Luke 14 - Pupu Oharo Āre 1963 Genese 1970 Rute 1972

Maea epe apo heheva haela sabati hare lei makuripe

¹ Hare ae are Pharisee haela ve akea haela ve uvi sabati hare eapai larive pekape la hoa ere arero ovohae auhohi eavape.

² Iapai — maea epe apo heheva haela areve oropa ve ekepe.

³ Iesu Pharisee haela i pupu ore haela kavale mari maeaeape, Sabati hare haela ve maea veveke leikive heroe ha, aka pupu ila? Ere kavale oharo ka.

⁴ Are la haela lai ai maea veveke lei le paraeape.

⁵ Are erero maeaeape, Haela ae areve asini aka boromakau ma karu ve la oaukilava, are arero sabati hare kara elavelave hareava va ka ha?

⁶ Ere va arero kavale oharo kimaeakive horahora le leipe.

Maeoka mai: Hurae hoa haiavaki mai

⁷ Are la eapai ve itavavahaeape haela akea ita avakive ikivere leivahaelula eavape la hoa are erero parabole oharo mari maeaeape:

⁸ Haela ero eapai larive la itavakilava, akea ita kavalue, ave akea haela aire ekeki ave,

⁹ Ealilara itavape la haela kara iki aro mari maeaki ave, Ma haela ve ita hakurepa, aire a maeoka eapapo lei ipi havahu la ita hoaukilai.

¹⁰ Aka are itavaki hoa a hoai ipi havahu la ita haiava, laelave, aro itavape la haela ve ekeki hoa are aro mari maeakilai, Kake e, a va akea ita pekaki — la hoa a i hareho eapai lari haela aro le morapaeakilai.

¹¹ Ehovea maea pelaea leiki la haela maeoka leikilai — maeoka leiki la haela ere le morapaeakilai.

¹² Are arero itavape la haela maeape, A va hare hoa aka hailaea hoa haela eapai larive la itavakilava, a i hareho loalula la haela, aka apoheari, aka apavara aka erohoho haela kaitavavahaelue, a leipe la hurae ve kavale leikive aro kai itavaki ave.

¹³ Aka a va hurae la leikilava, merava haela i loa hahaeae haela, i ovohae kariri haela la itavavahaeaki.

¹⁴ A va ikiveveke leikilai, ehovea ere va aro kavale leikive eharu karia: mai ehohoe haela apihaeai kai urahukaki la hoa a ikiveveke iele leikilai.

Uva laeaki hurae ve parabole

¹⁵ Leia eapai lape haela ae ma oharo iapai mari ape, Aualari ve basileia ureve eapai larilai la haela ikiveveke leikilai.

¹⁶ Aka are arero maeape, Haela ae hurae leipe kai haela oaria itavavahaeape.

¹⁷ Eapai larive hoa are areve horova haela ae paraeape — au itavavahaeape la haela maeaeakive, Ekeila, eharu oaria hoveahovea overa leivahaeai.

¹⁸ Kahara, ere oaria ikihairhairi oharo ape. Haela ae va mari ape, Ara kekele uku ilaea leipe ara va la ita ovohae eavakive aukive leive: ikiheroe hela, ara kahara.

¹⁹ Haela ae mari ape, Ara va boromakau maroka hue ila ilaea leipe; la boromakau ara maea hovea eavakilai.

²⁰ Haela ae va mariape, Ara uva are laeape, laelave ara va au va ka.

²¹ La horova haela iki areve haelapo ma oharo oaria maeape. La uvi haela hihiri lei horova haela mari maeape, A va okiharo i oki lakalaka ila elavelave auki — leia ve merava i maea kakare i ovohae kariri i loa hahaeae haela oaria ila kari ekekive.

²² Horova haela maeape, A lakimaeaila la oharo overa leila, ita kepea le aeave.

²³ Haelapo areve horova haela maeape, A va kaipure i kara mahokaea ve okiharo oaria aula, leia ve haela oaria maeaeaki, ere va hareho ekevahaeakive, arave uvi heloekoakive, heroe.

²⁴ Ehovea ara ero maeaeaive, Oropa itavavahaeape la haela oaria hareho arave eapai aireaki lalavahaea va ka.

Basileia ve horova haela heraho ikikekela

²⁵ Haela oaria are i hareho auvahaeape: are helari erero mari maeaeape:

²⁶ Haela arave oki la ekekilava kai are havahu ve oa i lou, i uva i akoremari i apoheari i maritaloa ikihairhairi leikiaue la leikilava, kaire, are havahu ve ovokake kara, are arave kilea haela hovea ka.

²⁷ Areve satauro oraiavi araro airekai ekeki aue la haela are va arave kilea haela va ka.

²⁸ Ehovea e leita haela uvi arari kukive ikivere la leikilava, oropa haiava va ka, kavale oropa ikikekelakive, areve moni hoveahovea la, aka hovea va ka ha?

²⁹ Aireaki hare are va ihau oropa paparaehai uvi hovea leikiaue la leikilava, arero eavaki haela oaria aireaki arero heheo i ari ave maria,

³⁰ Ma haela uvi horova ipopeavape, kai karia au leila.

³¹ Ae va le la amua iki amua ae i mare arive ikivere la leikilava, oropa are haiava va ka ha, iki ure heheavakive, areva haela 10,000 ila, 20,000 ila ekeki la amua are heaorapakilai la, aka heaorapa va ka?

³² Are hovea leikiau la leikilava, la amua arai ve pavaki la hoa are havila leiki oharo paraeakilai la.

³³ Laelave e va leita haela, elare eharu oaria hahaure leikiaue la leikilava, are va arave kilea haela hovea lei va ka.

³⁴ Kaikara va veveke, aka la kaikara areve iele la havoavakilava, are va leari lei hoveahovea leikilai ha?

³⁵ Are va oru ve hovea ka, kai eroroma ita kara hovea ka. Haela arero au hiki aukapakilai. Avako ipi haela ere iapakilai.