Luke 22 - Pupu Oharo Āre 1963 Genese 1970 Rute 1972

Judas ve hihila epape hari

¹ Muramura aue pai ve hurae hoa kihorera maea iele, la hurae ve rare Passover.

² Oharo haela i hohoa haealula haela ila arero harive okiharo haropape, ehovea ere haela oaria oaoka leivahaeape.

³ Satan Judas (rare aea Iscariot) ve iki ure araeape: are 12 ve haela ae va la.

⁴ Are ai oharo haela i kapena haela ila hareho oharo hukavape, ehovea Iesu erero leari lei avarakive.

⁵ Ere va ikiveveke leivahaeai arero moni avaraki okoare la maeape.

⁶ Are ereve oharo iapai, Iesu erero avaraki oki ve kekelape, haela oaria ve korukaiaki aue hoa.

Hita eapai ve oropa karikiki hoa

⁷ Muramura aue la pai ve hare kihorerape, ere va elare passover mamoe akore maea morava leiki la hare.

⁸ Are Peter i John ila paparaehai mari maeaeape, Evali auila, elaviila ve Passover oropa karikiki, elaviila hurae eapai larilai.

⁹ Erealila arero maeape, Ave ikivere elalila lahoa karikilai ha?

¹⁰ Are erealilara maeaeape, Eali karikara pekahavaki la hoa eali haela ma hahu oraiauvila mai la eavakilai. Are pekaki la uvi ve arero airekai pekakilai.

¹¹ Evali la uvi haela mari maeaki, Haelapo ve oharo maria — Hahi lalava lahoa ela i kilea haela ila hareho passover hurae eapai larilai la lalava?

¹² Are ealilara akea ve lalava eapapo overa karikiki kimaeakilai, leia hurae ve ita oropa karikikive.

¹³ Erealila ai are erealilara maeaeape la oharo hovea eavape. Erealila passover hurae ita leia karikipe.

Iesu hita eapai lape hoa

¹⁴ Hurae hoa havahu, are i aposetolo haela ila hareho avape.

¹⁵ Are erero maeaeape, Ara va ikivere eapapo overa leipe e i hareho ma passover hurae oropa larilai, arave kakare leiki hoa aireaki.

¹⁶ Ehovea ara ero maeaeaive — Ara va aireaki passover eapai le va ka aiai are va Aualari ve basileia ureve iele la horerakilai.

¹⁷ Are hekako avi, thank you, oharo a, mari maeape, Maia kaivaila, elarelare hamureaki.

¹⁸ Ehovea ara ero maeaeaive Ara va aireaki vine apu le va ka aiai Aualari ve basileia kihorerakilai.

¹⁹ Are kai pai avi thank you oharo a, pai la haivavaelai erero aiari mari maeaeape, Ma arave maea e v'ila avarape. E va maria lei araro iki kekekakive.

²⁰ Ere eapai karia lei are hekako kara hareavi mari maeaeape, Ma hekako okoare are arave apu v'ila, e v'ila hakaitapape.

²¹ Iapaila, araro hihila epaki la haela ve mai ara i hareho ma eapai paeakilai.

²² Ehovea haela ve Akore overa maeape la oharo hovea aukilai. Aka heaha iele arero hihila epaki la haela.

²³ Ere elarelare oharo hukavape arero ma mai leita leikilai ha?

Akea mai veveke iele

²⁴ Ere va elare hahari hahari maea ape ehovea ereve oropa haela leita leikilai.

²⁵ Are erero maeaeape, Ita lahua haela ve amua ereve oropa haela leilula. Aeva ereve akea haela ere rare iki amua rare la maeaelula.

²⁶ Aka e va laria va arekaea. Eve oropa haela akoreheari hovea leikive, heroe: eve amua haela eve horova haela hovea leikive.

²⁷ Ehovea akea haela leita ha? Eapai ve haiavavila la haela, aka arero kiva leivila la haela? O iele, eapai ve haiavavila la haela. Aka ara eve aru hihi ve horova haela hovea aeavila.

²⁸ E va ara i hareho amuraeharae hoa apealula la haela.

²⁹ Ara ero basileia avarakilai, hoveahovea arave Oa araro avikiarape.

³⁰ E ara i hareho arave eapai haha ve basileia hoa avakilai. E va terona 12 akea ve Israel ve eravo 12 heheavakive avakilai.

Peter aireaki hehepo leikive la oharo

³¹ Simon, Simon, Satan a v'ila velavela leipe, areva ikivere aro wheat hae hovea lalaeapakive.

³² Kahara, ara a v'ila ivaiva leipe ave ikikekela karia leiki ave. A va aireaki iki helariki la hoa ave apavara kara aheke leivahaeakilai.

³³ Are arero maeape, Amua, ara va a i hareho uvi muru aka apakive aukive hoveahovea.

³⁴ Are arero maeape, Peter, ara aro maeaive: a va mahau hare arav'ila hehepo oropa leikilai, hoa ilehoila, kokora mea hi aire arilai.

³⁵ Ara ero pausi aue, aroa aue, i loa iilu aue paparaehape la hoa e va eharu aea ikivere leivahaeape ha? Ere kavale maeape, Ka!

³⁶ Are erero maeaeape, Aka ma hoa, pausi ila la haela arero kaiva, aroa ila la haela kara. Karia la haela are va akea pura ilaea lei lelao mare avaki.

