Luke 18 - Pupu Oharo Āre 1963 Genese 1970 Rute 1972

Heheavahi haela heaha

¹ Are erero parabole kileape ehovea ere mea oaria ivaiva kiva leikive la heroe, iki mahuka lei va arekaea.

² Are mariape, Karikara ae heheavaki haela aeva aeveape — Are Aualari i haela ila oaoka au leila.

³ La karikara uva maitava aeva aeveape — are arero hare oaria iki mari maeape, Arave iri haela heheava kavale leikive.

⁴ Oropa hoa are au iapaila — aka aireaki are elare iki mari kekelape, Iele, ara Aualari i haela ila oaoka lei va ka,

⁵ aka ehovea ma uamari araro heraho leivila ara areve hararuape la haela heheava kavale leikilai: are mea oaria oharo oaria v'ila araro hararuaki ave.

⁶ Amua kai mariape, Haeae la heheavaki haela ve oharo iapai:

⁷ O iele, Aualari are iki havahu akoremari hi ila oroa i hare ila arero velavela leilula la haela are haiapo haure lei ehohoe leivahaea va ka ha?

⁸ Ara ero maeaeaive — Are erero elavelave lei ehohoe leivahaeakilai. Aka haela ve Akore kihoreraki la hoa are meahaiapo ve ikikekela haela eavakilai ha?

Pharisee haela i Tax korukaia haela ila

⁹ Are kai elare mai ehohoe kelavalula kai haela aea kelavaki aue la haela ma parabole v'ila maeaeape:

¹⁰ Haela orahokaila Hehe Uvi ivaiva leikive pekahavape, aeva Pharisee haela, aeva tax korukaia haela.

¹¹ Pharisee haela epavi elare ivaiva mari ape, Aualari, ara aro thank you ave ehovea ara haela oaria, korea, i haeae i airi pavora mai leilula la haela hovea va ka, ma tax korukaia haela hovea.

¹² Ara hepetome aeva hare orahokaila ere ereavila, ara va arave eharu au hamurea eapapo avaravila.

¹³ Aka tax korukaia haela arai ve epavi ovohae kaia ve au iupevahaila, aka arahu koavi mari ape, Aualari, ara mai heaha haela, araro ikiheroe leikive.

¹⁴ Ara ero maeaeaive — Ma haela elare uvi ai iki ehoe le leipe, oropa la haela va ka: ehovea pelaea leivila la haela hilaukilai, maeoka la haela lei morapaeakilai.

Iesu akoremari titaeka lei momorapupe

¹⁵ Ere areve leia akoremari titaeka kari ekepe ehovea ere va ikivere are erero mai koharakive: aka kilea haela erero eavi aihukamaeape.

¹⁶ Aka Iesu erero itavavahaeai mari maeaeape, Akoremari titaeka ekekive heroe, erero kahereavalue, ehovea ere v'ila Aualari ve basileia iele leikilai.

¹⁷ O iele ara ero maeaeaive, Aualari ve basileia akore hekai hovea avaki aue la haela, are iele havahu leia araea va ka.

Ovokake iele: Erohoho va hereavaki eharu

¹⁸ Akea haela ae arero maeape, Amua veveke, ara leari leikilai ovokake haiapo aeakilai ha?

¹⁹ Iesu arero maeape, A araro rare veveke la itavaki ehovealeve — haela oaria veveke va ka, Aualari hiki.

²⁰ A va pupu ore, Airi pavora mai kalailue, oa i lou ila momorapuki.

²¹ Are arero maeape, Ma eharu oaria ara hekai hoa ikiki ma hoa kiva leivila.

²² Iesu la oharo iapai mari maeape, A va eharu haroapo hiki karia. A va ai elare eharu oaria ilaea lei merava haela aiarakive; a va kaia ve erohoho oaria aeakilai, iki arave airekai ekela.

²³ Aka are la oharo iapai ikihairihairi le leipe, ehovea are va erohoho haela iele.

²⁴ Iesu lari eavi mari maeape, Erohoho haela Aualari ve basileia arahavakive heraho iele.

²⁵ Camel karahe ura avuhapakive heraho perehekai la, aka erohoho haela Aualari ve basileia araeakive heraho eapapo iele.

²⁶ Ma oharo iapape haela maeape, Laelave ovokake leita leikilai ha?

²⁷ Aka are maeape, Haela haveva leivila la eharu oaria Aualari aupovearai.

²⁸ Peter arero maeape, Iapai, ela elare eharu haitapai ave airekai ekevahaeape.

²⁹ Are erero maeaeape, O iele ara ero maeaeaive — Areve uvi aka uva, aka apavara, aka oalou, aka akoremari, haela la hakorepakilava ehovea Aualari ve basileia,

³⁰ Are maeakoko aeakilai, ma hoa, aeva aireaki basileia hoa ovokake haiapo aeakilai.

Iesu ve aireaki apaki oharo aea

³¹ Are 12 haela kari ai erero maeaeape, Iapaila, elaviila Jerusalem pekahavakive: peroveta haela haela ve Akore v'ila haeape la eharu oaria kihorerakilai.

³² Ehovea ere arero ita lahua haela avarakilai, ere arero heheo arilai, hararuakilai, kai areve maea ve apea koakilai.

³³ Ere arero haru ha huru le harilai: aireaki hare ilehoila are uroukilai.

³⁴ Ere ma oharo oaria mekari au iapaila — ehovea ma oharo ve iele ere v'ila au avarapape, la oharo ve iele ere au kelavaila.

Iesu ovohae kariri haela lei veveke leipe

³⁵ Iapaila — are Jericho maeamaea aupe la hoa — ovohae kariri haela ae oki poe ve meru velavela leivila haiavape.

³⁶ Are haela lakea auvahaelula iapai, areve iele ve velavela leipe.

³⁷ Ere arero maeape, Iesu Nazareth haela mave auve.

³⁸ Are ara mari hape, Iesu, David ve akore, araro ikihuru hela leiki.

³⁹ Oropaki auvahaeape la haela arero erereape, oharo eapapo kailue. Aka are aeka ara eapapo maria hape, David ve akore, araro hela ikihuru leikive.

⁴⁰ Iesu aupavi arero lai ekekive maeape. Are ekepe la hoa Iesu arero velavela leipe,

⁴¹ A va ikivere ara aro leari leikilai ha? Are arero maeape, Arave ovohae ovava leikive.

⁴² Iesu arero maeape, Ave ovohae veveke leila, ave ikikekela aro lei lamakurila.

⁴³ Hoa haroapo areve ovohae ovava leipe. Are arero airekai ai Aualari morapaeape. Haela oaria eavi Aualari momorapupe.