Luke 24 - Pupu Oharo Āre 1963 Genese 1970 Rute 1972

Kapu ita haroka

¹ Hepetoma ve oropa hare, mea vitovito hoa, ere overa karikipe la muo veveke muramura eharu kapu ita ve aiauvahaeape.

² Ere okiape ve la have overa avaruraila eavape.

³ Ere kapu ve arahavi Iesu ve maea au eavaila.

⁴ Iapaila, ere ikihorahora ila pearoape la hoa, pura mekaka ila haela orahokaila ereve oropa ve epavape.

⁵ Ere oaoka lei oropape mea ve ekaopape la hoa, la haela orahokaila erero maeaeape, Ehovealeve e va ovokake haela apihaeape haela ve ita la haroparo ha?

⁶ Are maia va ka, are le urou. E va ikikekelaila, are Galilee apeape la hoa are ero maeaeape oharo maria:

⁷ Haela ve Akore ere mai heahaha haela avarakilai: ere arero satauro ve harilai kai hare 3 hoa are uroukilai.

⁸ Ere areve oharo iki le kelavape.

⁹ Ere kapu ita hakurepai hoahuka ma eharu oaria kilea haela i haela oaria ila hareho maeaeape.

¹⁰ Ere va Mary Magdalene i Joanna i Mary James ve lou, ere i hareho auvahaeape la uavila oaria aposetolo haela kara maeaeape.

¹¹ Aka ereve ikikekela ma oharo naoaenaoae. Ere la oharo au iapaila.

¹² Aka Peter urai kapu ita ve leia vivilape. Are ekaopi ure ve ovohae eavi, maea hahape la pura hiki eaeavila eavape. Are elare ita hoai ikihorahora eapapo leipe, ehovea la eharu oaria.

Iesu Emmaus okiharo hihika leipe

¹³ Iapaila, la hare kara ereve haela orahokaila karikara rare Emmaeus ve hahi ve aupe. La karikara aiai Jerusalem 7 mile hovea.

¹⁴ Erealila auvahaeape la hoa erealila au leivahaeape la eharu oaria v'ila oharo hukavape.

¹⁵ Iapaila, erealila elare oharo hukavi velavela leivahaeape la hoa, Iesu havahu iki ere i hareho auvahaeape.

¹⁶ Aka erealila arero ore au leila, ehovea erealilave ovohae oro‐oro leivahaeape.

¹⁷ Are erealilara velavela leipe, Evalila okiharo ve leari oharo la hukavaro ha? Erealila aupavi oropape ikihuru leivahaeape.

¹⁸ Haela ae va rare Cleopas arero kavale maeape, A hiki Jerusalem ma hoa ve la leivahaeaila eharu oaria haveva ila aeavila ha?

¹⁹ Are erealilara maeape, Le eharu? Erealila arero maeape, Iesu Keriso ve la eharu oaria. Are va peroveta haela, horova i ape oharo ila Aualari i haela oaria ila oropa ve mekaka iele.

²⁰ Oharo haela i elave akea haela ila arero harive i avarape, arero kai satauro ve le hape.

²¹ Elave ikikekela Israel ve lei makukuriki haela are la. Kaire, oharo aeka ma — la horova leipe ikiki mahau ve hare 3 la.

²² Aeva ma, ela va horahora eapapo la leivahaeaila, ehovea elave uavila uku vevelare havahu kapu ita la eavi areve maea va karia.

²³ Ere iki elaro mari lakimaeaila, ere va angel la eavi aneru erero ma lamaeaila are va ovokake i aeavila.

²⁴ Elave haela uku kara kapu ita auvahaeai uavila lamaeaila hoveahovea laeavila, ere kai arero au eavaila.

²⁵ Are erealilara maeaeape, E va ikihaveva. E va haiapo iele peroveta haela oaria avahaeape la oharo e auhohi kelava va ka ha?

²⁶ Keriso va kakare va koaraila elare haharika veveke iele aire avakilai, hovea va ka ha?

²⁷ Are ai Moses ve hoa aiai peroveta haela oaria ve hoa are v'ila la oharo oaria erealila v'ila hihika kileavahaeape.

²⁸ Ere auvahaeai karikara pekahavape la hoa are iki erealilara haitapakive.

²⁹ Aka erealila arero here leipe maria, Ela i hareho apeaki: ehovea hailaea hoa ma, hare kari le lai. Are erealilara koarai uvi pekape ehovea leia aeakive.

³⁰ Iapaila, ere hareho eapai lape la hoa are pai kaivi lei morapaeai haivaelai erealilara le avarape.

³¹ Erealila ovohae ovava lei arero ore le leipe, are elavelave le havoavape.

³² Erealila elare oharo mari hukavape, O iele, elare okiharo ve ela i hareho oharo hukavape kai buka oharo elaro hihika kileavahaeape la hoa elavaila ve iki ahea au koaraila ha?

³³ Erealila va elavelave urai Jerusalem kai pekahavape. Leia erealila haela 11 i ere i hareho korukaiavahaeape la haela oaria eavi erero mari maeaeape,

³⁴ O iele havahu, Amua overa urai kai Simon ve oropa ve hihika laleila.

³⁵ Erealila okiharo ve leivahaeape la eharu oaria la maeaeape, erealila arero pai haivaelaila eavi ore leipe la oharo kara.

Iesu kilea haela oaria oropa ve hihika leipe

³⁶ Erealila ma oharo maeai Iesu ereve aru hihi ve epavi maria maeaeape, E va havila ila apeaki.

³⁷ Aka ere oaria oaoka eapapo i horahora leivahaeape, ehovea ereve ikikekela ere ovehahu la eavape.

³⁸ Are erero maeaeape, E va iki heraho ehovealeve ha? E va ikihorahora leve leiro ha?

³⁹ Arave loa i mai ila eavaila — ma va ara havahu — araro mai pae eavaila, ehovea ovehahu va arave ma aivau i uki ila hovea ka.

⁴⁰ Are ma oharo avi areve mai i loa ila erero aioeape.

⁴¹ Ere va ikiveveke i mekari au kelavaila la hoa, are erero maeaeape, Eve ita eapai perehekai aeave ha?

⁴² Ere arero au kararukape ekaka uku avarape.

⁴³ Are erero kaivi ereve oropa ve le lape.

⁴⁴ Are va erero maeaeape, Ara e i hareho apeape la hoa ara ero maria maeaeape — eharu oaria Moses i peroveta i psalm buka ara v'ila haeape la eharu oaria iele horeavakilai.

⁴⁵ Are ereve iki hapai buka oharo ve iele erero kileavahaeape.

⁴⁶ Are erero maeaeape, Overa mari hape — Keriso kakare lei api kai hare three uroukilai.

⁴⁷ Aeva ikihelariki oharo i mai heaha ve hapururukaki oharo vilaipipi oaria ve areve rare ve iroro oharo iapakilai — Jerusalem oropa la.

⁴⁸ E va ma eharu ve vavavaki haela.

⁴⁹ Iapai — ara arave Oa ve okoare e v'ila paraeakive. Aka e karikara hiki apeapea akea ve la aheke kihoai ero aeravahaeakilai.

Iesu Kaia ve pekape hoa

⁵⁰ Are erero kari ai Bethany maeamaea. Are elare mai urapai erero lei momorapupe.

⁵¹ Iapai — are erero lei momorapupe la hoa are erero haitapai kaia ve la pekape.

⁵² Ere arero morapaeai helari ai Jerusalem ikiveveke eapapo ila pekahavape.

⁵³ Ere va hare oaria Hehe Uvi ve Aualari morapuroape.