John 2 - Pupu Oharo Āre 1963 Genese 1970 Rute 1972

Cana, vila uva laeape hurae

¹ Hare 3 karia leilai. Cana Galilee kakikara, ere uva laeaki hurae leivahaeape. Iesu ve lou kara leia hoaupe.

² Ere Iesu i kilea haela ila laeaki hurae ve itavavahaeape.

³ Ere wine ikivere leipe la hoa, Iesu ve lou arero maeape, Ereve wine karia.

⁴ Iesu arero maeape, Ara v'ila learia leive ha? Arave hoa are.

⁵ Areve lou — horova haela maeaeape, Are ero maeaeaki la horova, lari leivahaeaki.

⁶ Hahu ehoaha 6 leia apeape, ehovea Iudea haela ve veveroro leiki pupu hovea — Hahu aeva heloekoa iele ma gallon 20 hovea.

⁷ Iesu uvi horova haela maeaeape, Hahu are hihiuka heheloekoavaki. Ere ma hihiukape, hahu heheloe koavape.

⁸ Are erero maeaeape, Au kaitavaila, hurai ve amua ve aiaukive. Ere erero aiaupe.

⁹ Hurai ve amua wine koelaripe la ma maea hovave leipe la hoa (Ere avape maea hovea haveva, aka hihiukape la haela hiki ore) la hurai amua laeaki vila itavape —

¹⁰ Are kai arero maeape, Hurai leilula haela ve mai maria — ma veveke oropa avarakive — haela va oropa ma oaria larilai, aireaki perehekai veveke la wine avarakive. Aka, a va wine veveke kiva laleila ikiki mahau.

¹¹ Ma areve oropa ihova veveke — Iesu Cana Galilee karikara leipe, areve haharika hihika amoeape. Areve kilea haela arero iki kelavape.

¹² Are va aireaki Capernaum hoaupe. Are areve lou i apavara i kilea haela ila hareho. Ere leia hare haroapo haroapo apeape.

Hehe Uvi lei veveroro leipe hari

¹³ Jew haela ve Passover hurai hoa maea iele; Iesu Jerusalem pekape.

¹⁴ Are va Hehe Uvi ureve boromakau i mamoe i huva ila ilaea leilula haela eavape — Moni kakavae leilula haela kara leia avai apearoape.

¹⁵ Are merove peroka hovea hahai haela oaria i boromakau i mamoe ila Hehe Uvi mahokaea ve haruapape: Are kakavae leivahaeroape la haela ve moni oaria hakaitapai ereve haha kara haivarukapape.

¹⁶ Huva ilaea leivahaeroape la haela are mari maeaeape, Ma eharu aiauila, arave Oa ve uvi ilaea leiki uvi kalailue.

¹⁷ Areve kilea haela overa hape la buka oharo iki kelavape, Ave la Hehe Uvi ve horova ara ikivere havahu leikilai.

¹⁸ Laelave Jew haela arero kavale maeape, A va ma eharu leivila iele ve ihova elaro amoeakive, heroe.

¹⁹ Iesu erero kavale oharo maeaeape, Ma hehe uvi kopararapa, ara va hare ilehoila arero aeka urapakilai.

²⁰ Jew haela mari ape, Ma Hehe Uvi kupe hoa hitolo oaria 46 ila. A va hare ilehoila arero learia aeka urapakilai ha?

²¹ Aka are areve maea ve oharo la hehe uvi rare maeape.

²² Laelave are api kai uroupe la hoa areve kilea haela ma oharo iki le kelavape. Ere buka ve oharo i Iesu maeaeape la oharo ila iapai kelavape.

²³ Are Jerusalem Passover hurai ve aeaveape la hoa, haela oaria areve rare iki kelavape, ehovea are leivahaeape la ihova oaria ve.

²⁴ Aka Iesu erero iki au kekelaila, ehovea are haela oaria ore overa leipe.

²⁵ Aeka are ikivere ka haela ae haela ae v'ila vavavakive: ehovea are havahu haela ve iki ureve la eharu are havahu mea oaria ore.