Jude 1 - Pupu Oharo Āre 1963 Genese 1970 Rute 1972

Ikiheroe oharo

¹ Ara, Jude, Iesu Keriso ve horova haela, James ve apoheari, Oa Aualari lei hehe leivahaeape la haela, Iesu Keriso lei makukuripe la haela, au itavavahaeape la haela ve hohoa me paraeaive.

² E va ikiheroe meru i havila i ikiheroe iele maeokoko aeaki.

Opore kilea haela i mai heaha ila kiva auhohi leivahaeaki

³ Apavara e, ara ero haela oaria ve ovokake leikive okiharo paraeakive kekelape, aka veveke, ara ero ma oharo kara paraeakive. Ara ero oharo aheke maria kirive — hehe haela ero kileavahaeape la ikikekela veveke e va kiva auhohi leivahaeaki.

⁴ Ehovea uku haela eve leia muruhari hovea pekahavape (ereve ma haeae v'ila overa hohoa haeape), ere va mai heaha haela, ere va elaviilave Aualari ve ikiheroe meru mai heaha hovea koelaripe. Ere va Amua Aualari haroapo iele ve Rare haeae leipe, elaviilave Amua Iesu Keriso kara.

⁵ Ara va ikivere ero auhohi kileavahaeakive, e va ma oharo ore overa leivahaeape: Amua oropa haela oaria Egypt ve leia ovokake lei kari kihoahukape, aka iki au kelavaila la haela are hai ka leivahaeape.

⁶ Aeka ma: oropa mai mekakure kiva au leivahaeaila kai elare ita veveke hakurepape la aneru, are va erero auri horou hahape aiai heheavaki hare eapapo.

⁷ Hoveahovea, Sodom i Gomorrah ila kai ereve maeamaea la karikara kara, laria; ere va mai heahaha oaria ikivere leivahaeape, aivau ve mai lahua lahua oaria kara; ere va ihova hovea leivahaeape, ehovea mea oaria havila la a erero kara haeavila.

⁸ Laria kara, ma ikikekela haeae haela aivau mai heaha leilula; ere akea ve Amua hahaure leilula; ere va aneru ve la mekakure ve heheo maeaelula.

⁹ O iele akea ve aneru Michael, are Moses ve maea v'ila Satan hahari ape la hoa, arero heheo oharo maeakive ikivere au leila aka are mariape, Amua aro erereakilai,

¹⁰ Aka ma haela ere haveva la eharu v'ila heheo arula, aka ere v'ore la eharu, ereve maea hovea, ere elare maea ve heaha leilula.

¹¹ Ikihuru hela — ere va Cain ve okiharo auvahaeape — ere va Balaam ve la haeae ikivere havahu leivahaeape, kai Korah ve la hahari hoveahovea avahaeape.

¹² Ma va eve ikiheroe hurae ve heaha leivahaeaki haela, ere va eve leia eapai herehere larive oaoka leivahaea va ka. Ere va ma karia meuru hovea, mea erero koalula meuru; ere va hae haroropape kora hovea, iele karia, hoa orahokaila apihaeape, elele ila hoa haroapo hareape.

¹³ Ere va ahea ma ve haha ehoaha hovea, ereve makiri ohare eapapo hovea hihika leilula, naoae naoae loalula kou hovea; ere va aireaki la muru hoa heaha ila apeakilai.

¹⁴ Enoch, Adam ve meamari, kara, ere v'ila peroveta oharo ape maria — Eavaila, Amua i areve hehe haela 10,000 ila ekekilai.

¹⁵ Ehovea haela oaria heheavakive: Are kai mai heaha haela oaria ereve horova heaha oaria v'ila hahakilai, kai mai heaha haela oaria areve rare v'ila maeaeape la o heaha oaria ve.

¹⁶ Ma va ikiheaha leilula haela: ereve hihiri oharo oaria ehovea meahaiapo ve heraho. Ere va elare oki heaha ikivere leilula: ereve oharo pelaea oaria: ere va haela ve maea kelavalula, ehovea ere v'ikivere elare maea veveke leikive.

¹⁷ Apavara e, overa hoa Amua Iesu Keriso ve aposetolo haela kileavahaeape la oharo veveke iki kelavaki:

¹⁸ Ere ero maria kileavahaeape, Aireaki hoa opore haela oaria urahukakilai — ere va mai haeae oaria ikivere leilula haela.

¹⁹ Ma va hiru lahua lahua leilula haela — ere va meahaiapo mai oaria ikivere leilula, ereve Ove iele karia.

²⁰ Apavara e, e va elare ikikekela aheke havahu leivahaeaki, hehe mai iele kiva leivahaeaki — Ove Veveke v'ila ivaiva leivahaeaki.

²¹ E va Aualari ve ikiheroe mai iele kiva leivahaeaki: e va elaviilave Amua Iesu Keriso ve ikihuru kelavaki, areve Ovokake Haiapo iele va la.

²² Uku haela ikihuru hela leivahaeaki, ere haeae leivahaeaki ave.

²³ Horahora haela lei ovokake leivahaeaki, erero huhuraki aue la a ureve hai ka leivahaeaki ave, ereve la heaha oaoka leivahaeaki, erero mai paeaki la hoa ereve la hirihiri avaki ave.

²⁴ Ma hoa elaviilave lei aheke leivahaeaki Amua ero terona mekakure oropa ve veveroro i ikiveveke ila lai pekahavaki.

²⁵ Elaviilave ikiore iele Aualari haroapo iele ve rare lei morapaeaki — areve haharika i aheke eapapo mekakure iele aiai karia lei va ka. Amene.