Luke 11 - Pupu Oharo Āre 1963 Genese 1970 Rute 1972

Amua ve Ivaiva

¹ Iapai: are ita ae ivaiva lei kari leipe la hoa areve kilea haela ae arero maeape, Amua elaro ivaiva mai kileavahaeakive, John areve kilea haela kara laria kileape.

² Are erero maeaeape, E va ivaiva leiki hoa oharo mari ari, Oa e, ave rare lei morapaeaki — Ave basileia ekekive —

³ Elave hare oaria ve eapai aikiaraki.

⁴ Elave mai heahaha hapururuka, hoveahovea ela elaro hararualula la haela ve hahaeae hapurukavalula. Elaro amuraeharae ita kari kaulue.

Ivaiva aheke: Oroa a hihi hahi haela

⁵ Are erero maeaeape, Eva leita haela elare kake haela ve ita oroa hoa la aukilava arero velavela mari leiki, Kake, ikiheroe, araro pai hela ilehoila aikiaraki;

⁶ ehovea arave kake haela ae hahi ve la mave ekeve: ara kai arero avaraki eapai karia.

⁷ Uvi ureve la haela maeakilai, Araro kahararuarue: okiape overa kokauka, ela i akoremari ila hareho avuku overa urupa: ara urou va ka aro eapai avarakive.

⁸ Ara ero maeaeaive, are urou va ka arero eapai aiarakive, ehovea are va areve kake haela, aka, ehovea areve ape karava ve oki, are urai arero eapai le aiarakilai.

⁹ Ara kai ero maeaeaive, Apevelavela leiki, ero aiarakilai; haropaki, e va koarakilai;

¹⁰ kokoeaki — okiape e v'ila hapakilai. Ehovea velavela leiki la haela, okiape arev'ila hapakilai.

¹¹ Eve oalou haela leitaura, areve akore arero pai velavela la leikilava, are arero have la avarakilai, aka ekaka velavela la leikilava, are va ekaroa avarakilai?

¹² Aka kokora hae velavela la leikilava are arero aukara avarakilai?

¹³ E va heaha haela la, akoremari meru mekaka aiaraki ore la leikilava, eve kaia ve Oa arero apevelavela leilula la haela, iele havahu aiarakilai.

Iesu Satan koaraki opore oharo

¹⁴ Are oharo haveva haela ve ovehahu la avakape; ovehahu arero hakurepape la hoa oharo haveva haela oharo le hukavape. Haela oaria va ikihorahora eapapo leivahaeape.

¹⁵ Aka uku haela maeaeape, Are Beelzebub oveheaha ve amua ve aheke v'ila ovehahu va haruapavahaevila.

¹⁶ Uku haela arero au amuraeai arero kaia ve ihova v'ila velavela leivahaeape.

¹⁷ Aka are ereve ikikekela ore lei mari maeaeape, Elare hahari hahari arura la basileia heaha leikilai, kai elare hahari hahari arura la uvi are hilaukilai.

¹⁸ Satan kara elare hahari la leikilava, areve basileia leari lei aheke ila epavakilai ha? Ehovea e lakimaeaila ara va Beelzebub ve aheke v'ila ovehahu haruapavahaevila.

¹⁹ Ara Beelzebub ve aheke v'ila ovehahu la haruapakilava, eve akoremari leita ve aheke v'ila erero haruapailula ha? Laelave ere havahu ero heheavakilai.

²⁰ Aka ara Aualari ve mai ve ovehahu la haruapakilava, Aualari ve basileia eve aru hihi ve me kihorerave.

²¹ Mare arive eharu ila haela aheke areve uvi kiva la leikilava, areve eharu oaria popou hiki apeakilai.

²² Aka aheke haela ae iki la haela kolahilapakilava, areva aheke la kekelape la eharu oaria aireaki la haela le aeakilai; are kai areve erohoho eharu oaria kara hamureakilai.

²³ Araro koaraki aue la haela are va arave iri haela. Ara i hareho korukaiaki aue la haela ere naoae titavi le loakilai.

Iki auhohi helarikive

²⁴ Ove heaha haela la hakurepakilava, are ita merava aiai ikiparaeaki ita haropavila kai koara va ka. Laelave are mari maeakilai, Ara va helari ai ara hakurepape la uvi aeka pekakilai.

²⁵ Are leia pekai la ita la eavakilava, overa hoapai veveke le leipe.

²⁶ Kahara, are ai ovehahu 7 heahaha iele la kari ekekilai: ere hareho la uvi pekahavi apeakilai. Oropa heaha perehekai, la haela are va aireaki heaha eapapo leikilai.

²⁷ Iapai — are ma oharo la hukavi la haela oaria ve aru hihi ve uamari haroapo ara mari hape, Aro epape la eharau lei morapaeaki: a lape la amae kara.

²⁸ Aka are mari ape, Maria oharo va heroe — Aualari ve oharo iapai kiva auhohi leilula la haela va momorapuki.

