Luke 1 - Pupu Oharo Āre 1963 Genese 1970 Rute 1972

Hapaki oharo

¹ Elaviila iki iele kelavalula la eharu oaria haela oaria haeakive ikivere overa leivahaeape;

² Ere ovohae eavavahaeape kai koaravahaeape la oharo ve horova ere elaro kara kileavahaeape;

³ Laelave arave ikikekela ara kara, ehovea avare koare leivahaeape la eharu ara ore overa leivahaeape, la eharu oaria ehoe hiki a v'ila haeakive, Theophilus veveke e,

⁴ Ehovea aro overa kileavahaeape la eharu oaria ve iele a ore leikilai.

John Baptist ve aire epaki oharo

⁵ Herod amua, Judea ve hoa, haela ae rare Zacharias, Abijah ve eravo haela i areve uva, rare Elizabeth, Aaron ve eravo mari, ila hareho apearoape.

⁶ Erealila Aualari oropa ve mai ehohoe haela: Erealila mea oaria Areve pupu i ikivere mai oaria ila leivahaeroape.

⁷ Erealila akoremari karia, ehovea Elizabeth uamari korovu, erealila kai haela hoaha le leivahaeape.

⁸ Zacharias, areve oharo haela horova leipe hoa, Aualari oropa ve pekape.

⁹ Are oharo haela ve mai hovea hehe uvi pekai arura haha ve muo veveke muramura aveape.

¹⁰ Haela oaria la muramura aveape hoa mahokaea ve ekakaopi ivaiva leivahaeape.

¹¹ Amua ve aneru areve oropa ve kihoai arura haha ve mai ore ukai ve epavape.

¹² Zacharias arero eavi ikihorahora lei oaoka eapapo leipe.

¹³ Aka aneru arero mari maeape, Zacharias, a oaoka kalailue: Aualari ave velavela oharo overa iapape. Ave uva Elizabeth ave akore la epakilai — a areve rare John itavakilai.

¹⁴ Ava ikiveveke eapapo lei Areve epaki hoa haela oaria kara ikiveveke leivahaeakilai.

¹⁵ Ehovea are Amua oropa va eapapo leikilai; Are wine i ma aheke ila hahaure leikilai: Areve epaki hoa Ove Veveke are i hareho aeakilai.

¹⁶ Are kai Israel ve akoremari oaria Aualari ve oki ve kari aukilai.

¹⁷ Are kai Elijah ve Ove i aheke ila Amua ve oropa ve aukilai, Oalou haela ereve akoremari ikihuru leikive kileavahaeakilai, Kai oharo iapavahaeaki aue haela mai ehohoe haela ve okiharo aukive kileakilai, Ehovea ma vilaipi hareho Amua ve okiharo ore leikive.

¹⁸ Zacharias aneru velavela leipe, Ara ma eharu learia lei ore leikilai ha? Ehovea ara haela eapapo, arave uva kara uamari eapapo.

¹⁹ Aneru arero kavale maeape, Ara vea Gabriel, Aualari ve oropa ve epavila aneru va: Are kai araro kiparaeape ehovea aro ma ikiveveke leiki eharu kileakive.

²⁰ Iapai — ave karave ipi haihaharoa o ari aue leikilai aiai ma eharu horeavaki hare, ehovea a arave oharo au iapakue; ma oharo aireaki iele horeavakilai.

²¹ Haela oaria Zacharias kari hairi hairi ikihorahora eapapo leivahaeape, ehovea are va hehe ita haiapo iele aeaveape.

²² Are kihoaupe la hoa are va erero oharo maeaeakive hovea ka; Ere ore leivahaeape are va hehe ita leia eharu lahua la eavape, Ehovea are kai ereve oropa ve mai hiki koelari muruha hiki aeape.

²³ Aireaki, areve hehe ita ve horova karia leipe la hoa are elare uvi aupe.

²⁴ Aireaki hare Elizabeth ero i lei papare five au hiki aeveape.

²⁵ Are mari ape, Amua araro ovohae eavi maria leipe ehovea arave haela ve oropa ve maeoka hareavakive.

Iesu ve aireaki epaki oharo

²⁶ Areve papare six hoa Aualari aneru Gabriel Galilee karikara rare Nazareth maea popou mari ve lei a paraeape.

²⁷ (La mari ve vila rare Joseph, David ve eravo haela.) La mari ve rare Mary.

²⁸ Aneru kai areve oropa iki mari maeape, Ava la, ava ikiveveke mari, Aualari a i hareho aeavila.

²⁹ Are la oharo iapai iki horahora lei elare iki ureve haropape, la oharo ve iele le.

³⁰ Aneru kai arero maeape, Mary, a oaoka kalailue — ehovea Aualari aro ikivere eapapo leive.

³¹ Iapa, A ero i eavi ari lei akore le epakilai. A areve rare Iesu itavaki.

³² Are eapapo lei haela arero Akea ve Aualari ve Akore rare arilai. Amua Aualari areve oa David ve terona arero avarakilai.

³³ Are Jacob ve eravo haela oaria ve Amua leikilai, aiai kari lei va ka. Areve basileia kara karia lei va ka.

³⁴ Mary aneru mari maeape, Ma maea learia leikilai, ehovea haela araro au koaraila?

³⁵ Aneru arero kavale maeape: Ove Veveke ave akea kihoaukilai, Kai Akea Iele Aualari ve aheke aro aerakilai: Laelave a va aireaki epaki la eharu hehe rare arilai, Aualari ve Akore.

³⁶ Iapa, ave lou hera, Elizabeth, are kara areve lauapau hoa akore apakilai; la uamari areve ero eaveape papare six ma.