³⁷ Ehovea ara ero maeaeaive, Ma overa hape oharo ara v'ila horerakilai — Ere mai heahaha haela are ila hareho korukaiape — ehovea ara v'ila hape la oharo iele horerakilai.

³⁸ Ere arero maeape, Amua eava! Lelao orahokaila mae. Are erero maeaeape, Kahara, hovea.

Gethsemane

³⁹ Areve mea oaria ve leiveape mai hovea are mea hoai Olivet kela pekape. Kilea haela oaria areve airekai pekahavape.

⁴⁰ Are la ita pekai haiavape la hoa are erero maeaeape, Ivaiva leila, eva kurupaeaki hoa hihilaukaki ave.

⁴¹ Are ere v'ila perehekai arai ve pavape, haela have koaki heaikiapo hovea. Are loa ari avi ivaiva mariape:

⁴² Oa, a va ikivere la leikilava, ma arave hekako hareavaki — Heroe, arave ikivere va ka, a havahu ve iki hiki.

⁴³ Aneru kaia ve kihoai arero lei aheke leipe.

⁴⁴ Ehovea are va iki kakare eapapo, are ivaiva aeka aheke ape, areve maea ve orovahe apu hovea mea ve hitaupe.

⁴⁵ Are va ivaiva ve uroupe la hoa are iki areve kilea haela ve leia avuku eapealula eavape, ehovea ere va ikihuru iele.

⁴⁶ Are erero maeaeape, E va avuku leve apearo. Urahuka ivaiva leila, ero kurupaeaki hoa lei hihilauki ave.

Ere Iesu mai paeape

⁴⁷ Are la oharo avi la haela oaria ekevahaeape. Judas rare itavape la haela, haela twelve are la, ereve oropa ve ekepe. Are iki Iesu ape popoa overa hihipe.

⁴⁸ Aka Iesu arero maeape, Judas, a va haela ve Akore ape va popoavila hihila epakilai ha?

⁴⁹ Are i hareho epavape haela aire leiki horova la kelavi mari maeape, Amua ela erero lelao haeakilai ha?

⁵⁰ Ereve haela ae akea oharo haela ve horova haela avako ore lelao koa le koerapape.

⁵¹ Aka Iesu kavale maeape, E va hahari apeaki. Are va areve avako mai kohari lei veveke leipe.

⁵² Iesu oharo haela i Hehe Uvi kapena haela i haela hoaha ila arero paeakive ekevahaeape la haela oaria mari maeaeape, E va lelao i haru ila, korea haela paeakive hovea leikevahaeaila ha?

⁵³ Ara hare oaria e i hareho Hehe Uvi la loalula hoa eve mai au haravaiaila araro mai paeakive: aka eve hoa ma, muru hoa ve aheke ve hiki.

Peter ve hehepo

⁵⁴ Ere arero mai pai lai ai akea oharo haela ve uvi lai pekape. Peter arai ve arero airekai aupe.

⁵⁵ Ere uvi mailare a ilila hareho le avape. Peter kara ere i hareho haiavape.

⁵⁶ Mari ae arero a ve ovava ve eavi ovohae auhohi eavi mari maeape, Ma haela kara are i hareho veaveape haela.

⁵⁷ Aka are hehepo lei mari maeape, Mari e, ara arero ore va ka.

⁵⁸ Aireaki, haiapo ka, haela ae arero eavi maeape, A ka areve haela la. Peter maeape, Haelakaru, ara va ka.

⁵⁹ Hour haroapo hovea haela aeva iki ape aheke maeape, O iele havahu ma haela are i hareho veaveape, ehovea are va Galilee haela.

⁶⁰ Aka Peter maria ape, Haelakaru, ara ave la oharo horahora leive. Are la oharo avi la kokora mea hi le ape.

⁶¹ Amua helari Peter ovohae le eavape. Peter Amua ve oharo iki kekelape, ehovea are arero maeape, Ma hare kokora mea hi aire arilai, a va ara v'ila hehepo hoa ilehoila oropa leikilai.

⁶² Are mea hoai hi eapapo le ape.

⁶³ Iesu paeape la haela arero heheo maeai haru le koavape.

⁶⁴ Ere areve ovohae pura hahai arero velavela leipe maria, Peroveta oharo e la, aro leita lakoaila ha?

⁶⁵ Ere arero o vere oharo lahua lahua oaria i o heaha ila maeape.

Iesu Akea Oharo Haela oropa ve

⁶⁶ Vevelare, mea vitovito hoa, haela hoaha i oharo haela i hohoa haealula haela ila hareho korukaiavahaeape. Ere arero ereve oharo hukavaki ita lai ai mari maeape, A va Keriso la leikilava, elaro kimaeaeaki.

⁶⁷ Aka are erero maeaeape, Ara ero la maeaeakilava, e va kekela va ka;

⁶⁸ Ara ero velavela la leikilava, e kavale oharo kimaeaea va ka, kai araro paraea va ka.

⁶⁹ Aka aireaki, haela ve Akore Aualari ve aheke ve mai ore ukai ve mea oaria haiavakilai.

⁷⁰ Ere oaria arero maeape, A va Aualari ve Akore iele ha? Are kai erero maeaeape, E va araro lari ave.

⁷¹ Ere maeape, Ela va arero hahaki oharo ae va leve haropakive ha? Ela havahu areve ape ve la oharo le iapaila.