Luke 23 - Pupu Oharo Āre 1963 Genese 1970 Rute 1972

Iesu Pilate, Rome Gavana haela, oropa ve

¹ Ere haela oaria hareho urahuka arero Pilate ve leia lai aupe.

² Ere arero hahakive oharo mari hukavape, Elava ma haela elave ita haela oharo haeae kileavila koarape: are Caesar ve tax avaraki aue kileape kai are havahu elare rareape, Keriso amua.

³ Pilate arero velavela leipe, A va Jew haela ve Amua ha? Are kavale maeape, A va ave ape laila.

⁴ Pilate oharo haela i haela oaria ila maeaeape, Ara va ma haela ve haeae eava va ka.

⁵ Aka ere kai mari maeape, Are va karikara urukuku leivila. Judea hoa hareho are va kileavahaevila, Galilee hoa ikiki ma kara.

Iesu Herod oropa ve

⁶ Pilate la oharo iapai are velavela leipe, la haela va Galilee haela ha?

⁷ Are ore leipe are va Herod ve kavana hiru ve ekepe la hoa are arero Herod ve leia paraeape: la hoa Herod Jerusalem aeape.

⁸ Herod Iesu la eavi ikiveveke eapapo leipe, ehovea are va mea oaria Iesu ovohae eavakive ikivere leiveape: ehovea are areve hari overa iapape, kai are ikivere Iesu horova veveke areve oropa ve laila.

⁹ Are arero oharo oaria velavela leipe aka Iesus kavale oharo au aila.

¹⁰ Oharo haela i hohoa haealula haela epavi arero ikiheaha lei arero hahakive oharo avahaeape.

¹¹ Herod i areve hevehe haela ila kara arero kakakoeape kai heheo oaria avahaeape; ere arero maupa pura veveke iele areve maea ve orape kai arero Pilate ve leia helari paraeape.

¹² La hare havahu Herod i Pilate ila kake le leipe: oropa hoa erealila elare hahari ape.

Pilate, Barabbas, i Iesu ila

¹³ Pilate oharo haela i akea haela i haela oaria hareho itavavahaeai mari maeaeape:

¹⁴ E va ma haela oharo haeae avila haela hovea lai leikila: Iapaila, ara eve oropa arero la heheavila e va arero lahahaila la oharo, areve haeae au koaraila.

¹⁵ Kaire: Herod kara laria, ehovea are va arero elave maia aire kai lakiparaeaila. E va iapaila. Are va leivahaeape eharu apakive hovea ka.

¹⁶ Laelave ara arero haru hai ovokake le paraeakilai.

¹⁷ Ehovea ereve hurae hoa ve mai la, haela aeva ovokake paraeakive.

¹⁸ Ere oaria hareho āra maria haeape, Ma haela lai auki: ela v'ila Barabbas kiparaeaki.

¹⁹ La haela ere overa uvi muru paraeape ehovea are va karikara ureve hahari lei uku haela haeape.

²⁰ Pilate erero aeka oharo maeaeape ehovea are ikivere Iesu ovokake ila paraeakive.

²¹ Aka ere va aeka āra eapapo avahaeape, Arero satauro ve harive, arero satauro ve harive.

²² Are aeka hoa haroapo maeaeape, Ehovealeve? Areve haeae le ha? Ara va areve haeae harive hovea au eavaila: ara arero haru ha le paraeakilai.

²³ Aka ere oaria oharo aheke iele avahaeai arero satauro ve harive. Ereve la oharo are le avape.

²⁴ Pilate ape karava maeape — arero satauro harive.

²⁵ Ere velavela leipe uvi muru aeavila la haela, hahari lei haela haeape la haela, are ovokake le paraeape. Are Iesu erero avarape ehovea ereve ikivere horova leikive.

Iesu satauro hape hoa

²⁶ Ere Iesu lai aupe la hoa ere haela ae rare Simon, Cyrene haela, karikara mahokaea ve ekepe haela la hareavape: ere arero satauro avarape ehovea Iesu ve aireaki oraiavi aukive.

²⁷ Haela oaria iele areve airekai auvahaeape, are v'ila ikihuru leivahaeai hivavara avahaeape uavila kara.

