John 4 - Pupu Oharo Āre 1963 Genese 1970 Rute 1972

Iesu i Samaria uamari ila

¹ Amua ore lei Pharisee haela iapape Iesu haela oaria kileavahaeai bapatiso leivahaeape, John va oaria ka.

² (Aka Iesu havahu bapatiso horova au leila, areve kilea haela hiki leivahaeape.)

³ Are Judea harepai Galilee aupe.

⁴ Areve aupe okiharo Samaria ve.

⁵ Are Samaria karikara ae va ekepe, rare Sychar, Jacob areve akore Joseph avarape la kekele maea maea ve — Jacob ve ma koru leia vea.

⁶ Iesu hahi heaikiapo ve maea kakare lei ma karu poe ve haiavape — la hare hare hihi hovea.

⁷ Samaria uamari ekepe ehovea ma hivakive. Iesu arero maeape, Araro hela ma perehekai avikiara, ara larive.

⁸ Ehovea areve kilea haela karikara eapai ilaea leikive loape.

⁹ Samaria uamari arero maeape, Ehovealeve a va Jew haela araro ma v'ila velavela leive, ara va Samaria uamari. (Ehovea Jew haela i Samaria haela ila hareho apavara hovea leivahaea va ka.)

¹⁰ Iesu arero kavale maeape, A va Aualari ve meru iele, aeva aro lari ma ve velavela laleila la haela ore va leila, a va arero havahu velavela leikilai — are kara aro ovokake ma le avarakilai.

¹¹ Uamari arero maeape, Haelapo, ave ma hivaki eharu karia, ma va karu iele.

¹² Elave vilali papa Jacob ma ma karu elaro avikiarape, are i akoremari i boromakau oaria ila hareho ma ma lalaroape: A va la haela ve akea ve ha?

¹³ Iesu arero maeape, Ma ma lari haela oaria aeka ma karave koa leivahaeakilai.

¹⁴ Aka ara avaraki la ma, haela larikilava are ma karave koa lei va ka. Ara arero avaraki la ma areve ureve ma hoho alalaka hovea leikilai, ovokake haiapo avaraki ma va la.

¹⁵ La uamari arero maeape, Haelapo, la ma araro avikiara, aireaki ara ma karave koa lei va ka, aeka, ara ma oki haiapo ma hivakive heraho lei va ka.

¹⁶ Iesu arero maeape, Ai ave vila la maeai ekela.

¹⁷ Uamari kavale maeape, Ara vila karia. Iesu kai arero maeape. Ave oharo iele la, ave vila karia.

¹⁸ Ehovea a va vilaita 5 ila. A i hareho aeavila la haela kara, are ave vila havahu ka. Ma oharo a va iele laila.

¹⁹ Uamari arero maeape, Haelapo, ara eavi, a va peroveta haela.

²⁰ Elave aualau haela ma kela ve Aualari morapaeape — E kara maria maeaelula morapaeaki ivaiva ita iele va Jerusalem la.

²¹ Iesu arero maeape, Uamari e, arave oharo iapa — hare ae — e va ma kela i Jerusalem ila Oa morapai ivaiva lei va ka.

²² E va momorapulula la eharu e haveva. Ela va ore leipe eharu momorapulula, ehovea ovokake Jew haela v'ila kihorerape.

²³ Aka hoa maia iele, mave kihorerave, momorapulula haela iele ove i iele ila Aualari la momorapukilai, ehovea Oa va laria haela arero morapaeakive haropovahaevila.

²⁴ Aualari va Ove: arero momorapulula haela arero ove i iele ila momorapukive heroe.

²⁵ Uamari arero maeape, Ara va ore Messiah ekekilai (rare itavape rare va Keriso) Are elave maia kihoreraki la hoa are eharu oaria ela v'ila hihika kileavahaeakilai.

²⁶ Iesu arero maeape, Aro oharo la maeavila — ara va area.

²⁷ La hoa areve kilea haela ekevahaeape. Ere va horahora leivahaeape ehovea are uamari i oharo hukavape: aka hae laae va au maeaila, A va le la haropave, aka are i oharo hukavavila ehovealeve?

