John 6 - Pupu Oharo Āre 1963 Genese 1970 Rute 1972

5,000 haela eapai lalavahaeape

¹ Ma eharu karia lei Iesu Galilee ma haru ukai ve elaupe, la ma ve rare Tiberius.

² Haela oaria areve aire auvahaeape ehovea ere are maea heahaha haela v'ila leivahaeape la horova veveke oaria eavavahaeape.

³ Iesu kela akea pekape, are i kilea haela ila hareho le avape.

⁴ Passover hurai, Jew haela ve hurai eapapo la, kihorera va maea iele.

⁵ Iesu ovohae iupei haela oaria areve leia ekevahaelula ovohae eavape: Are Philip maeape, Ela ma haela hovea leiki eapai ilaea lahoa arilai ha?

⁶ Are arero ma oharo v'ila au amuraeape — ehovea are va ore overa leipe are learia leikilai.

⁷ Philip kavale maeape, 200 denarius ve pai kara hovea ka ma haela oaria eapai perepere hiki larilai.

⁸ Areve kilea haela ae Andrew, Simon Peter ve akoreheari mari maeape,

⁹ Akore hekai me aeave — areve barley pai 5 i ekaka 2 ila me apearo; aka ere va haela oaria hovea hovea lei va ka.

¹⁰ Iesu mariape, Haela oaria au avakive maeaeaila. La ita ve hohe oaria, laelave haela oaria avape, ereve numera va 5,000 hovea.

¹¹ Iesu pai kaili ivaiva oharo ai kilea haela v'ila hamureape; kilea haela au avape, haela oaria aiarape; ekaka kara are laria hamureape, erero hovea hovea aiarape.

¹² Ere eharau huharaila. Are kilea haela maeaeape, Eapai eroe oaria korukaiavahaeaki, eharu ae va havoavaki ave.

¹³ Laelave ere erero korukaiavahaeai — hara 12 la barley pai ve hakakaea ve heheloekoavape, la va eapai lalavahaeape haela ve kepea.

¹⁴ Iesu leipe la horova eavape haela oaria maria maeaeape, O iele, ma va meahaiapo kihoreraki la peroveta haela iele.

Iesu lahua ivaiva leipe: Are ma ve loa veavelaripe

¹⁵ Iesu eavape ere va arero eakea ila hakeavi arero amua leivahaeape, laelave are lahua ai muruhari kela pekape.

¹⁶ Mea aeaki maeamaea areve kilea haela ma poe ve hoahukape.

¹⁷ Ere vevaea horeavi Capernaum ve ukaki elahukape. Iesu aiai mea muru hoa ereve leia au horeraila.

¹⁸ Mea eapapo hareavi, la ma aroaro le leipe.

¹⁹ Ere ka 3 aka 4 mile hovea para koa koa ere va Iesu ma akea ve ekevila eavape; vevaea maeamaea vea; ere oaoka eapapo leivahaeape.

²⁰ Aka are erero maeaeape, “E oaoka kalaivahailue — Ara hiki ma.”

²¹ Ere va ikiveveke ila arero hareavi vevaea ureve la aepape. Ere laria lei hoa haroapo ere va aupe la ita vevaea miri le pekape.

Haela ihova ve apevelavela leipe

²² La opoa hare ma ukai apeape la haela eavape — vevaea aea karia — Iesu ve kilea haela elahukape la vevaea hiki: Iesu kara ere i hareho vevaea ve au horeavaila — aka areve kilea haela lahua elahukape.

²³ Lae vi va Iesu erero eapai hamuri aiarape. Tiberius maeamaea ve, la ita ve vevaea uku elahukape.

²⁴ Haela ovohae eavape Iesu i areve kilea haela ila leia karia — ere kara vevaea horeavi Capernaum leia pekai arero haropape.

²⁵ Ere arero ma ukai ve koarape la hoa ere arero mari maeape, Rabbi, a maia leahau leikila?

Ovokake ve Pai

²⁶ Iesu erero kavale maeaeape, O iele, o iele ara ero maeaeaive — eva araro la haropila iele ehovea horova veveke ikivere va ka, aka, ehovea e pai lalavahaeai eharau huharavahaeape.

²⁷ Poae leivila la eapai v'ila horova lei va arekaea — aka ovokake haiapo aeavila la eapai v'ila. Haela ve Akore la eapai ero aiarakilai, ehovea Oa Aualari are v'ila ihova leipe.

²⁸ Ere arero velavela leipe, Aualari ve horova hovea leikive va, ela learia leikilai ha?

²⁹ Iesu erero kavale maeaeape, Aualari ve horova iele ma — e va are paraeape la haela ikikekelakive.

³⁰ Laelave ere arero maeape, A va le ihova avivoila — ela ovohae eavi aro ikikekelakilai? A va le horova leikilai ha?

³¹ Elave Aualau haela huakara ita manna lalavahaeape. Hohoa buka ve maria hape, Are erero kaia ve eapai larive avarape.

³² Iesu erero maeaeape, Iele havahu ara ero maeaeaive — Moses ero la eapai kaia ve au avaraila. Arave Oa kaia ve la pai iele avarakilai.

³³ Ehovea Aualari ve pai iele — kaia ve kihoaupe ovokake avarakive la haela.

³⁴ Ere arero maeape, Amua, mea oaria hela elaro ma pai aikiaraki.

