John 3 - Pupu Oharo Āre 1963 Genese 1970 Rute 1972

Iesu i Nicodemus ila ve oharoharo

¹ Pharisee haela ae rare Nicodemus — Jew haela ve amua.

² Are iki oroa hoa Iesu ve leia arero maeape, Haelapo, ela v'ore a va Aualari ve ekepe kilea haela — ehovea a leivahaevila ma ihova oaria Aualari koarai aeavila haela hiki ore.

³ Iesu arero kavale maeape, O iele, O iele, ara aro maeaive — haela ae va āre epaki aue la leikilava, are Aualari ve basileia eava va ka.

⁴ Nicodemus arero maeape, Haela eapapo are kai learia kai le epakilai? Are aeka areve lou ve eharau ureve araeai āre kai epakilai ha?

⁵ Iesu arero kavale maeape, O iele, O iele, ara aro maeaive. Haela ma i ove v'ila epaki aue la leikilava, are Aualari ve basileia araeakive hovea lei va ka.

⁶ Aivau ve epape la eharu aivau hiki, ove ve epape la eharu are va ove.

⁷ A horahora kalailue, ehovea ara aro lamaeaila, a va āre kai epakilai, heroe.

⁸ Mea are havahu ve ikivere ve kiveveaivila; a va areve uara iapaivila, aka are va lahoa ve ekepe aka lahoa aukilai a va ore va ka. Ove ve erarura la haela oaria kara laria.

⁹ Nicodemus arero maeape, Ma eharu leari leive ha?

¹⁰ Iesu arero kavale maeape, A va Israel haela ve kilea haela, aka ma eharu iapa va ka ha?

¹¹ O iele ara aro maeaive, Ela va ore la eharu ela hukavalula, ela eavape la eharu ela vavavaelula, aka elave oharo e kelava va ka.

¹² Ara ero meahaiapo eharu lamaeaila — e va iapaki aue va laila, ara ero Kaia ve eharu la kileakilava e va learia kelavakilai ha?

¹³ Haela ae kaia ve au pekaila, kaia ve kihoaupe la haela hiki: Kaire! Kaia ve aeavila haela ve Akore, are hiki.

¹⁴ Hovea hovea, Moses huakara ve la ekaroa akea ve urapape, are haela ve Akore laria urapakilai.

¹⁵ Ehovea ikikelavaki haela are v'ila ovokake leivahaeakilai.

¹⁶ Ehovea Aualari meahaiapo ikivere havahu leipe, laelave are are havahu epape akore avarape, ehovea arero ikikekelaki la haela ovokake haiapo avakilai.

¹⁷ Aualari areve akore meahaiapo heheavakive au kiparaeaila, aka ehovea meahaiapo are v'ila lei makurikive.

¹⁸ Arero ikikekelaki la haela are heheava va ka, aka ikikekelaki aue la haela ere overa heheavape, ehovea are Aualari havahu epape la Akore ve rare iki au kekelaila.

¹⁹ Heheavaki oharo ma — ovava meahaiapo kihoaupe, aka haela mea muru ikivere eapapo leivahaeape, kai ovava ikivere eapapo au leila, ehovea ereve horova kara heaha leivahaeape.

²⁰ Heaha leilula la haela oaria ovava ikihairihairi, kai ovava ve ekevehaea va ka, ereve mai heahaha hihika leivahaeaki ave.

²¹ Aka mai iele leivila la haela ovava ekevila, ehovea areve horova oaria hihika leikive, Aualari v'ila leivahaeape la horova.

John Baptist Iesu v'ila vavavape oharo

²² Ma oharo kari lei, Iesu i kilea haela ila Judea ita hoahukape. Are ere i hareho bapatiso horova leilula apearoape.

²³ John kara Aenon, Salim maeamaea, bapatiso leivahaeape, ehovea leia va ma oaria.

²⁴ La hoa ere John uvi muru au paraeaila.

²⁵ John ve kilea haela i Jew haela haroapo ila maea veveroro leiki mai v'ila hahari oharo ape.

²⁶ Ere iki John ve leia mari maeape, Jordan ukai ve a i hareho veape la haela, a are v'ila vavavape la haela; iapai, are bapatiso leivahaevila, haela oaria areve leia korukaiavahaelula.

²⁷ John kavale maeape, Haela ae ve eharu kaia ve kihoauki aue la leikilava areve eharu iele karia.

²⁸ E havahu ara v'ila vavavape ehovea ara mariape, Ara Keriso va ka, aka ara areve oropa kiparaeape haela.

²⁹ Uva maepaki haela, are va vila havahu — aka vila are ve kake are are i hareho epavi oharo iapaki la haela, are va ikiveveke leivila ehovea vila are ve āra — laelave ara va ikiveveke le leipe.

³⁰ Are va eapapo leikilai, ara va aireaki hekai le leikilai.

³¹ Akea ve kihoauvila la haela are va haela oaria ve akea ve. Meahaiapo ve la haela are meahaiapo ve, are kai meahaiapo oharo hukavavila, kaia akea ve kihoauvila la haela are va haela oaria ve akea ve.

³² Are eavape kai iapape la eharu are vavavavila, areve vavavaki oharo haela ae ikivere va ka.

³³ Areve oharo iapape la haela areva ma oharo koarai mari ape — Aualari va iele.

³⁴ Ehovea Aualari kiparaeape la haela Aualari ve oharo hukavavila. Are ove au hamuri avara va ka.

³⁵ Oa areve akore ikivere havahu, kai eharu oaria areve mai ve aiarape.

³⁶ Akore ve rare ikikekelaki la haela are ovokake haiapo avakilai. Aka Akore ve oharo iapaki aue haela ovokake eava va ka, aka Aualari ve hihiri areve ureve aeakilai.