²⁸ Iesu helari erero maeaeape, Jerusalem ve marita, ara v'ila hi kailue: e hivavara e havahu ve ari akoremari ve kara.

²⁹ Iapaila, hare ae kihoreraki ere mari maeaeakilai: Korovu la uavila lei momorapuki, aeva akoremari au eraila la amae kara.

³⁰ La hoa e va kela ehoaha maeaeakilai, Elave akea ve hohoakive; kai kela titaeka mari maeaeakilai, Elaro koharaki.

³¹ Ehovea ere ma eharu kora are apu hoa ve la leikilava, ere va kora kakarara leiki la hoa leari leikilai?

³² Ere are i hareho haeakive kari auvahaeape haela orahokaila aea, erealila mai heahaha haela.

³³ Ere iki la ita rare Harohae, arero satauro ve hape, la haela heahaha kara, ae va areve mai ore ukai ve ae va areve mai keva ukai ve.

³⁴ Iesu mariape, Oa e, ereve haeae hapururukavahaea, ere leilula la horova ere va haveva. Ere areve pura v'ila koai koa herehere avape.

³⁵ Haela oaria ovohae hiki eavape. Akea haela kara arero heheo maria ape, Are va haela lahua lei makukuripe, are va Aualari ve ikivere Keriso iele laleikilava, veveke are elare ovokake leikive.

³⁶ Hevehe haela kara arero heheo maeape — ere iki arero vinegar avarape kai maeape,

³⁷ A va Jew haela ve Amua la leikilava, a va elare lei makurikive.

³⁸ Areve haro akea ve ere hohoa mari hape, Jew haela ve Amua ma.

³⁹ Areve ukai ve avikape mai heaha haela aeva arero o heaha maria maeape, A va Keriso ha? A va ela i hareho lei makukurikive.

⁴⁰ Aka ukai haela ae arero erereape maria, A va Aualari oaoka lei va ka ha? Ehovea a va heheava hoa heaha leipe.

⁴¹ O iele, elaila ve kavale ehoe, ehovea elaila ve heaha ve kavale ma — aka ma haela haeae au leila.

⁴² Are maeape, Iesu, a va basileia araeaki hoa araro hela ikikekela.

⁴³ Are arero maeape, O iele, ara aro maeaive — mahau hare a ara i hareho Paradise apeakilai.

Iesu ve apape hoa

⁴⁴ Hare hihi le lai, aka ita oaria mea muru havahu lei lei hailaea 3 o'clock.

⁴⁵ Hare ve ovava kari le leipe: Hehe Uvi ve okiape pura kara aru hihi ye haipararapape.

⁴⁶ Iesu hi eapapo a, mari maeape, Oa e, arave ove a va avakilai. Are ma oharo a le apape.

⁴⁷ Hevehe centurion lari eavi Aualari morapaeape mari, O iele, ma haela areva mai ehoe haela.

⁴⁸ Ma horova eavakive korukaiape la haela oaria lari eavi helari auvahaeai elare arahu koavape.

⁴⁹ Areve apavara i kake haela i are i Galilee ve hareho ekevahaeape la uavila oaria arai ve epavi ma eharu ovohae eavavahaeape.

Iesu ve karu ihape hoa

⁵⁰ Iapaila, councillor haela ae rare Joseph, mai ehoe haela.

⁵¹ (Are council haela oaria hukavape la oharo au koaraila). Arimathaea haela, Judea haela ve karikara ae va la: are va Aualari ve basileia haropi haela.

⁵² Ma haela Pilate ve leia ai Iesu ve maea velavela leipe.

⁵³ Are areve maea ikavi pura veveke hahape. Are arero have ura ve karikipe kapu ita ve paraeape — la ita apape haela va overa au ihaila.

⁵⁴ La hare eharu oropa kariki hare, sabati hare horera maea iele.

⁵⁵ Galilee ekevahaeape la uavila kara areve airekai auvahaeai kapu ita eavi areve maea aipepe la maea kara eavape.

⁵⁶ Ere helari ai elare ita muo veveke muramura eharu karikivahaeape. Sabati hare ere iki paparaehape, overa huape la pupu hoveahovea.