³⁵ Iesu erero maeaeape, Ara va ovokake ve pai iele — Arave maia ekeki la haela eroa he va ka — ae va arave rare kekelaki la haela are ma karave koa va ka.

³⁶ Aka ara ero lamaeaila — e araro ovohae eavi iki au kelavaila.

³⁷ Oa araro aikiarape la haela oaria ere va arave maia ekevahaeakilai. Arave maia ekeki la haela ara avaka va ka.

³⁸ Ara va kaia ve au kihoaila ara havahu ve ikivere horova leikive;

³⁹ Araro kiparaeape Oa ve ikivere maria — Are araro aikiarape la haela oaria, aire basileia hihi leiki la hoa, haroapo havoava va ka, are erero lei uralapakilai.

⁴⁰ Araro kiparaeape haela ve ikivere maria — Akore ovohae eavi ikikelavalula haela oaria ovokake haiapo apeakilai. Ara va aireaki la hare erero lei uralapakilai.

⁴¹ Judea haela arero o vere maeape ehovea are meaeape, Kaia ve kihoaupe la pai va ara ma.

⁴² Ere kai mari avahaeape, Ma va Iesu Joseph ve Akore ka ha? Ela va areve oa i lou ila ore. Are learia kimaeaive, Ara kaia ve kihoaupe.

⁴³ Iesu erero kavale maeaeape, Eva elarelare hihiri oharo kahukavalue.

⁴⁴ Haela ae arave maia ekeva ka: araro kiparaeape la Oa hiki araro hakeavakilai. Ara arero aireaki la hare lai urapakilai.

⁴⁵ Peroveta buka oharo mari hape, Ere oaria Aualari v'ila ore leikilai. Laelave overa iapai ore leivahaeape la haela arave ma oki ekekilai.

⁴⁶ Haela oaria Oa au cavaila: Aualari ve ekepe la haela hiki Oa eavape.

⁴⁷ Iele havahu, ara ero maeaeaive — araro ikikelavaki la haela ovokake haiapo apeakilai.

⁴⁸ Ara va ovokake pai havahu.

⁴⁹ Eve papa haela huakara manna lalavahaeape. Kahara ere va karia le leivahaeape.

⁵⁰ Ma va kaia ve kihoaupe pai — haela ae la larikilava, are apa va ka.

⁵¹ Kaia ve kihoaupe la pai ovokake, ara ma. Haela ae ma pai la larikilava are ovokake haiapo le aeakilai. Ara avaraki pai va iele — arave aivau: Ara arero avarakilai meahaiapo haela oaria ovokake leivahaeakive.

⁵² Jew haela elarelare oharo hahari mari avahaeape, Ma haela elare aivau larive learia avikiarakilai?

⁵³ Iesu erero maeaeape, Eva haela ve Akore ve aivau i apu ila le aue la leikilava, e va ovokake leivahaea va ka.

⁵⁴ Arave aivau i apu ila larikilai la haela ovokake haiapo aeakilai — ara arero aireaki la hare urapakilai.

⁵⁵ Ehovea arave aivau va eapai iele, arave apu kara ma iele.

⁵⁶ Arave apu i aivau ila larilai la haela are arave ureve aeavila, ara ka areve ureve aeavila.

⁵⁷ Ovokake Oa araro kiparaeape — laelave ara Oa v'ila ovokake leivila, araro larilai la haela — are kara ara v'ila ovokake leikilai.

⁵⁸ Ma va kaia ve kihoaupe pai. Eve papa haela manna lalavahaeai le apihaea ka leivahaeape, laria mai ka. Ma pai lariki la haela laria apihaea va ka, ovokake haiapo le apeakilai.

Ikihorahora kilea haela

⁵⁹ Are Capernaum kileape la hoa are ma oharo synogogue ureve maeape.

⁶⁰ Areve kilea haela uku ma oharo iapai mari avahaeape, Ma oharo mehau iele, arero hovea leita leikilai?

⁶¹ Iesu areve kilea haela ve ma oharo iki ure ore lei mari maeaeape, Eva ma oharo ikihairihairi ha?

⁶² Eva haela ve Akore overa aeaveape la ita ma pekaila la eavakilava, e lehae ha?

⁶³ Ove Veveke haela, ovokake leivila — aivau ve iele karia; ara ero maeaelula la oharo ove oharo, ovokake iele ila.

⁶⁴ Aka e v'ila uku haela kelava va ka. Ehovea Iesu avare koare ore leipe — uku haela arero iki aireaki kelava va ka, arero hihila epaki la haela.

⁶⁵ Are mariape, Laelave ara ero maeaeape haela va Oa arero avaraki la oki hiki arave maia ekekilai.

⁶⁶ La hoa areve kilea haela uku arero hakorepape, kai are i hareho au auvahaeaila.

Peter Iesu va Keriso hihika maeape

⁶⁷ Iesu kilea haela maeaeape, E kara araro hakorepakilai ha?

⁶⁸ Simon Peter arero maeape, Amua ela va leita la kai loakilai ha? A hiki ovokake haiapo ve oharo kileahaevila.

⁶⁹ Ela iki le kelavaro, ela va ore. A va Keriso, ovokake Aualari ve Akore la.

⁷⁰ Iesu erero kavale maeaeape, Ara ero 12 haela ikivere leivahaeape, aka eve haela haroapo haelaharihu hovea leivila.

⁷¹ Are Judas Iscariot Simon ve akore v'ila maeape. Ehovea are 12 haela ve haela ae va la Iesu la hihila aire epakilai.