John 19 - Pupu Oharo Āre 1963 Genese 1970 Rute 1972

Pilate Jew haela ve oharo iapape

¹ Laelave Pilate Iesu kaivi haru le koape.

² Hevehe haela kora mamareke v'ila korona hai areve haro koharitopape: Ere areve maea pura ovoka ila orape.

³ Ere iki areve leia mari maeape, A va la ha, Jew haela ve Amua! Ere arero elare mai ve koavape.

⁴ Pilate aeka mea hoai erero maeaeape, Iapaila, ara arero eve maia ve lai kihoaukive e va ore leivahaeaki, are areve haeae au eavaila.

⁵ Laelave Iesu haro kora mamareke v'ila hahai kihoaupe: areve maea kara pura ovoka ila. Pilate erero maeaeape, Haela eavaila!

⁶ Oharo haela i kapena haela ila arero eavi ara eapapo hape maria, Arero satauro harive, arero satauro harive! Pilate erero maeaeape, E havahu arero kaivi satauro harive, ehovea ara areve haeae eava va ka.

⁷ Jew haela arero kavale maeape, Elave pupu le aeave — ehovea la pupu are va apakive hovea, ehovea are elare maea Aualari ve Akore maeape.

⁸ Pilate ma oharo iapai oaoka le leipe.

⁹ Are praetorium aeka pekai Iesu maeape, A va lahoa ve ha? Iesu arero kavale oharo au maeaila.

¹⁰ Laelave Pilate arero maeape, A araro oharo kimaea va ka. A va ore va ka ha ara va aheke ehovea aro paraeakive, kaire, ehovea aro satauro harive?

¹¹ Iesu arero kavale maeape, A va aheke akea ve avakiaue la lailava, a va aheke iele lei va ka. Laelave aro araro avarape la haela ve haeae eapapo, a va perehekai.

¹² Pilate ma oharo iapai are ikivere arero paraeakive. Aka Jew haela āra mari hape, A va ma haela la paraeakilava, a va Caesar ve loaukai va ka. Are elare rare amua rare avila la haela are va Caesar ve iri haela.

¹³ Pilate la oharo iapai Iesu lai kihoai heheavaki haha akea ve haiavape. La ita rare Have Ita, Hebrew rare Gabbatha,

¹⁴ La hoa Passover ve kariki hoa — hare hihi hovea. Are Jew haela maeaeape, Eavaila! Eve Amua.

¹⁵ Ere āra mari hape, Arero lai aukive — arero lai auki satauro harive. Pilate erero maeaeape, Ara eve Amua satauro harilai ha? Oharo haela maeape, Elave amua karia, Caesar hiki.

¹⁶ Laelave, la hoa, are arero erero avarape, ehovea arero satauro harive.

Iesu satauro hape hoa

¹⁷ Laelave ere Iesu lai aupe — are elare satauro oraiavi ai ita haroapo rare, harohae ita. Hebrew rare va Golgotha.

¹⁸ Ere arero leia satauro hape. Ere are i hareho haeape haela orahokaila, aeva ukai aeva ukai, Iesu va aru hihi ve.

¹⁹ Pilate hohoa hai satauro akea ve koape: Iesu, Nazareth haela, Jew haela ve Amua.

²⁰ Jew haela oaria ma oharo mureape, ehovea ere Iesu hape la ita karikara maeamaea vea — la oharo Hebrew i Roman i Greek uri ila hape.

²¹ Jew haela ve oharo haela Pilate maeape, Maria he va arekaea, Jew haela ve Amua. Aka mari, Are maeape, Ara Jew haela ve Amua.

²² Pilate oharo kavale maeaeape, Ara va oharo le hara. Kahara.

²³ Hevehe haela Iesu satauro hape. Aireaki ere areve pura au hamureai hiru four — hevehe haela haroapo hiru haroapo. Areve ure pura maeakoko, au kokorape ita karia:

²⁴ laelave ere elarelare mari hukavape, Ela ma pura haipararapa va arekaea — ela are v'ila koai koakilai, leita la avakilai. Ehovea buka hape la hohoa iele horerakilai maria: Ere arave pura elarelare au hamureape: Arave maea pura v'ila ere koai koape. Hevehe haela maria leivahaeape.

²⁵ Aka Iesu ve satauro maeamaea epavape areve lou i lou ve mariloa, i Mary, Cleophas ve uva, i Mary Magdalene ila.

²⁶ Iesu areve lou i la kilea haela ila maea iele epavila eavi are areve lou maeape, Uamari, eava! Ave akore ma.

²⁷ Are la kilea haela maeape, Eava, ave lou. La hoa havahu la kilea haela arero are havahu ve ita lai aupe.

²⁸ Aireaki, ehovea are ore eharu oaria karia le leipe, buka hape la oharo hoveahovea, Iesu mariape: Ara ma karave koave.

²⁹ Leia hahu vinegar ila aeape. Laelave ere pura hakaea vinegar paraeai hyssop kora huhai areve ape le paraeape.

³⁰ Iesu vinegar avi mariape, Kahara. Are haro ekaopi le apape.

Lape huhape hoa: Karu ihape hoa

³¹ Ehovea sabati ve oropa karikiki hare, maea satauro akea sabati hare apeaki ave, Jew haela Pilate velavela leipe maria — ereve loa overa koekavaki erero aiaukive.

³² Laelave hevehe haela iki are i hareho satauro haeape la haela orahokaila ve loa koekavape.

³³ Aka ere iki Iesu ve leia ovohae eavape are va overa apape, laelave ere areve loa au koekavaila.

³⁴ Lae vi va hevehe haela ae areve kararapi lape huape. La hoa apu i ma ila kihorerape.

³⁵ Ovohae eavape haela ma oharo vavavape. Areve oharo va iele. Are v'ore areve oharo iele, ehovea e kara ikikekelakilai.

³⁶ Ma eharu leivahaeae ehovea buka hape la oharo iele horerakilai Areve uki haroapo ere koeka va ka.

³⁷ Buka oharo aeva ma Ere lape huhape la haela ovohae eavakilai.

³⁸ Ma eharu karia lei Joseph Arimathaea, Iesu ve kilea haela ae (are muruhari leipe ehovea are Jew haela oaoka leipe) are iki Pilate velavela leipe — are Iesu ve maea hareavakive — Pilate areve oharo iapape. Laelave are iki Iesu ve maea hareavape.

³⁹ Nicodemus kara, overa hoa oroa ekepe la haela, muo veveke muramura myrrh i aloes ila, 100 pound mehau la, avikepe.

⁴⁰ Ere Iesu ve maea avi muramura i pura veveke ila hahape, Jew haela ve karu ihaki mai hoveahovea.

⁴¹ Ere arero satauro hape la ita aru ila. La aru ureve kapu ita are aeape. Leia apape haela overa au ihaila.

⁴² Ehovea Jew haela ve sabati karikiki hoa, ere arero leia ihape, ehovea la ita maea iele.