Luke 15 - Pupu Oharo Āre 1963 Genese 1970 Rute 1972

Au havoavape Mamoe akore haroapo

¹ Tax korukaia haela i mai heahaha haela oaria iki areve leia areve oharo iapakive.

² Pharisee i Sadducee haela elarelare hihiri oharo mari avahaeape, Ma haela mai heahaha haela auhohi leivila, are ere i hareho eapai lalavila.

³ Are erero parabole oharo mari maeaeape,

⁴ Eva leita haela are va mamoe 100 ila, haroapo la havoavakilava, are 99 ita merava haitapava ka ha, kai ai havoavape la mamoe haropi haropi aiai koarakilai la.

⁵ Are arero la koarakilava, are arero horo oraiavi ikiveveke le leikilai.

⁶ Are elare ita kihoreraki la hoa are apavara haela i are i hareho apealula la haela oaria itavi mari maeaeakilai, Elaviila hareho ikiveveke leivahaeaki, ehovea lahavoavila la mamoe ara le koarai.

⁷ Ara ero maeaeaive — Laria kara ere kaia ve ikiveveke eapapo leivahaeakilai, ehovea mai heaha haela haroapo areve haeae ve ikihuru leikilai, 99 mai ehohoe haela ve la ikiveveke hoveahovea va ka, ehovea ereva haeae au leila.

Au havoavape moni haroapo

⁸ Aka uamari ae va moni 10 ila, areve moni haroapo la havoavakilava, are lamepa avea va ka ha, uvi hoapai arero haropi haropi aiai koarakilai.

⁹ Are arero koaraki la hoa are apavara ila are i hareho apealula la haela itavi erero mari maeaeakilai, Elaviila hareho ikiveveke leivahaeakilai, ara la loapaila la moni ara le koarai.

¹⁰ Laria kara ara ero maeaeaive — Haela haroapo areve haeae ve ikihuru laleikilava, Aualari ve aneru oaria ikiveveke leivahaeakilai.

Au havoavape akore haroapo

¹¹ Are maeaeape, Haela ae ve akoremari orahokaila;

¹² akoreheari areve oa maeape, Oa, ara va aireaki aeaki la eharu araro mave aikiara. Oa areve eharu erealila ve hamuri aiarape.

¹³ Haiapo ka akoreheari elare eharu korukai, ita apehai hahi aupe, leia areve eharu naoae naoae mai heaha ila ilaea lei lei kari le leivahaeape.

¹⁴ Areve eharu oaria karia leivahaeape la hoa la ita ve mea avora leipe: are merava le leipe.

¹⁵ Are la ita haela ae ve horova leipe: are arero ilaita ve eapai kiva leikive maeape.

¹⁶ Are ilaita lape la eapai ikivere lei lape, ehovea haela arero eapai au avaraila.

¹⁷ Are iki auhohi kekelape la hoa are elare iki ure mari kekelape, arave oa ve horova haela oaria eapai oaria, kepea ila, ara kai eroa hahave, apaki maea iele.

¹⁸ Ara urai oa ve leia aukilai, ara kai arero maeakilai, Oa, ara va kaia oropa ve ai ave oropa ve mai haeae eapapo leipe.

¹⁹ Ara veveke va ka a akore rare arive. A va ave horova haela araro rare ari.

²⁰ Are urai oa ve leia aupe: are va ekepe la hoa oa arero arai eavi ikihuru eapapo leipe: are vivila areve maea hahavi arero ape popoa i overa hihipe.

²¹ Akore areve oa mari maeape, Oa, ara va kaia ve oropa ai ave oropa ve mai haeae eapapo leipe. Ara va akore veveke va ka ave akore rare arive.

²² Aka oa areve horova haela maeaeape, Pura veveke elavelave avikela areve maea orakive: maimari areve mai lekoka oraki, loa iilu areve loa la oreauila.

²³ Boromakau akore kapare aviki harive — elaviila ikiveveke leivahaeai eapai larilai.

²⁴ Ehovea arave ma akore api kai ovokake leipe — au havoavape kai mahau le eavi. Ere ikiveveke leivahaeape.

²⁵ Areve akoreapo oru ve horova leipe. Are uvi leia pekape la hoa are hivi i mahea ila iapape.

²⁶ Are horova haela itavi ma eharu ve iele apevelavela leipe.

²⁷ Are arero maeape, Ave akoreheari leikila, laelave ave oa boromakau akore kapare lahila, ehovea are maea popou aheke ila leikila.

²⁸ Are hihiri lei uvi pekakive haure leipe. Oa kihoai arero here leipe.

²⁹ Aka are oa kavale kimaeape, Iapai, ma hitolo oaria ara ave horova hiki leivila — ara ave pupu oharo haroapo haure au leila. Aka a va ara v'ila goat akore au haila, ehovea apavara ila ikiveveke leikive.

³⁰ Aka ma ave eharu oaria mai heaha ila naoae naoae leipe la akore lai leikilava, a va boromakau akore kapare are v'ila le hara.

³¹ Are arero maeape, Akore e, a ara i hareho mea oaria aeavila, arave eharu va ave eharu.

³² Veveke ela ikiveveke maria leikive — ehovea ave akoreheari api kai ovokake laleila — ela arero havoavi kai le koarai.