Luke 21 - Pupu Oharo Āre 1963 Genese 1970 Rute 1972

Uva maitava ve meru hekai

¹ Are ovohae iupe erohoho haela oaria elare meru meru kohu au koavalula eavape.

² Are kai uva maitava merava have titaeka orahokaila paraila eavape.

³ Are mariape, O iele ara ero maeaeaive, ma uva maitava merava meru oaria laparaeaila, ere oaria ka perehekai hiki.

⁴ Ehovea ere oaria erohoho v'ila uku laparaeaila, aka areve eharu perehekai, laelave areva hoa haroapo le laparaeaila.

Jerusalem ve karia leiki hoa: Mea aeaki hoa kara

⁵ Haela uku Hehe Uvi v'ila oharo hukavape, areve maupa veveke, have oaria, i meru oaria ila.

⁶ Laelave are maeaeape, E eavavahaelula ma eharu oaria, hare ae kihorerakilai, ma have ae have ae akea ve aea va ka, ere oaria aire kihohoakilai.

⁷ Ere arero velavela leipe, Laelave, ma eharu leahau leikilai ha?

⁸ Are maeape, Kiva leila, haela ero oki haeae kari auvahaeaki ave. Ehovea haela oaria arave rare v'ila ekevahaeakilai: ere kai maria maeaeakilai, Ara ma! kai, Hoa iele ma! E va ereve airekai kauvahaealue!

⁹ E va mare i hahari oaria ila ve hari la iapakilava, e va oaoka kalailue — ehovea ma eharu iele oropa kihoreavakilai — aka leia karia leiki hoa va ka.

¹⁰ Are erero maeaeape, Vilaipi ae vilaipi aeva mare leikilai, basileia ae va basileia ae va hahari arilai.

¹¹ Meapuipui ehoaha kihoreavakilai, ita uku hohera eapapo i maea heaha oaria ila leivahaeakilai.

¹² Aka ma eharu aireaki, ere va oropa ero mai papaehai hararuakilai, ere ero synagogue i uvi muru ila paparaehakilai, ere ero amua i gavana haela ila oropa ve arave rare v'ila kari auvahaeakilai.

¹³ Are va e v'ila ihova veveke leikilai.

¹⁴ Laelave eve iki aheke leila, e v'aire arilai la oharo oropa kakelavarue.

¹⁵ Ehovea ara ero ape oharo i ikiore ila aiarakilai, la ikiore eve iri haela ero hereava kavale maeaeakive hovea leivahaea va ka.

¹⁶ Aka iele, eve oalou haela, apoheari, apavara, kake haela ila, ero hihila epeaukilai. Ere eve uku haela haeakive aiarakilai.

¹⁷ Haela oaria ero ikihairhairi eapapo leivahaeakilai, ehovea arave rare v'ila,

¹⁸ Aka eve haro koro haroapo havoava va ka.

¹⁹ E va auhohi la leivahaeakilava, e va elare ove lei makukurikilai.

²⁰ E va mare arula haela oaria Jerusalem helari hupakai la eavakilava, e va ore leivahaeakilai, areve heaha leiki hoa maea iele.

²¹ La hoa Judea apealula la haela oaria kela ve hukauki, areve aru hihi ve apealula la haela elavelave auvahaeaki: kaipu apealula la haela karikara kihoreava va arekaea.

²² Ehovea ma hare va kavale heaha avaraki hare, ehovea overa hape la oharo iele le horerakilai.

²³ Ikihuru hela ehovea akoremari i avae laralula akoremari ila la uavila: ehovea ita oaria hareho heraho eapapo leivahaeakilai, kai haela oaria va hihiri le koarakilai.

²⁴ Haela erero lelao mare haeakilai, ere erero ita lahua oaria horova ve paparaehakilai. Ita lahua haela kara Jerusalem loa huharakilai, aiai ita lahua haela ve hoa hoveahovea leikilai.

²⁵ Hare i papare i kou ila ihova hihika amoeakilai, meahaiapo kara vilaipipi oaria ve heraho eapapo leivahaeakilai, ikihorahora, ehovea ahea ma ve eara hovea, kai ma ve aroaro eapapo iele.

²⁶ Haela meahaiapo ve kihoreraki la heaha la kelavakilava oaoka lei apihaeakilai, ehovea kaia ve aheke lalaeapakilai.

²⁷ La hoa ere Aualari meuru ureve aheke i haharika veveke ila ma kihoaila eavakilai.

²⁸ Ma eharu ipopeavaki la hare e va ovohae iupeki, haro urai akea ve eavakilai, ehovea eve ovokake leiki hoa kikoreraki maea iele.

Haela oaria kiva auhohi leivahaeaki

²⁹ Are erero parabole oharo maeaeape, Lauka kora eavaila, kai kora oaria kara.

³⁰ Ereve rorore hulahoreavakilava, e va eavi ore leiki, hitolo hoa maea iele.

³¹ E kara laria — E va ma eharu la eavakilava, e va ore leikilai Aualari ve basileia kihoreraki maea iele.

³² O iele ara ero maeaeaive — ma vilakao karia lei va ka aiai eharu oaria hoveahovea kihoreavakilai.

³³ Kaia i meahaiapo ila karia leikilai, aka arave oharo karia lei va ka.

³⁴ E va ere kiva leiki, e va eapai i ma ila lalavahaelula i meahaiapo ovokake ve heraho ila iki heraho leiki ave, la hoa eve oropa ve muruhari kihoreraki ave.

³⁵ Ehovea are meahaiapo apealula haela oaria ve laria leikilai.

³⁶ E va mea oaria kiva hiki leila, ivaiva ila, ma aireaki kihoreavaki eharu heaha oaria ero hararuaki ave. Laelave e va aireaki haela ve Akore ve oropa ve epavakive hovea leikilai.

³⁷ Are hare oaria Hehe Uvi ureve kiriveape. Oroa oaria are mea hoai kela rare Olivet pekai aeveape.

³⁸ Haela oaria vevelare iele Hehe Uvi ve pekahavi areve oharo iapakive.