Ihova kaharopalue

²⁹ Haela oaria areve leia korukaiavahaeape la hoa are oharo mari hukavape, Ma vilakoa are va vilakao heaha. Are va ikivere ihova la eavakive: aka are va ihova ava va ka, Jonah ve la ihova hiki ere eavakilai.

³⁰ Hoveahovea Jonah Nineveh haela ve ihova hovea leipe, laria Haela ve akore ma vilakao ve ihova leikilai.

³¹ Diho hoa ve la amua uamari dedehi aireaki urai ma vilakao heheavi erero le hahakilai, ehovea are meahaiapo ve ukai ve ekepe Solomon ve ikiore oharo iapakive — Iapai — Haela me aeave, are Solomon ve akea haela.

³² Aireaki heheavaki hoa Nineveh haela ma vilakao hahakilai, ehovea ere Jonah ve iroro oharo iapai ereve hahaeae ve ikihuru le leivahaeape — Iapai — Haela me aeave, are va Jonah ve akea haela.

Lamepa ve kilea oharo

³³ Haela ae lamepa avelaeakilava, are ipi lalava, aka maua ureve aepa va ka, are va haha akea ve aepakilai, laelave pekahavaki haela oaria ovava le eavakilai.

³⁴ Ave maea ve lamepa va ovohae la — Ave ovohae hihika la leikilava, ave maea hareho ovava le avakilai — are heaha la leikilava, ave maea kara hareho murumuru le leikilai.

³⁵ Kiva auhohi leila, ave ureve la ovava muru leiki ave.

³⁶ Ave maea hareho ovava heloe la koakilava, areve ita aea muru karia, are va iele hareho ovava le vakilai, hoveahovea lamepa veveke ero oaria ovava leikilai.

Iesu Pharisee i Hohoa Haela ila aihukamaeape

³⁷ Are oharo ape la hoa Pharisee haela ae arero itavape ehovea are i hareho eapai larive. Are uvi pekai haiavi eapai le lape.

³⁸ La Pharisee haela ikihorahora leipe ehovea are eapai lape la hoa oropa mi au hukauila.

³⁹ Amua arero maeape, E Pharisee haela ve mai — hekako haita ila mahokaea ve ma huhelavaelula, aka eve ureve korea mai i mai heahaha ila heheloekoape.

⁴⁰ E ihape haela e, mahokaea ve karikipe la haela — ure kara au karikila ha?

⁴¹ Lae vi va, ureve la eharu meru veveke hovea la aiarakilava, aireaki eharu oaria e v'ila veveroro leivahaeakilai.

⁴² Ikihuru hela, Pharisee haela e, ehovea e mint, rue, i kolo titae‐titae ila ka hamurealula, aka ehoe heheavaki mai i Aualari ve ikihuru ila e hahaure leilula: Ma mai veveke va laila va heroe, kai oropa la horova kara hakurepa va ka.

⁴³ Ikihuru hela, Pharisee haela e, ehovea e va ikivere eapapo synagogue la akea ita veveke avakive — kai karikara hihi ve la momorapuki oharo kara.

⁴⁴ Ikihuru hela, ehovea e va hihika leiki aue la kapu ita hovea — ereve akea ve loalula la haela erero haveva.

⁴⁵ Hohoa haeavila haela ae arero maeape, Haelapo, a va ma oharo v'ila elaro kara hareho aihukamaeakilai.

⁴⁶ Are erero maeaeape, Ikihuru hela, e hohoa haealula haela kara — ehovea e haela eharu mehau iele kakare ila oraiaeakive aiaralula, e hareho la mehau mai lekoka haroapo kaiva ka.

⁴⁷ Ikihuru hela, e va peroveta haela ve kapu ita veveke ihavalula, aka la haela eve hauva haela le haeape.

⁴⁸ Laelave e va eve vilali ra leipe la horova e vavahaeai ikivere leilula — ehovea ere erero haeape — e ka erero karu veveke ihavalula.

⁴⁹ Ehoveala, Aualari ve ikiore mari ape — Ara ereve leia peroveta i aposetolo haela ila paparaehakilai — ere va uku hai hararuakilai.

⁵⁰ Laelave meahaiapo avare koare ipopeavape la hoa ikiki mahau, au haeape peroveta haela oaria ve apu ve kavale ma vilakao le leikilai.

⁵¹ Abel ve hoa aiai Zachariah ve apu kaitaupe la hoa (arura haha i hehe ita aru hihi ve apape la haela), o iele ara ero maeaeaive ere ma vilakao la kavale leikive maeakilai.

⁵² Ikihuru hela, hohoa haealula haela e! Ehovea e ikiore ve key hareavape. E havahu au arahavaila, kai arahavalula la haela ve oki e hereavape.

⁵³ Are leia ve kihoaupe hoa, hohoa haealula haela i Pharisee haela ila arero apevelavela oaria leivahaeape kai oharo oaria v'ila arero au amuraeape:

⁵⁴ Ehovea ere va ikivere areve ape ve oharo haeae iapakive.