John 5 - Pupu Oharo Āre 1963 Genese 1970 Rute 1972

Bethsaida ma haru ve loa heaha haela

¹ Ma eharu karia laila Jew haela ve hurai hoa horerape — Iesu kara Jerusalem pekape.

² Jerusalem ureve, mamoe ve okiape maeamaea vea ma haru aeave. La ma haru Hebrew uri Bethesda rare arula, areve poe ve kavu hue ila apearoape.

³ Ma kavu ureve maea heahaha i ovohae kariri haela i horo hareavape haela oaria apearoape. Ere ma ve pupuari pupuari arivila hoa la kariveape.

⁴ Ehovea mea aea aneru haroapo hoai ma haru ve la ma lei lauke lauke leipe. Laelave la horova leipe hoa, ma oropa hoaupe la haela areve maea heaha veveke le leipe.

⁵ Haela ae va aeaveape — areve maea leipe hoa hitolo 38.

⁶ Iesu arero aeavila eavi, areva haiapo iele laria hiki aeavila ore leipe la hoa are arero maeape,

⁷ A va ikivere ave maea veveke leikive ha? Maea heaha haela kavale maeape, Haelapo, ma pupuari pupuari avila la hoa ara va araro hareavi ma ve paraeaki haela karia. Aka ara mea oaria aire hoauvila, haela ae va arave oropa ve hoauvila.

⁸ Iesu arero maeape, Urou, kile kaivi loa veavelari.

⁹ La haela hoa haroapo maea veveke lei urai loa veavelaripe. La va sabati hare.

¹⁰ Laelave Jew haela lei makuripe la haela maeape, Mahau sabati hare — A va avuku kile oraiavi aukive pupu ila.

¹¹ Are erero kavale maeaeape, Araro lei makuripe la haela are araro maria maeape, Ave kile kaivi aula.

¹² Ere arero velavela leipe, Aro kile oraiavi aukive maeape haela leita ha?

¹³ Maea veveke leipe la haela arero la horova leipe haela haveva, ehovea Iesu muruhari aupe — ehovea la ita haela oaria korukaiavahaeape.

¹⁴ Aireaki Iesu arero Hehe Uvi ureve eavi mari maeape, A iapai, ave maea veveke laleila — aireaki mai heaha kalailue, a va aireaki heaha eapapo koaraki ave.

¹⁵ La haela ai Jew haela maeaeape, arero lei veveke leipe la haela va Iesu la.

¹⁶ Laelave Jew haela Iesu kai hararuape ehovea are ma horova sabati hare leipe.

¹⁷ Aka, Iesu erero kavale maeaeape, Arave Oa horova leivila ikiki mahau — ara kara horova leivila.

¹⁸ Laelave Jew haela ikivere eapapo Iesu harive, ehovea are sabati hare haure leipe, kai Aualari areve Oa rare avila la itavi — are havahu Aualari hovea hovea leipe.

Iesu Oa i hareho aeavila oharo hukavape

¹⁹ Iesu erero kavale maeaeape, Akore lahua horova lei va ka, aka are Oa leivila eavape horova la leikilai, ehovea are leivila la eharu, Akore kara laria leivila.

²⁰ Ehovea Oa areve Akore ikivere eapapo kai are leivahaevila la eharu oaria are arero amoeavila. E va aeka horahora eapapo leivahaeakilai, ehovea are arero aeka horova ehoaha uku kileakilai.

²¹ Hoveahovea Oa apihaealula haela lei urarapai lei ovokake leivahaevila, akore kara areve ikivere haela lei makukurikilai.

²² Oa kara haela oaria heheava va ka — aka heheavaki horova are akore la avarape.

²³ Ehovea haela oaria Akore Oa hoveahovea morapaeakilai. Akore morapaiaki aue la haela ae Oa kara morapaea va ka.

²⁴ O iele, o iele, ara ero maeaeaive, haela arave oharo iapai araro kiparaeape haela la kekelakilava, are va ovokake haiapo avakilai, kai heheavaki hoa heaha lei va ka; are va apaki hoa aiai ovokake hoa pekakilai.

²⁵ O iele, o iele, ara ero maeaeaive — hoa maia iele mave kihorerave, la hoa apihaeape haela Aualari ve ara iapakilai; iapaki la haela ovokake le leikilai.

²⁶ Hoveahovea Oa elare ovokake ila aeavila, are akore elare ovokake ila aeakive avarape.

²⁷ Are kara arero heheavakive aheke la avarape, ehovea are haela ve Akore.

²⁸ Maria v'ila horahora kalaivahaealue. Aireaki hare kapu ita apealula la haela oaria areve āra iapai kihoreavakilai.

²⁹ Horova ehohoe leivahaeape la haela apihaeai urahukakive kavale avakilai. Horova heahaha leivahaeape la haela apihaeai heaha ve kavale la avakilai.

Iesu v'ila vavavaki oharo

³⁰ Ara lahua horova lei va ka — Ara iapai hovea ara le heheavakilai — arave heheavaki mai ehoe, ehovea ara elare ikivere haropa va ka, araro kiparaeape la haela ve ikivere hiki.

³¹ Ara ara havahu v'ila la vavavakilava, arave oharo ehoe ka.

³² Haela ae ara v'ila vavavakilai: Ara va ore are ara v'ila vavavaki la oharo iele havahu.

³³ E va oharo John ve leia paraeape: Are oharo iele la vavavape.

³⁴ Aka ara v'ila vavavaki la oharo haela ve oharo ka — lae vi va, ara ma oharo maeaivila ehovea e ovokake leivahaeakilai.

³⁵ Are va ovava veveke heauapavila, lamepa veveke havahu; eva areve ovava eavi ikiveveke perehekai leivahaeape.

³⁶ Ara v'ila vavavaki oharo akea ve, John ve la oharo ipi ve, ehovea Oa araro avikiarape la horova oaria, ara leivahaevila la horova, ere ara v'ila vavavahaelula, ehovea Oa araro kiparaeape.

³⁷ Aeka araro kiparaeape la Oa are ara v'ila vavavape. Eva areve ara va au iapaila, areve maea kara au eavaila.

³⁸ Areve oharo kara eve iki ureve aea va ka, ehovea are paraeape haela e iki au kelavaila.

³⁹ Eva buka ureve hohoa haropalula, ehovea eve ikikekela e ovokake haiapo leia ve avakilai. Aka ere ara v'ila vavavahaelula.

⁴⁰ E kara araro kai ekeva ka, ehovea ovokake avakive.

⁴¹ Haela kara araro morapaea va ka.

⁴² Aka ara v'ero ore — Aualari ve ikiheroe eve ureve aea va ka.

⁴³ Ara Oa ve rare v'ila ekepe, aka e va araro auhohi lei va ka. Haela ae elare rare v'ila la ekekilava, e va arero auhohi lei leikilai.

⁴⁴ E va elarelare momorapulula oharo ikivere, laelave e va iki learia kelavakilai, Aualari ve kihoreaki la haharika e haropa va ka.

⁴⁵ Maria ka kelavarue ara e v'ila Oa ve oropa ve hahaki oharo maeaeakilai: Eve hahaki haela le aeave — Kaire, e havahu ikivere leivahaeape la haela. Moses havahu.

⁴⁶ E va Moses ikikekela va laila, e va araro kara iki kekelakilai, ehovea are ara v'ila hohoa hape.

⁴⁷ Aka are hape hohoa e va iki kelavaki aue la leikilava, e va arave oharo learia kelavakilai.