²⁸ Laelave uamari hahu hakorepai karikara hoai haela maeaeape,

²⁹ Ekeila, haela ae ovohae eavakive; are ara leivahaeape horova oaria araro hihika lakimaeaila. Ma va Keriso iele ha?

³⁰ Ere karikara mahokaea ve hoakukai areve leia auvahaeape.

³¹ Ere lari laila areve kilea haela arero maeape, Rabbi — eapai larive?

³² Aka are erero maeaeape, Arave larive eapai me aeave, e va haveva.

³³ Kilea haela elarelare kelavi mari avahaeape, Haela ae areve eapai overa avileikila ha?

³⁴ Iesu erero maeaeape, Arave eapai iele ma — araro kiparaeape la haela ve ikivere mai leikive, kai areve horova hovea hovea leikive.

³⁵ E mari arula la, Papare 4 aiai wheat hae hovare le leikilai, Iapai, ara ero maeaeaive, Ovohae iupei, oru ovohae eavaila, ere va houhuka iele, hae hovare kara maea iele.

³⁶ Hae hovare hoa haerapaki haela kavale avi ovokake haiapo ve hae veveke korukaiaki kavale le avakilai. Laelave puravai velariki haela i hae haerapaki haela ila hareho ikiveveke leivahaeakilai.

³⁷ Ma oharo iele havahu, Hae puravai — velariki haela ka lahua, hae haerapaki haela kara lahua.

³⁸ Ara ero paparaehape e horova au leila la eharu ve iele haerapakive. Haela ae oropa horova leipe — e va areve horova ve kavale veveke le avi.

³⁹ La karikara ve Samaria haela uku areve rare kekelape ehovea la uamari ve oharo, ehovea are mariape ‘Ara overa leivahaeape la eharu oaria are araro hihika kimaeape.’

⁴⁰ Laelave Samaria haela iki areve leia arero apevelavela leipe — are ereve ita perehekai aeakive. Are leia hare orahokaila aeape.

⁴¹ Aeva haela oaria kara areve rare kelavape.

⁴² Ere la uamari maeape “Ela iki — kelavalula iele ehovea a v'ila la oharo ka, aka ehovea ela areve oharo iapai ore leipe are va meahaiapo ve lei makukuriki haela.”

Iesu Cana Amua haela ve akore lei makuripe

⁴³ Hare orakokaila kari lei are leia harepai Galilee aupe.

⁴⁴ Ehovea Iesu havahu mari vavavape, Peroveta haela elare ita haela morapaea va ka.

⁴⁵ Laelave are ai Galilee leia Galilee haela arero auhohi leipe — ehovea are Jerusalem hurai hoa leipe la horova ere overa eavape — ehovea ere kara hurai ve auvahaeape.

⁴⁶ Are kai Cana Galilee karikara le ekepe — Are overa ma wine hovea koelaripe la ita. Leia amua haela ae ve akore Capernaum maea kakare eapapo koaraila aeaveape.

⁴⁷ Are iapape Iesu Judea harepai Galilee la ekepe — are areve leia hoai velavela leipe — areve akore lei veveke leikive ekekive, ehovea are apaki va maia iele.

⁴⁸ Iesu arero maeape, Eva ihova i horahora leiki horova eavaki aue la leikilava e iki kelava va ka.

⁴⁹ La Amua haela maeape, A hela ekeki, arave akore apaki ave.

⁵⁰ Iesu arero maeape, Elare ita aula ave la akore ovokake leive.

⁵¹ Are aupe hoa areve horova kiva haela uku arero oki koarai arero maeape — areve akore ovokake le lei.

⁵² Laelave are erero velavela leipe — are veveke le la hoa laleila. Ere arero maeape — Hailaea hare one o'clock hovea areve maea heaha le laparaeaila.

⁵³ Laelave la oa are va ore — la hoa havahu Iesu maeape, Ave akore ovokake leive. Are i areve lalava haela ila hareho iki le kelavape.

⁵⁴ Hoa orakohaila ma Iesu Judea hakorepai kihoai Galilee ihova veveke leipe.