Luke 13 - Pupu Oharo Āre 1963 Genese 1970 Rute 1972

Mai heaha ve ikihelariki oharo

¹ La hoa leia apeape haela uku arero Pilate hehe uvi ve maea morava leipe hoa Galilee haela ve apu kakaitape la hari kileape.

² Are erero kavale maeaeape, Eve ikikekela ma Galilee haela ve haeae eapapo havahu, kai Galilee haela oaria ve haeae perehekai ha? ehovea ma haela kakare ma mai lei koarape.

³ Ara ero maeaeaive — Ka! Aka e va mai haeae ve ikihuru leikiaue la leikilava e ka laria apihaeakilai.

⁴ Aka la haela 18, Siloam uvi arari erero akea ve hilai haipepekape la haela — eve ikikekela ere va mai heahaha oaria haela ha? Jerusalem haela oaria va perehekai ha?

⁵ Ara ero maeaeaive — Ka! Aka e oaria mai hahaeae ve ikihuru leikiaue la leikilava, e kara laria apihaeakilai.

Hae karia lauka kora ve parabole

⁶ Are parabole erero maria kileape: Haela ae ve vine oru ureve lauka kora ahai epavape. Are iki leia hae veveke haropi au koaraila.

⁷ Are ita kiva haela mari maeape, Iapai, ara hitolo oaria ma kora hae eavakive ekevila, kai mea oaria hae eava va ka: arero haeaki, are iele horeva va ka.

⁸ Are kavale maeape, Haelapo, ma hitolo haroapo are pavakilai, ara areve ipi la ihai areve elele ve e uku roarakila;

⁹ Are va hae iele la horerakilava, heroe, are va hae iele horerakiaue la leikilava, ava arero le haeakilai.

Uamari ae Sabati hare lei makuripe

¹⁰ Are ereve synagogue ae ve sabati ae oharo kileape.

¹¹ Iapai — uamari aeva ekepe are va hitolo 18 ovehahu ila mea oaria au hiki koekaopi veavila, ehoe urai vea va ka.

¹² Iesu arero eavi itavi maeape, Uamari, ave maea heaha le parae.

¹³ Are arero mai kohari, are urai elare maea ehoe lei Aualari morapaeape.

¹⁴ Synagogue kiva haela hihiri leipe ehovea Iesu sabati hare haela lei makuripe. Are haela oaria maeaeape, Horova hare six le apearo, la haela lei makukurikive ekeki va heroe, sabati hare va arekaea.

¹⁵ Amua arero kavale maeape, A opore haela e, lehae! E haela oaria sabati hare eve boromakau aka asini va areve hahaki ita ve paraea va ka ehovea ma avarakive ha?

¹⁶ Laelave, Satan ma hitolo 18 au hahape uamari, Abraham ve mari, arero hahape la, ela sabati hare helaukakive veveke va ka ha?

¹⁷ Are leia ve ape la hoa are i iri haela oaria maeoka leivahaeape: haela oaria kara are leipe la horova v'ila iki veveke eapapo leivahaeape.

Mustard hae ve parabole. Bread muramura ve parabole

¹⁸ Laelave are mari ape, Aualari ve basileia learia maeakive ha? Ara arero le la eharu hovea maeakilai ha? Are va mustard hae hoveahovea.

¹⁹ Haela la hae kaivi elare oru la aporape — are ahai kora hovea le leipe: akea ve la ori oaria iki areve mamaeako ureve elare loro avakive.

²⁰ Are kai mari maeape: Ara Aualari ve basileia le la eharu hovea maeakilai ha?

²¹ Are va yeast hovea — Uamari aeva la yeast kaivi flour ve hekako ilehoila ve lamuki aiai flour le mohoavakilai.

Ovokake okiharo koko hekai

²² Are elare oki ai karikara ehoaha i titaeka ila ve areve oharo kileape, aiai Jerusalem ve oki aupe.

²³ Haela ae arero maeape: Amua, haela haroapo haroapo hiki ovokake leivahaeakilai ha? Are arero maeape:

²⁴ Okiape koko hekai ve arahavaki ikivere leiki: ehovea haela oaria arahavakive ikivere leivahaeakilai, aka hoveahovea leivahaea va ka.

²⁵ Uvi haela urai okiape overa kolakaukakilava, e va mahokaea ve pavi okiape kokoeaki la haela mari la maeakilava, Amua, okiape ela v'ila hela hapaki. Are ero kavale kimaeaeakilai, Ara ero haveva, e va lela haela?

²⁶ E va la hoa arero maria maeakilai, Ela a i hareho eapai i ma ila lalavahaeape — a va elave okiharo ve oharo kileape.

²⁷ Ara ero maeaeaive: Are aeka ero kavale maeaeakilai, ara ero ore va ka, e va lela haela ha?

²⁸ E va Abraham i Isaac i Jacob i peroveta haela ila hareho Aualari ve basileia ureve la eavakilava, e oaria mahokaea ve haruapape la hoa, e va hivavara arilai, kai kao heheavakilai.

²⁹ Ere oaria kauri ukai ve i hurava ukai ve iki Aualari ve basileia ureve hareho avakilai.

³⁰ Iapai, aireaki haela uku, oropaki leivahaeakilai, oropaki haela uku aireaki leivahaeakilai.

Herod ve ikiheaha

³¹ La hoa havahu Pharisee haela uku iki arero mari maeape, A va elavelave urai aukive — Herod ikivere aro harive.

³² Are erero kavale maeaeape, E va auila la ave merava mari maeaki: Iapai — ara mahau i opoa ila ovehahu haruapavila kai haela lei makukurivila — aire hare ara va horova hoveahovea leikilai.

³³ Kahara, ara elare oki mahau i opoa hare i aireaki la hare kara auvila — ehovea hovea ka peroveta haela Jerusalem mahokaea ve la apakilai.

Jerusalem ve ikihuru oharo

³⁴ Jerusalem, Jerusalem, peroveta haela haeavila karikara e, eve leia paparaehape la haela have koavavila karikara e, ara mea oaria ave akoremari korukaiaki va ikivere leivila, kokora lou akoremari maho ureve movoro kohari eaeavila hovea, aka e va ikivere au leila.

³⁵ Iapai, eve uvi haua ka le leipe — ara ero maeaeaive — e va araro eava va ka aiai e maeakilai, Amua ve rare v'ila ekeki la haela morapaeaki.