⁴ Simon are rare are Peter maeape, kai areve akoreheari Andrew; James, John, Philip, Bartholomew.

¹⁵ Matthew, Thomas, James Alphaeus ve akore, Simon Zealot rare itavape,

¹⁶ Judas James ve akore, kai Judas Iscariot, arero hihila epape la haela.

¹⁷ Are ere i hareho kihoahuka ita heheapa epavape. Kilea haela oaria i Judea i Jerusalem haela ila oaria, Tyre i Sidon ila ve miri haela oaria kara areve leia korukaiavahaeape, areve oharo iapakive: ereve maea heahaha oaria kara lei makukuripe.

¹⁸ Ovehahu ila la haela kara iki ore leivahaeape.

¹⁹ Haela oaria arero mai koharakive haropape — ehovea aheke areve maea ve horera erero lei makukuripe.

Ikiveveke okiharo, Ikihuru oharo

²⁰ Are helari kilea haela oaria ovohae eavavahaeai mari maeaeape: E merava haela iki veveke leila, ehovea Aualari ve basilea e ve.

²¹ Eroa haealula haela ikiveveke leila ehovea eve eharau huharavahaeakilai. E hivavara arula haela ikiveveke leila, ehovea e va area keavakilai.

²² Haela ero ikiheaha lei ero la hararuakilava kai o heaha la maeaeakilava, kai eve rare hahaure lei, heaha lari la leikilava, e oaria ikiveveke leivahaeaki, ehovea haela ve Akore ve harihari.

²³ La hare ikiveveke leila, kai maea pelaea leila! E iapaila, eve kavale kaia ve le aeave: ehovea ere eve aualau peroveta haela lari leivahaeape.

²⁴ Ikihuru hela, erohoho haela, ehovea e va kavale overa avi.

²⁵ Ikihuru hela, ma hoa eharau huhararurape haela! Ehovea e eroa haeakilai. Ikihuru hela, ma hoa area keavahaelula haela, ehovea e va aireaki iki ihaha hivavara arilai.

²⁶ Ikihuru hela, haela oaria eve rare auhohi arura, ehovea ereve aualau haela ve opore peroveta haela laria leivahaeape.

Iri haela ikiheheroe leivahaeaki

²⁷ E arave oharo iapailula haela, ara ero maeaeaive — Ero ikiheaha leivahaelula haela kavale veveke aiaraki.

²⁸ Ero o heaha maeaelula haela momorapuki: ero haeae leilula la haela ve ivaiva arive.

²⁹ Eve aho ukai koaki la haela aho ukai kara arero amoeaki. Ave akea pura kaivaki la haela ave maea pura kara avaraki.

³⁰ Aro velavela leivahaeaki haela aiarakive: ave eharu aeaki la haela kai velavela kalailue.

³¹ E ikivere haela ero leivahaeaki la mai kara erero lari leivahaeaki.

³² Ero ikiheheroe leilula haela hiki e ikiheheroe la leivahaeakilava, e leari lei veveke leivahaeakilai ha? Ehovea mai hahaeae haela erero ikiheheroe leilula haela ikiheheroe kavale leilula.

³³ Ero veveke leivahaelula la haela e va veveke ra leivahaeakilava, e va leari lei veveke koarakilai ha? Ehovea mai hahaeae haela laria leilula.

³⁴ E haela eharu la aiarakilava, ehovea eve ikivere ere ero kavale kai aiarakive, e va leari lei veveke leivahaeakilai ha?

³⁵ E iri haela ikiheheroe lei veveke hiki leivahaeaki — aiarakive, kai ikihairihairi kalaivahaelue: e va aireaki kavale eapapo avakilai, ehovea e Akea ve Aualari ve akoremari leivahaeakilai, ehovea are heaha i ikiheahaha haela ila ikiheheroe leivahaevila.

³⁶ E va ikiheroe mai leila, eve Oa ve ikiheroe leivila mai hoveahovea.

Haela ae heheavaki mai

³⁷ Haela kaheheavalue; ere ero aireaki heheava va ka. Haela kahararuarue: ere ero aireaki hararua va ka. Haela ve haeae la hapururukakilava, eve haeae kara le haparurukakilai.

³⁸ Aiaraki — kai ero aiarakilai, eharu oaria, maeakoko, kepea ila, eve hurua heloe le koakilai. Ehovea e haela eharu aiaraki la ihova ere ero kara lari aikiarakilai.

³⁹ Are erero parabole oharo maeaeape: Ovohae kariri haela ovohae kariri haela kake lai auki hovea ha? Erealila hareho karu ve hohoa va ka ha?

⁴⁰ Kilea haela areve haelapo heaorapai oropa lei va ka, aka haela oaria mekaka leivahaeaki la hoa ereve haelapo hoveahovea leikilai.

⁴¹ Ehovealeve a va apoheari ve ovohae ureve la kora harava eavi ave ha, aka ave ovohae ureve la kora hakaea eava va ka ha?

⁴² A va apoheari leari maeakilai, Apoheari e, ara ave ovohae ureve la kora harava hareavakilai, aka a havahu ve ovohae ureve kora hakaea a va au eavaila ha? Opore haela e, oropa ave ovohae ureve la kora hakaea hareavaki, aireaki ave apoheari ve ovohae ureve la kora harava auhohi eavakilai.

⁴³ Ehovea kora veveke ve hae heaha horeava va ka: kora heaha kara hae veveke horeava va ka.

⁴⁴ Ehovea kora oaria haela ereve hae ve ore leivahaeakilai. Ehovea haela kora mamareke ve lauka hae ikaea va ka: kaovararai ureve haela vine hae koara va ka.

⁴⁵ Haela veveke areve iki ureve erohoho ve eharu mekaka aihorerakilai: Haela heaha areve iki ureve erohoho ve eharu heahaha aikihorerakila, ehovea, iki ureve la eharu oaria ve, areve ape oharo kihorerakilai.

Iapai leivahaeaki mai

⁴⁶ Ehovealeve e va araro Amua e, Amua e, itavavahaelula, kai ara ero maeaeaki la horova e leivahaea va ka ha?

⁴⁷ Arave oki iki arave oharo iapai leiki la haela ara areve hovea ero kileavahaeakilai.

⁴⁸ Are uvi kupe haela hovea — Are kekele koru havahu ihape: uvi ve ihau have kekele havahu paraeape. Haa aru leipe, ma hoho uvi koape, aka uvi lulalula au leila, ehovea uvi aheke havahu kupe.

⁴⁹ Aka oharo iapai leiki aue la haela are va maria: Haela uvi kupe: la uvi ve ihau aheke i karu ila au paparaehaila. Ma hoho ekavape hoa la uvi koa uvi le hilaupe. Uvi kopararapai heaha le leipe.