John 9 - Pupu Oharo Āre 1963 Genese 1970 Rute 1972

Ovohae kariri epape haela lei ovava leipe

¹ Are aupe la hoa are ovohae kariri lei epape haela ae eavape.

² Areve kilea haela arero velavela maria leipe, Mai haeae leita leipe ha — ma haela aka areve oa i lou ila, ehovea arero ovohae kariri la va epape?

³ Iesu kavale maeaeape, Ma haela, areve oa i lou ila kara, haeae au leila, aka ehovea Aualari ve horova are v'ila hihika leikilai.

⁴ Elaviila araro kiparaeape la haela ve horova hare hoa leivahaeaki heroe; aire hare, oroa hoa, haela horova e va ka.

⁵ Ara va meahaiapo aeavila hoa ara meahaiapo ovava leivila.

⁶ Are la oharo a, apea kekele ve koa koa pikuru le leipe — la haela ve ovohae pikuru haroroape.

⁷ Are maeape — Aula, Siloam ve la ma haru oropape ma huhelaki (La ma ve rare ve iele, Paraeape). Are ai leia oropape ma huhelai ovohae le eavape.

⁸ Are i hareho apearoape kai arero ore overa leivahaeape la haela, ehovea are va haela oaria ve meru velavela leivila haela, ere mari avahaeape, Maia meru velavela leivila haiavape la haela ka ha?

⁹ Haela uku mariape, Are la — uku mariape, Ka, aka areve maea hovea haela ma. Are maeaeape, La haela ara ma.

¹⁰ Laelave — ere maeaeape, Ave ovohae learia lei kolahehelaukaila?

¹¹ Are kavale maeaeape, Rare Iesu rare itavape la haela — are pikuru kariki arave ovohae haroroape. Are araro kai maeape, A v'ai Siloam oropape ma huhela. Laelave ara v'ai Siloam leia oropape ma huhelaila ovohae ovava le leipe.

¹² Ere arero velavela maria leipe, Are lahoa aeave ha? Are erero maeaeape, Ara ore va ka.

¹³ Overa ovohae kariri leipe la haela ere Pharisee haela ve leia lai aupe.

¹⁴ Iesu pikuru kariki areve ovohae ovava leipe la hare va sabati hare.

¹⁵ Laelave Pharisee haela arero aeka velavela leipe areve ovohae ovava veveke learia leipe. Are erero maeaeape, Are arave ovohae pikuru halaroroaila — ara oropape ma la huhelai ovohae veveke le eavi.

¹⁶ Laelave — Pharisee haela uku maeaeape, Ma haela Aualari ve au ekeila, ehovea are sabati hare kiva lei va ka. Aka uku mariape, Mai heaha haela maria horova learia leikilai ha — ere va iki lahua lahua le leivahaeape.

¹⁷ Ere va aeka ovohae kariri haela maeape, Ave ovohae ovava leipe la haela v'ila ave iki learia ha? Are mariape, Are peroveta haela.

¹⁸ Jew haela are v'ila au kekelaila are va oropa ovohae kariri kai ovava leipe — aiai ere ovohae veveke leipe la haela ve oa i lou ila itavi velavela mari leivahaeape:

¹⁹ Ma haela ealila ovohae kariri lei epape ha? Are ma hoa ovohae learia kai eavave ha?

²⁰ Oa i lou ila erero kavale maeaeape, Elalila ore ma va elalilave akore, ovohae kariri lei epape la akore.

²¹ Aka are ovohae learia lei eavave la, elalila va horahora leiro. Aeva areve ovohae ovava laleila la haela elalila arero ore va ka!

²² Areve oa i lou ila ma oharo maeaeape ehovea ere Jew haela oaoka leivahaeape — ehovea Jew haela ma pupu overa huape, Arero Keriso vavavaki la haela ere synagogue mahokaea ve huikapai paraeakilai.

²³ Laelave areve oa i lou ila erero maeaeape, Are ka haela iele. Arero mae iapaila.

²⁴ Laelave ere la ovohae kariri haela aeka itavi mari maeape, Aualari morapaeaki — ela va ore ma haela mai heaha haela.

²⁵ Are kavale maeape, Are mai heaha haela la, ara va haveva. Ara va eharu haroapo ore — ara va overa ovohae kariri leipe — ma hoa arave ovohae ovava laleila.

²⁶ Ere arero maeape, Are aro learia laleila ha? Are ave ovohae learia lei veveke laleila ha?

²⁷ Are kavale maeaeape, Ara va ero overa lamaeaeaila — e va iapa va ka ha? Ehovealeve aeka iapakive ha? E va ikivere e kara areve kilea haela leivahaeakive ha?

²⁸ Ere arero o heaha maria maeape, A va areve kilea haela — ela va Moses ve kilea haela.

²⁹ Ela v'ore Aualari Moses kileape — aka ma haela ela v'ore ka, are lahoa ve ekepe.

³⁰ La haela erero kavale maeaeape, Maia learia mai ha? E haveva leilulava are lahoa ve ekepe, aka are arave ovohae kolahehelaukaila.

³¹ Ela v'ore Aualari mai heahaha haela ve oharo iapa va ka, aka haela Aualari la morapae areve horova la leikilava, are areve oharo iapakilai.

³² Meahaiapo avare koare karikipe hoa ikiki mahau ovohae kariri epape haela ve ovohae kohehelaukape la hari haela au iapaila.

³³ Ma haela Aualari ve ekeki aue va laila, are horova oaria hovea lei va ka.

³⁴ Ere arero kavale maeape, A va mai heaha v'ila epape haela. A va elaro kirive ehovealeve ha? Ere arero huikapai avakape.

³⁵ Iesu ere arero avakape la oharo iapai arero ovohae eavi mari maeape, A va Aualari ve Akore kekelave ha?

³⁶ Are arero kavale maeape, Amua, are va leita ha, ehovea ara arero ikikekelakilai.

³⁷ Iesu arero maeape, A va arero laeavila, are kara a i hareho oharo mave hukavave.

³⁸ Are maeape, Amua — ara iki le kekelave. Are areve oropa ve ekaopape.

³⁹ Iesu maeape, Ara meahaiapo kihoaupe ehovea heheavaki horova ve, ehovea ovohae kariri haela ovohae eavakilai, kai ovohae veveke haela ovohae kariri leikilai.

⁴⁰ Are i hareho loaroape Pharisee haela ma oharo iapai arero velavela maria leipe, Ela kara ovohae kariri haela ha?

⁴¹ Iesu erero maeaeape, E ovohae kariri araikilava, eve haeae karia. Aka e maria arula, Ela ovohae eavalula, eve haeae le apearo.