Luke 4 - Pupu Oharo Āre 1963 Genese 1970 Rute 1972

Iesu ve amuraharae hoa

¹ Iesu, Ove Veveke ila Jordan harepape. Ove arero ita merava ve lai aupe.

² Diabolo hare 40 arero amuraeape. La hoa are ere ka aeape, kai aireaki eroa hape.

³ Diabolo arero maeape, A va Aualari ve Akore iele la leikilava, ma have maeaeaki, ere maea koelari pai hovea leikilai.

⁴ Iesu arero kavale maeape, Overa hape oharo maria — Haela ve ovokake leiki eharu pai hiki ka.

⁵ Are kai arero lai pekai hoa haroapo meahaiapo basileia oaria hareho arero amoeavahaeape.

⁶ Diabolo arero maeape, Ara va ma basileia ve aheke i haharika ila aro aiarakilai, ehovea eharu oaria arave eharu, kai ara va ikivere la leiki la haela ara aiarakilai.

⁷ Laelave, a arave oropa ve ra ekaopakilava, ma eharu oaria va ave eharu.

⁸ Iesu arero kavale maeape, Overa hape oharo maria: A va Amua, ave Aualari morapaeaki, Areve horova hiki leiki.

⁹ Are kai arero Jerusalem lai ai Hehe Uvi ve ailauki akea ve aepa mari ape, Ava Aualari ve Akore iele la leikilava, hoa hareau,

¹⁰ ehovea overa mari hape: Are areve aneru a v'ila kiva leikive maeaeakilai.

¹¹ Ere va aro mai peke paeakilai, Ave loa oropa have i koaki ave.

¹² Iesu arero kavale maeape, Oharo aeva mari hape, A Aualari ave Amua kamuraealue.

¹³ Diabolo amuraeharae karia lei la hoa arero harepape.

Iesu Nazareth leia

¹⁴ Iesu Ove ve aheke ila Galilee kihoaupe. Areve hari veveke la ita oaria kopurapape.

¹⁵ Are ereve synagogue ureve kileavahaeape, kai haela oaria arero morapaeape.

¹⁶ Are Nazareth ekepe, areve akore hekai ita la: areve hare oaria mai hovea, are sabati hare synagogue pekai, buka mureakive uroupe.

¹⁷ Ere arero Isaiah peroveta haela ve buka avarape. Are buka hapai ma oharo eavi mureape:

¹⁸ Amua ve Ove ara i hareho aeavila, ehovea Are araro avikiarape horova — Merava haela ve iroro oharo arive: Are araro kiparaeape au hahaeape haela hehelaukakive oharo maeaeakive, ovohae kariri haela ve ovohae kohehelaukakive oharo arive, maea kakare koarape haela maea mekaka leivahaeakive;

¹⁹ Amua ve hitolo hoa veveke vavavakive.

²⁰ Are buka kokauka kiva haela ra avara, le haiavape. Synagogue ureve haela oaria arero ovohae auhohi eavape.

²¹ Are erero maria kileavahaeape, Ma hare ma buka oharo e va avako i iele la iapaila.

²² Ere oaria areve oharo iapai ikihorahora leivahaeape, ehovea areve ape ve kihorerape la oharo mekaka ve. Ere kai mari avahaeape, Ma va Joseph ve akore ka ha?

²³ Are kai erero maeaeape, E va araro ma oharo kimaeakilai — Doctor haela a havahu elare maea veveke leiki: Ela iapape a Capernaum leivahaeape la horova veveke, maia kara, a havahu ve ita ve leikive, heroe.

²⁴ Are erero maeaeape, Ara ero maeaive — Peroveta haela are havahu ve la ita haela hahaure leilula.

²⁵ Aka ara ero maeaive — Elijah ve la hoa uavila maitava oaria Israel ve apearoape, hitolo 3 i papare 6 ila kaia kokaukape la hoa, kai ita oaria hohera leivahaeape.

²⁶ Aka Aualari Elijah karikara oaria au paraeaila, Zarephath hiki, Sidon ita ve karikara ve uva maitava haroapo la.

²⁷ Elijah peroveta haela ve hoa Israel leper haela oaria apearoape — oaria veveroro au leila, Naaman, Syria haela, hiki.

²⁸ Synagogue ureve la haela oaria ma oharo iapai arero hihiri leipe.

²⁹ Ere urahuka arero karikara mahokaea ve avakape, arero kai karikara ve kela pelaea lai aupe ehovea arero huikapai paraeakive.

³⁰ Aka are ereve aru hihi ve hoai elare oki le aupe.

Ovehahu haela lei makuripe

³¹ Are Capernaum, Galilee karikara, ekepe. Are sabati hare erero kileavahaeape.

³² Ere va areve kilea oharo ve ikihorahora leivahaeape, ehovea areve oharo aheke iele.

³³ La synagogue ureve ovehahu ila haela ae pekai ara hai eapapo maria itavape:

³⁴ Ela va a v'ila leari leivahaeakilai, Iesu Nazareth haela e? A va elaro hai ka leivahaeakive leikila ha? Ara aro ore iele, a va Aualari ve Hehe Akore havahu.

³⁵ Iesu arero erereape, Oharo kailue, arero harepai aula. Ovehahu arero au huikapai harepape, la haela kai kakare au leila.

³⁶ Haela oaria va ikihorahora eapapo leivahaeape: Ere elarelare oharo maria hukavape, Ma oharo le ha? Ehovea Amua ve aheke v'ila are ovehahu o karava maeavila, ere kai areve oharo iapai le kihorealula.

³⁷ Areve hari la ita oaria hareho kopurapape.

Simon ve uva ve lou lei makuripe

³⁸ Are urai synagogue mahokaea ve hoai Simon ve uvi pekape. Simon ve uva ve lou maea hahaita leipe. Ere are v'ila apevelavela leipe.

³⁹ Are areve leia epavi maea heaha huirereape; areve maea heaha arero harepape.

⁴⁰ Hare hoaupe hoa ere ereve maea heahaha haela oaria areve leia kari auvahaeape. Are erero oaria mai kohari lei makukuripe

⁴¹ Uku haela ve ovehahu hivavara ila kihoahukai mari avahaeape, A va Aualari ve Akore. Are erero aihukamaeai ereve oharo haerapape, ehovea ere ore leivahaeape are va Keriso la.

⁴² Hare hoa are hoai ita merava araeape. Haela oaria arero haropi areve aire arahavi arero ereve ita aeaveakive maeape — ita lahua au va arekaea.

⁴³ Are erero maeaeape, Ara Aualari ve basileia ve iroro ita oaria avelarikive — Araro va kiparaeape iele va lae.

⁴⁴ Are Galilee synagogue oaria iroro avila avelaripe.