John 7 - Pupu Oharo Āre 1963 Genese 1970 Rute 1972

Iesu i apoheari ila

¹ Ma oharo karia lei Iesu Galilee hiki veape — Are va Jew haela ve la ita au veaila, ehovea Judea haela arero harive oki haropape.

² Jew haela ve hurai hare horerape — Kovo Uvi kukueavape la hurai;

³ Areve apavara arero maeape, A v'ai Judea leia, ave leia apealula kilea haela ere a leivahaevila la horova oaria eavakilai.

⁴ Ehovea hihika leikive ikivere la haela are va horova kara muruhari lei va ka. A ma horova iele la leikilava, a havahu meahaiapo oropa ve hihika leikive.

⁵ Ehovea areve lalava haela kara arero iki au kekelaila

⁶ Iesu arero maeaeape, Arave hoa āre — aka eve hoa mea oaria veveke hiki.

⁷ Meahaiapo ero ikiheaha lei va ka, aka are araro ikiheaha leivila, ehovea ara areve horova heahaha hihika aioiaevila.

⁸ Kahara, e va ma hurai pekahavaila. Ara ma hurai peka va ka, ehovea arave hoa perehekai are.

⁹ Are erero lari avi Galilee hiki aeape.

¹⁰ Aka areve apavara oropa pekahavi are kai ereve aire pekape, hihika va ka — muruhari hiki.

¹¹ Jew haela arero hurai ita haropi mari avahaeape, Are lahoa aeave?

¹² Haela oaria are v'ila oharo oaria hukavape — Uku haela maeape, Are haela veveke, uku mariape, Are haela oaria amuraeahaevila.

¹³ Lae vi va haela oaria oharo hihika au maeaila, ehovea ere Jew haela oaoka leivahaeape.

Iesu — Aualari ve kihoaupe oharo kileape

¹⁴ Hurai hare uku karia lei Iesu Hehi Uvi pekai kileape.

¹⁵ Jew haela ikihorahora eapapo leivahaeai mari maeaeape, Ma haela hohoa ore lahoa leipe, ehovea haela arero au kileaila.

¹⁶ Iesu erero kavale maeaeape, Ma kilea oharo arave hiki ka, araro kiparaeape la haela ve.

¹⁷ Haela areve ikivere horova la leikilava are kilea oharo kara ore leikilai, Aualari ve aka ara havahu ve.

¹⁸ Elare oharo la hukavavila la haela elare hiki morapaeavila. Arero kiparaeape haela ve rare morapaeavila la haela, are va iele, areve mai heaha kara karia.

¹⁹ Moses ero pupu aiarape ha? Aka e va la pupu kiva leivahaea va ka. E va araro harive haropalula ehovealeve?

²⁰ Haela arero kavale maeape, A va ovehahu ila — aro harive leita la haropalula ha?

²¹ Iesu kavale maeaeape, Ara va horova haroapo leipe — e va iki horahora leivahaeape.

²² Moses ero peritome pupu avarape. (Moses ve pupu havahu ka, aka Aualau haela ve la) laelave e va sabati hare haela peritome mai leivahaelula.

²³ Haela sabati hare peritome mai la avakilava, Moses ve pupu haerapaki ave — e va araro hihiri ha, ehovea ara sabati hare haela la makuripe.

²⁴ Hihika leipe la eharu hiki ka heheavalue. Iki ehoe havahu heheavakive heroe.

²⁵ Jerusalem haela uku maeape, Ma va ere harive haropape haela ha, a ka ha?

²⁶ Eavaila are oaoka lei va ka, oharo hihika la kirive — ere arero oharo maea va ka. Amua haela ore ha, ma haela va Keriso iele ha?

²⁷ Ela ma haela ve ekepe hoa ore, aka Keriso lahoa ve ekekilai, haela oaria haveva.

²⁸ Iesu Hehe Uvi ureve āra hai maria itavape. Eva araro ore, aeva ara ekepe la ita kara e v'ore. Ara va arave aheke v'ila au ekeila. Araro kiparaeape la haela are va iele, e va arero haveva.

²⁹ Ara arero ore — ehovea ara areve leia ve ekepe. Are kara araro kiparaeape.

³⁰ Ere v'ikivere arero paeakive, aka haela arero mai au paeaila, ehovea areve hoa va are.

³¹ Haela perehekai oaria arev'ila iki kelavi mari avahaeape, Keriso la ekekilava, are ai ma haela leivahaeape horova oaria i kepea ila leivahaeakilai ha?

³² Pharisee haela are v'ila hukavape la oharo oaria iapavahaeape. Pharisee haela i oharo haela ila kapena haela uku arero mai paeakive paparaehape.

³³ Iesu erero maeaeape, Ara e i hareho mea haiapo aea va ka — aireaki ara araro kiparaeape la haela ve leia kai aukilai.

³⁴ E va araro haropi koara va ka. Ara va auki la ita e kai auvahaea va ka.

³⁵ Jew haela elarelare oharo maria hukavape, Are lahoa aukilai — ela kai arero eava va ka — are va ita lahua haela leia apealula la Jew haela ve ita ai ita lahua haela kileavahaeakilai ha?

³⁶ Ma are lamaeaila la oharo iele le ha, Eva araro haropi koara va ka ha, ae va, Ara auki la ita e auvahaia va ka ha.

Ovokake ma

³⁷ Hurai hita hare, horova eapapo hare la, Iesu epavi āra maria hape, Haela ae ma karave koa la leikilava, arave maia iki ma larive.

³⁸ Buka hape hohoa hovea — araro ikikekelaki la haela ovokake ma, mai ma hovea, areve eharau ve horerakilai.

³⁹ (Ma oharo are ove v'ila maeape — arero ikikekelaki la haela avakilai. Ehovea Ove Veveke ve la meru hoa are, ehovea Iesu ve morapaeaki hoa kara au horeraila.)

⁴⁰ Haela perehekai oaria ma oharo iapai avahaeape, Iele havahu, ma va la peroveta haela.

⁴¹ Haela ae va maeape, Ma va Keriso iele, aka haela uku maeape, Keriso Galilee ve kihorerakilai ha?

⁴² Buka maria au maeaila ha? Keriso, David ve meavore, Bethlehem karikara ve kihorerakilai — David aeaveape karikara la.

⁴³ Laelave haela oaria arev'ila ikihorahora leivahaeape.

⁴⁴ Uku haela arero kaivakive ikivere leivahaeape, aka haela arero mai au paeaila.

⁴⁵ Hevehe kapena haela Pharisee haela i oharo haela ve leia auvahaeape. Ere arero maeape, Ehovealeve e arero lai ekeva ka ha?

⁴⁶ La kapena maeape. Haela oaria ma haela ve oharo hovea au hukavaila.

⁴⁷ Pharisee haela kavale maeaeape, Are ero kara lamu?-?rae aila ha?

⁴⁸ Akea haela i Pharisee haela ila arero ikikelavape ha?

⁴⁹ Aka ma pupu haveva haela oaria heaha koarakilai.

⁵⁰ Nicodemus erero maeaeape (Iesu ve leia oroa hoa aupe la haela), ehovea are va Pharisee haela.

⁵¹ Areve horova au eavaila la haela elaviila ve pupu elavelave heheavi hahakilai ha?

⁵² Ere arero kavale maeape, A kara Galilee haela ha? Auhohi haropi — peroveta haela Galilee ve kihorera va ka.

⁵³ Ere elarelare ita ve auvahaeape.