John 21 - Pupu Oharo Āre 1963 Genese 1970 Rute 1972

Iesu Tiberius ma haru poe ve hihika leipe

¹ Ma eharu kari lei Iesu areve kilea haela ve oropa ve Tiberius ma haru ve hihika leipe. Are areve maea erero maria amoeape.

² Simon Peter i Thomas rare aeva Didymus i Nathaniel, Cana Galilee karikara ve haela, i Zebedee ve akoremari, i kilea haela aeva 2 kara, hareho apearoape.

³ Simon Peter mariape, Ara horera ekaka haropakive. Ere arero maeape, Ela a i hareho horerakilai. Ere hoahukai boti horeavi, la oroa ekaka au koaraila.

⁴ Mea opi hoa, Iesu miri epavape. Lai vi va, kilea haela haveva are va Iesu la.

⁵ Iesu erero maeaeape, Mekehaku, e va eapai ila ha?

⁶ Ere arero kavale maeape, Karia. Are erero maeaeape, Loko boti ve ore ukai ve paraeaki — e va leia koarakilai. Ere paraeai arero hailavakive ore au leila ehovea ekaka oaria iele arero heloe la koape.

⁷ Iesu ikivere havahu leipe la kilea haela Peter maeape, Amua la! Peter Amua ve la oharo iapai, elare maea pura hahape (ehovea are maheare) kai ma ve hareaupe.

⁸ Kilea haela ae boti hekai ve uka?-?kepe (ehovea ere apehai ka, 200 cubit hiki). Ere loko ekaka maeakoko ila hakeavape.

⁹ Ere miri epavape la hoa ere a ovohae eavape, ekaka uku akea ve apeape, pai uku kara.

¹⁰ Iesu erero maeape, E lakoaraila ekaka oaria aikeila.

¹¹ Simon Peter pekai loko i ekaka ehoaha oaria ila hakeavape, ekaka ehoaha va 53, ekaka oaria iele, aka loko au haiparara?-?paila.

¹² Iesu erero maeaeape, Iki eapai larive. Kilea haela oaria oaoka arero apevelavela leikive, A va leita ha? ehovea ere ore are va Amua.

¹³ Iesu iki pai mai paeai erero aiarape — ekaka kara.

¹⁴ Hoa three ma Iesu elare maea areve kilea haela amoeape, apai kai uroupe la hoa.

Iesu Peter maeape hita oharo

¹⁵ Ere eapai lala Iesu Simon Peter maeape, Simon, Jonas ve akore, a araro ikivere eapapo leivila ha ma haela perehekai ha? Are arero maeape, Kaire, Amua e, a v'ore ara aro ikivere leive. Are arero maeape, Arave mamoe titaeka ve eapai aiarakive.

¹⁶ Are arero aeka maeape, Simon, Jonas ve akore, a araro ikivere iele leive ha? Are arero maeape Kaire, Amua e, a v'ore ara aro ikivere leivila. Are arero maeape, Arave mamoe kiva leikive.

¹⁷ Are arero aeka hoa ilehoila kai maeape, Simon, Jonas ve akore, a araro ikivere leivila ha? Peter ikihairihairi leipe ehovea are arero hoa ilehoila maeape, A va araro ikivere leivila ha? Are kai arero maeape, Amua, a va eharu oaria ore hiki — a v'ore ara aro ikivere leivila. Iesu arero maeape, Arave mamoe ve eapai aiarakive.

¹⁸ O iele, o iele, ara aro maeaive — ave harokou hoa a va elare pura hahape: ave ikivere oki a le aupe. Aka ava haela eapapo leiki la hoa a va mai horapai haela ae aro pura hahakilai, kai ava ikivere leiki aue la okiharo are aro oraiavi aukilai.

¹⁹ Are ma oharo maeape ehovea areve apaki hoa, are Aualari la morapaeaki maea va kileakilai. Are ma oharo maeai arero aeka maeape, Arave airekai ekela.

²⁰ Peter aire helari Iesu ikivere havahu leipe la kilea haeala ereve airekai ekevila eavape. La kilea haela eapai hoa areve arahu ve haiavape kai mariape, Aro hihila epaki haela va leita ha?

²¹ Laelave Peter arero eavi Iesu velavela maria leipe, Amua, ma haela leari leikilai ha?

²² Iesu arero maeape, Ara ikivere la leikilava are arave aire kihoreraki hoa la karikilai, la va ave horova ha? A araro airekai ekekive.

²³ Laelave ma oharo kilea haela ve leia mea oaria hukavape maria — la kilea haela aireaki apa va ka. Aka Iesu arero au maeaila are va apa va ka, aka, Are va ikivere la leikilava are araro karikilai, la va ave horova ha?

Kokaukaki oharo

²⁴ La kilea haela ma oharo oaria vavavila, kai ma oharo oaria haeape haela ma. Ela va ore areve vavavaki oharo va iele.

²⁵ Aeka Iesu leivahaeape eharu oaria le apearo. La oharo oaria buka la haeakilava, meahaiapo la buka oaria korukaiakive hoveahovea lei va ka.