Luke 10 - Pupu Oharo Āre 1963 Genese 1970 Rute 1972

Kilea haela 70 hahi ve paparaehape

¹ Ma eharu oaria karia lei la, Amua areve ikivere haela 70 karape. Are erero oropa aukive ila orahoka orahoka paparaehape.

² Are erero maeaeape, Hae hovare oaria, aka horova haela oaria ka: laelave e va hae hovare hoa ve Amua ivaiva leila — are horova haela hae hovare ikaeakive paparaehakilai.

³ E va elare oki auila — Iapai, ara ero mamoe titaeka aeha eharu ve aru hihi ve la paparaehakive:

⁴ moni pausi, aroa, loa iilu aikauvahaelue: e va auvahaeaki la hoa haela oharo kamaeaealue.

⁵ E va uvi la pekahavakilava, oropa oharo mari arive, Ma uvi havila avaki.

⁶ Leia havila ve akore la aeakilava, eve la havila are le avakilai. Aka are havila ve akore leikiaue la leikilava, eve havila e aeka avaki.

⁷ E va la uvi haroapo la apeakilava ere ero aiaraki la eapai ma ila lari, ehovea horova haela are va horova ve kavale hovea. E uvi oaria kaloalue.

⁸ Lela karikara e la loakilava, ere ero auhohi la leivahaeakilava, ere eve oropa ve aipeki la eapai le hiki leiki.

⁹ Maea heahaha haela lei makukuri, erero mari maeaeaki — Aualari ve basileia e v'ila le kihorerave.

¹⁰ Lela karikara e la loakilava, la haela ero auhohi leikiaue la leivahaeakilava, ereve oki hihi hoahuka mari maeaeaki,

¹¹ Eve karikara ve elave loa hara la pavaki la kekele mahuvu iele ela eve haeae ve ihova ve lalaeapakilai: aka ma oharo iapai, Aualari ve basileia kihoreraki maea iele.

¹² Ara ero maeaive, Aireaki la hare ve, Sodom perehekai veveke koarakilai, la karikara veveke koara va ka.

¹³ Ikihuru hela, Chorazin! Ikihuru hela Bethsaida! Ehovea eve oropa leivahaeape la horova veveke Tyre i Sidon ila oropa ve la ma laila, ere va tapua i a hurae ve avalula ikihuru overa leivahaeape.

¹⁴ Aka aireaki heheavaki hoa ve Tyre i Sidon ila perehekai veveke koarakilai, e veveke koara va ka.

¹⁵ A Capernaum, ave rare kaia akea ve la morapaeakilai ha? Aro Hell ve ipi ve lai hilaukilai.

¹⁶ Haela eve oharo la iapakilava, are arave oharo kara iapakilai: ero hahaure la leiki la haela are araro kara haure leikilai; araro haure leivila la haela are araro kiparaeape haela haure leivila.

¹⁷ Haela 70 ikiveveke ila kihoreavi mari maeape, Amua, o iele haelaharihu kara, ehovea ave rare, elave oharo iapailula.

¹⁸ Are kai erero maeaeape, Ara Satan kaia ve kevao hovea oauvila eavape.

¹⁹ Iapai — Ara ero aheke leivahaearo ehovea ekaroa i aukara ila loa haeakive — eve aheke iri haela oaria ve aheke va akea ve leikilai. Eharu oaria ero heaha leivahaea va ka.

²⁰ Aka e va ikiveveke kalaivahailue ehovea ovehahu eve oharo iapailula — E va ikiveveke iele leivahaeaki ehovea eve rare kaia ve le apearo.

Iesu ve ikiveveke oharo

²¹ La hoa havahu are Ove Veveke ila ikiveveke lei mariape, Oa e, kaia i meahaiapo ila ve Amua, ara va ikiveveke ehovea a va ikiore i elavelave iapaki haela ma eharu au amoeaila, aka akoremari titaeka la kileavahaeape — ehovea ave ikikekela, laria veveke.

²² Arave Oa eharu oaria araro aikiarape. Haela oaria Akore haveva, Oa hiki arero ore: haela oaria kara Oa haveva, Akore hiki arero ore, akore kai amoeakive ikivere, la haela hiki.

²³ Are helari kilea haela muruhari maeaeape, E eavaki la eharu, haela la eavakilava ikiveveke leikilai.

²⁴ Ara ero maeaeaive — e eavavahaelula la eharu peroveta i amua ila oaria ikivere leivahaeape aka ere va au eavaila — e iapailula la oharo ere ikivere leivahaeape, aka ere va au iapaila.

Ovokake iele avaki okiharo

²⁵ Iapai — Pupu ore haela ae urai arero au amuraeape maria, Haelapo ara learia leikilai, ehovea ovokake haiapo aeakive?

²⁶ Are arero maeape, Pupu ve oharo leari hape ha? A leari mureavila ha?

²⁷ Are kavale maeape, A va ave Amua Aualari ave iki oaria, ave ove oaria, ave ikikekela oaria ave aheke oaria ila ikivere leikive — A i hareho aeavila la haela elare maea hovea ikivere leikive.

²⁸ Are arero maeape, Ave kavale oharo ehoe. Mari la leikilava, a ovokake le avakilai.

²⁹ Aka are ikivere elare iki ehoe leikive, laelave are velavela leipe, Ara i hareho aeavila la haela leita?

Ikiheroe Samaria haela ve parabole

³⁰ Iesu kavale mariape, Haela ae Jerusalem aiai Jericho hahi aupe. Korea haela arero pae areve pura hareavi arero ha le hakurepape, apaki maeamaea.

³¹ La hoa oharo haela ae leia hahi aupe: are arero eavi oki poe ve helari arero hakurepai aupe.

³² Levite haela kara lari leipe. Are la ita ekepe. Are kara arero eavi oki poe ve helari arero hakurepai aupe.

³³ Aka Samaritan haela ae are aeaveape la ita ekepe. Are arero eavi ikihuru eapapo leipe:

³⁴ Are areve leia hoai hohara oil i wine ila kaitavi pura veveke hahape. Are arero kaivi are havahu ve asini akea ve aepai arero hahi haela ve uvi haroapo lai ai arero kiva le leipe.

³⁵ La opoa hare are denarius orahokaila areve pausi oaeai uvi kiva haela aiarape — are kai mariape. Arero kiva leila — a va moni kepea arero kiva leiki la kavale la leikilava arave aireaki ekeki hoa ara aro kavale leikilai.

³⁶ Ave iki lehae ha — ma haela ilehoila ve, korea haela paeape la haela i hareho aeape haela va leita ha?

³⁷ Are kavale maeape, Arero ikiheroe leipe la haela. Iesu kai arero maeape, A v'ai lari lei va heroe.

Martha i Mary ila

³⁸ Ere elare oki aiai karikara haroapo pekahavape. Leia uamari ae rare Martha areve uvi ureve arero auhohi leipe.

³⁹ Areve mariheari ve rare Mary. Mary Iesu ve loa ipi haiavai areve oharo iapape.

⁴⁰ Martha uvi horova oaria ve heraho leipe. Are iki Iesu la maeape, Amua — A kekela va ka ha — arave mariheari arave ma horova oaria koara va ka? Arero mavaila, are araro hukapakive.

⁴¹ Aka Iesu arero mari maeape, Martha, Martha, a va ikihorahora i heraho ila, ehovea horova oaria.

⁴² Eharu haroapo va iele ila — Mary la eharu veveke ikivere laleila. Haela areve la eharu elare ve ava va ka.