Luke 17 - Pupu Oharo Āre 1963 Genese 1970 Rute 1972

Iesu ve kileaki oharo uku

¹ Are areve kilea haela maeaeape, Hereavaki hoa iele kihorerakilai, aka ikihuru hela ehovea haela ve oki hereavaki la haela.

² Veveke, wheat hae haipepekaki have la haela ve karave heropakive, kai arero avavu iele paraeakive, are maria akore hekai hereavaki ave.

³ E va kiva auhohi leila, ave apoheari aro haeae la leikilava, arero erereakive: are haeae ve ikihuru laleikilava, areve haeae hapururukaki.

⁴ Are aro hare haroapo hoa 7 haeae laleikilava, kai hoa seven kara ikihuru lei aro la maeakilava, are iki le helari areve haeae hapururukaki.

⁵ Aposetolo haela Amua maeape, Elave ikikekela lei aheke leikive.

⁶ Amua erero kavale maeaeape, Eve ikikekela mustard hae ve aheke hovea la leikilava, e va ma lauka kora mari maeakilai, A hareai ahea ma ure ve epavakilai, are kai eve la oharo iapai lari leikilai.

⁷ Aka, e v'ila kekele ihaki horova haela, aka mamoe kiva haela ila haela ae, are la horova haela oru ve kihoreraki la hoa arero mari maeakilai, Aula, eapai larive ha?

⁸ Ka, are va arero mari maeakilai, Arave eapai karikikive, pura hahai arave eapai avikela, ara eapai ma ila oropa larilai, ave eapai i ma ila aireaki larilai.

⁹ Are la horova haela thank you oharo maeakilai, ehovea are arero ape karava maeape la horova oharo are iapape ha?

¹⁰ E kara laria, ero ape karava maeaeape la eharu oaria e va lailava, e va maeaki, Ela horova haela veveke havahu ka, ela leipe horova elaro ape karava maeaeape la horova hiki.

Iesu leper haela 10 lei makukuripe

¹¹ Iapai — Ere Jerusalem la okiharo pekahavape la hoa — ere Samaria i Galilee ila ve aru hihi auvahaeape.

¹² Are karikara ae pekape la hoa leper haela 10 arero koarape:

¹³ Ere va arai ve epavi ara mari hape, Iesu, Amua, elaro hela ikiheheroe leikive.

¹⁴ Are erero eavi mari maeaeape, Auila, eve maea oharo haela amoeaki. Ere auvahaeape la hoa ereve maea veveke le leivahaeape.

¹⁵ Ere ve haela haroapo elare maea veveke leivila la eavi aire helari Aualari ve rare ara hai morapaeape.

¹⁶ Are Iesu ve loa ipi ve ekaopi thank you oharo ape. Are va Samaria haela.

¹⁷ Iesu arero kavale maeape, Haela 10 hareho veveke au leivahaeakiaue ha? 9 haela lahoa apearo ha?

¹⁸ O iele haela oaria Aualari morapaeakive au ekekue ha, ma ita lahua haela hiki ha?

¹⁹ Are arero maeape, Urou, elare oki aukive, ave ikikekela aro lei lamakurila.

Basileia ve ekeki hoa

²⁰ Pharisee haela arero velavela leivahaeape, Aualari ve basileia leahau ekekilai: are kai erero kavale maeaeape, Aualari ve basileia hihika ve ekeva ka.

²¹ Ere kara mari maea va ka, Are ma, aka are la! Iapaila, Aualari ve basileia eve ureve aeave.

²² Are areve kilea haela maeaeape, Hare ae kihorerakilai, e va haela ve Akore ve hoa hovea eavakive ikivere la leikilava, aka e va arero eava va ka.

²³ Ere ero maeaeakilai, Maia eavaila, leia eavaila, E kauvahaelue, ereve airekai auvahaea va arekaea;

²⁴ Ehovea hoveahovea kevao kaia ve ukai makaemakae leiki la hoa, are ukai kara makaemakae leikilai, areve hoa hovea, haela ve Akore kara laria.

²⁵ Aka oropa areve kakare oaria koarakilai, kai ma vilakao arero haure leikilai.

²⁶ Noah ve hoa leipe hovea, haela ve Akore ve hoa kara laria leikilai.

²⁷ Ere eapai i ma ila lalavahaeape, uavila maepape i karape kara, aiai Noah vevaea ureve pekape la hare, aiai ma haa lei, erero haela oaria hareho le ihahape.

²⁸ Lot ve hoa kara hovea, ere eapai i ma ila lalavahaeape, ilaea lei kakavae leivahaeai, oru hahai uvi kara kukueape.

²⁹ Aka Lot Sodom harepape la hare kaia ve a i salupa ila, lai hovea, ihaupe, erero heaha lei haeavahaeape.

³⁰ La hovea haela ve Akore hihika leiki hoa kihorerakilai.

³¹ La hare, uvi arari akeave aeavila la haela, uvi ureve apeaki la eharu kailakive ka hoahukalue: oru apea la haela kara kihorera va arekaea.

³² Lot ve uva ikikekelavakive.

³³ Ovokake kiva leikive ikivere la haela le havoavakilai, aka ovokake havoavaki la haela lei makurikive.

³⁴ Ara ero maeaeaive — La oroa haela orahokaila ita haroapo avuku la urupakilava, haela aeva hareavakilai, haela aeva aeakilai;

³⁵ Uavila orahokaila hareho wheat hae la huharakilava, aeva hareavakilai, aeva aeakilai.

³⁶ Haela orahokaila oru horova la leikilava, aeva hareavakilai, aeva aeakilai.

³⁷ Ere arero kavale maeape, Amua, lahoa? Are erero maeaeape, Apape la maea ve la ita, aivau laralula la ori korukaiakilai.