³⁷ Ehovea Aualari ve oharo aheke hiki, mahuka lai va ka.

³⁸ Mary mari ape, Eava, Aualari ve horova mari ma: ave oharo laria leikilai, heroe. Aneru arero harepape.

Mary Elizabeth ve leia hoaupe. Morapaeaki hivi

³⁹ Mary elavelave urai kela ita Judah ve karikara aeva pekape.

⁴⁰ Are Zacharias ve uvi pekai Elizabeth oharo le maeape.

⁴¹ Elizabeth areve la oharo iapai areve eharau ureve la akore aura kelape: Ove Veveke Elizabeth ve iki ureve heloekoape.

⁴² Are ara hai maria itavape, A va uavila oaria oropa ve — ave eharau ve la eharu veveke iele.

⁴³ Maia ve learia? Arave Amua ve lou arave maia ve leikila iele.

⁴⁴ Arave avako ave la oharo iapai, arave eharau ve la akore ikiveveke lei aurakela le ara.

⁴⁵ Oharo iapai kekelape la uamari kara veveke iele, ehovea Amua arero maeape la eharu oaria iele leikilai.

⁴⁶ Mary kai maria maeape: Arave iki ureve Amua morapaevila:

⁴⁷ Arave ove kara ikiveveke leivila ehovea araro lei makuripe Aualari.

⁴⁸ Are areve ipi havahu horova mari haure au leila: Iapai, aireaki vilakao oaria arave rare morapaeakilai.

⁴⁹ Ehovea Akea Iele Aualari arave maea ve horova eapapo leipe: Areve rare hehe iele.

⁵⁰ Areve oharo iapailula vilakao oaria Are ikiheheroe leivahaevila.

⁵¹ Areve mai ve aheke are hihika amoeape: Ikipelaea haela oaria are le kopurapape.

⁵² Akea haela ereve terona ve are la haruapape, Kai ipi haela ereve ita le pekahavape.

⁵³ Eroa haeape haela are eapai veveke aiarape: Erohoho haela are mai ka haruapape.

⁵⁴ Are areve horova haela Israel koarape, Ehovea areve ikiheroe mai ikikekelakive.

⁵⁵ (Are elaviilave Aualau haela laria maeaeape, Abraham i meavohula oaria ila aiai karia lei va ka).

⁵⁶ Mary areve leia papare three aiai aireaki elare uvi aupe.

John Baptist epape hari. Ikiveveke Hivi

⁵⁷ Elizabeth ve akore epaki hoa kihorera are akore le epape.

⁵⁸ Areve karikara haela i apavara ila Aualari arero leipe la ikiheroe mai iapavahaeai are i hareho ikiveveke leivahaeape.

⁵⁹ Iapai, hare 8 kari leivahaeai ere akore hekai peritome mai leikive korukaiape. Ere ikivere arero rare Zacharias, oa ve rare, itavakive.

⁶⁰ Areve lou kavale maeaeape, Arekaea, arero John rare itavaki.

⁶¹ Ere arero maeape, Ave apavara oaria la rare au itavaila, ere kai oa mai koelaripe ehovea areve ikivere rare ore leikive.

⁶² Ere kai oa mai koelaripe ehovea areve ikivere rare ore leikive.

⁶³ Are hohoa harive kora hakaea velavela lei mari hape, Areve rare va John.

⁶⁴ Ere oaria ikihorahora leivahaeape. Areve ape la hoa hapai auri alalaka leipe. Are oharo ai Aualari ve rare morapaeape.

⁶⁵ Ereve apavara oaria oaoka eapapo leivahaeape. Ma oharo oaria Judea ve la kela ita oaria kopurapape.

⁶⁶ La oharo iapavahaeape haela oaria elare iki maria kelavape, Ma akore aireaki leari leikilai? Amua ve mai are i hareho aeaveape.

⁶⁷ Ove Veveke Zacharias ve iki ureve heloekoa are mari maeape:

⁶⁸ Amua Israel ve Aualari morapaeaki, Ehovea Are maia kihoaupe haela oaria lei makukurikive.

⁶⁹ Are David ve eravo haela oari a ovokake oaria aikiarape.

⁷⁰ Are overa peroveta haela ve ape lari ape, Meahaiapo avare koare hoa ikiki mahau.

⁷¹ Are elaro iri haela ve mai ve hareavape: Elaro aeha leivahaelula haela oaria ve kara.

⁷² Are elave Aualau haela ikiheheroe leivahaeai Areve okoare veveke iki kekelape.

⁷³ Are elave oa Abraham maeape la okoare, maria

⁷⁴ Iri haela ve mai ve Are elaro la hareavakilava, Ela areve horova leivahaeakilai, oaoka karia.

⁷⁵ Hehe mai ehoe ila mehaemehae leikive.

⁷⁶ Iele havahu, Akore e, A va Akea Iele Aualari ve peroveta haela rare itavakilai, Ehovea a Amua ve oropa ai areve okiharo karikikilai.

⁷⁷ Areve haela oaria a ovokake oharo kileavahaeakilai: Ereve mai hahaeae hapurukavakive oharo kara a kileavahaeakilai.

⁷⁸ Ehovea elave Aualari ve ikiheroe veveke iele, are v'ila akea ve ovava eapapo elaro aeravahaeakilai;

⁷⁹ Murumuru apearoape kai au apihaeroape ove ve akea avairoape la haela ovava aiarakilai. Elave loa kara havila okiharo, are kari aukilai.

⁸⁰ Akore ahai iki aheke eapapo leipe. Are huakara hiki aiai are va Israel ve oropa ve hihika horerape la hoa.